Sunday, May 26, 2024

မိုးနဲမြို့နယ် ဘုန်းကြီးကျောင်းဝန်းအတွင်း ရဲတပ်ဖွဲ့ဝင်ဟောင်းတစ်ဦး လောင်းကစားများဖွင့်လှစ်နေ

Must read

သျှမ်းပြည် နမ့်စန်ခရိုင် မိုးနဲမြို့နယ် ဆိုင်းဖယ်ရွာအရှေ့ဘက်ရှိ လုံစံဘုန်းကြီးကျောင်းဝန်းအတွင်း ရဲတပ်ဖွဲ့ဝင်ဟောင်းတစ်ဦးမှ ဦးဆောင်၍ လောင်းကစားဝိုင်းများ ဖွင့်လှစ်နေကြောင်း စုံစမ်းသိရသည်။

မိုးနဲ လောင်းကစားဝိုင်း

ပြီးခဲ့သည့် နိုဝင်ဘာလ ၂၆ ရက်မှစ၍ ရဲတပ်ဖွဲ့ဝင်ဟောင်း ကိုမြင့်ဇော်ဆိုသူမှ ဦးဆောင်ပြီး အာဏာပိုင်းများထံ ကျပ်ငွေ သိန်းနှင့်ချီအခွန်ဆောင်ကာ ဆိုင်းဖယ်ရွာအရှေ့ဘက်ရှိ လုံစံဘုန်းကြီးကျောင်းဝန်းအတွင်းသို့ လာရောက်လောင်းကစားဖွင့်ထားသည်မှာ ၁ လရှိလာပြီ ဖြစ်ကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။

ထို လောင်းကစားများ ဆော့ကစားခြင်းကြောင့် ဝန်ထမ်းများနှင့် ဒေသခံပြည်သူများသည် ကျပ်ငွေသိန်းရာနှင့်ချီ ဆုံးရှုံးပြီး အိမ်ပေါင်ထားရသည့်အဆင့်ထိ ဖြစ်ပွားနေသဖြင့် အဆိုပါလောင်းကစားဝန်းကို ရပ်တန့်စေချင်ကြောင်း ၎င်းကဆက်ပြောသည်။

“ဘဝပျက်သွားတဲ့သူတွေ အများကြီးပဲ။ ထွေအုပ်ဝန်ထမ်းတွေကော၊ စည်ပင်ဝန်ထမ်းတွေကော တော်တော် များများရော လောင်းလိုက်ရင် ကျပ်ငွေ သိန်း ၂၀၊ ၃၀ လောင်းတာ။ လောင်းရင်းနဲ့ ပိုက်ဆံဆုံးတာပေါ့ဗျာ။ တစ်ညထဲတောင်မှ တချို့လူတွေ ကျပ်သိန်း ၁၀၀ ဆုံးတဲ့လူကောရှိတယ်။ အခုကဘယ်သူကိုမှ တိုင်လို့တိုင်ကြား ရမှန်းမသိ။ အာဏာပိုင်တွေ၊ ရဲတွေကပါ ချယ်ယာလုပ်ထားတာ” ဟု ၎င်းဒေသခံတစ်ဦးက ပြောသည်။

အဆိုပါ သသာနာ့နယ်မြေ ဘုန်းကြီးကျောင်းဝန်းအတွင်း လောင်းကစားဖွင့်လှစ်နိုင်ရန် ကျောင်းမှဆက်ဆိုင်ရာ အဖွဲ့အစည်းကို လောင်းကစားတစ်ပွဲလျှင် ကျပ်သိန်း ၁၅၀ ပေး၍ ဖွင့်လှစ်နေကြောင်း သိရသည်။

အလားတူ မိုးနဲမြို့နယ် တိုက်နယ်မှူးကို ကျပ်ငွေ ၂၀ သိန်း၊ ရဲမှူးကို ကျပ်ငွေ ၂၀ သိန်း၊ နယ်ထိန်းရဲတပ်ဖွဲ့ကို ကျပ်ငွေ ၁၅ သိန်း စသဖြင့် အာဏာပိုင်များထံ တစ်လစာအခွန်ဆောင်ထားကြောင်းလည်း ဒေသခံ၏ပြောချက်အရ သိရသည်။

ယင်းကဲ့သို့ အာဏာပိုင်များကို အခွန်ဆောင်ပြီး လောင်းကစားဝိုင်းဖွင့်လှစ်ထားသောကြောင့် ဒေသခံများ၏ အနေဖြင့် အရေးယူရန် တိုင်းကြားလိုပါက မည်သူ့ကိုတိုင်းကြားရမှန်းမသိကြောင်း၊ ထို့အပြင် မိုးနဲမြို့နယ် ရပ်ကွက်တချို့ တွင်လည်း လောင်းကစားဝိုင်းများကို ချဲ့ထွင်ပြီး ဖွင့်လှစ်လာနေသဖြင့် ဒေသခံများ စိုးရိမ်နေရသည်ဟု ဆိုသည်။

စစ်တပ်အာဏာသိမ်းပြီးနောက် သျှမ်းပြည်အတွင်း အုပ်ချုပ်ရေးယန္တရား ပျက်ပြားနေပြီး ဉပဒေကင်းမဲ့နေစဉ် အခြားတစ်ဖက်မှာလည်း နိုင်ငံရေးနှင့် စစ်ရေးပဋိပက္ခများကြောင့် ရှုပ်ထွေးနေကာ အများကအာရုံမစိုက်နိုင်ချိန် စစ်ကောင်စီ လက်အောက်ခံ ရဲတပ်ဖွဲ့များသည် ၎င်းတို့စီးပွားရှင်များနှင့်အတူ ပူးပေါင်းပြီး မြို့နယ်အသီးသီးမှာ လောင်းကစားဝိုင်းများကိုချဲ့ထွင်ကာ လွတ်လပ်စွာ ဖွင့်လှစ်နေလျက်ရှိသည်။

Leave a Comments

- Advertisement -spot_img

Latest article