သျှမ်းမြောက် ရွှေလီ(ထုန့်မောဝ်း)ဒေသကို စစ်ကောင်စီမှ လေယာဉ်ဖြင့် နေ့စဉ်ရက်ဆက် ဗုံးကြဲတိုက်ခိုက်ခြင်းကြောင့် ကျေးရွာတချို့မှာ နေအိမ်အများအပြား ပျက်စီးသွားပြီး ရွာပျက် ဖြစ်နေကြောင်း နေရပ်ပြန်သွားကြည်သူများထံများက ပြောသည်။
အောက်တိုဘာလ ၂၇ ရက်မှစတင်လာသည့် “၁၀၂၇ စစ်ဆင်ရေး”ကာလအတွင်း နှစ်လနီးပါးအကြာ သျှမ်းမြောက် မြို့နယ်များမှ စစ်ကောင်စီ တပ်စခန်းပေါင်း ၃၀၀ နီးပါးကို ညီနောင်မဟာမိတ်တပ်ဖွဲ့များတို့ သိမ်းပိုက်လာနိုင်ချိန်တွင် စစ်ကောင်စီဘက်မှ ခုခံတန်ပြန်တိုက်ခိုက်သည့်အနေဖြင့် လေကြောင်းကို ပိုအသုံးပြု၍ အရပ်သားနေအိမ်၊ ကျောင်းဆောင်များကို မရှောင်ဘဲ ဗုံးကြဲတိုက်ခိုက်နေလျက်ရှိသည်။
ယင်းကဲ့သို့ အဆင်မခြင် လေယာဉ်ဖြင့်ဗုံးကြဲတိုက်ခိုက်ခြင်းကြောင့် မူဆယ်မြို့နယ် ၁၀၅ မိုင်၊ မန့်မော်ကျေးရွာနှင့် တုန်ခန်ကျေးရွာ စသည့်ဖြင့် ကျေးရွာများတွင် နေအိမ်အများအပြား ပျက်စီးသွားပြီး ရွာပျက် ဖြစ်နေကြောင်း တုန်ခန်ရွာကို ပြန်သွားကြည့်သည့် စစ်ဘေးရှောင်တစ်ဦးက ပြောသည်။
“နေအိမ်တွေတော့ တော်တော်များများပျက်စီးသွားတယ်။ ဘာမှပြန်ယူလို့မရတော့ဘူး။ သူခိုး၊ ဓားမြတွေလည်း ပေါတယ်။ ပစ္စည်းတွေအကုန် မွှေထားတာ။ ရွာဘေးပတ်လည်မှာ အနံ့ဆိုး၊ အပုတ်နံ့တွေလည်း ထောင်းနေတာပဲ။ ရွာကတော့ ရွာပျက်ကြီးလိုဖြစ်နေပြီ” ဟု ၎င်းစစ်ဘေးရှောင်တစ်ဦးက ပြောသည်။
အလားတူ ယမန်နေ့ (ဒီဇင်ဘာလ ၂၄ ရက်)တွင်လည်း မူဆယ်မြို့နယ် နမ့်ခွမ်ကျေးရွာနှင့် တုန်ခန်ကျေးရွာအကြား စစ်ကောင်စီတပ်နှင့် ညီနောင်မဟာမိတ်တပ်ဖွဲ့တို့ တိုက်ပွဲဖြစ်ပွားနေစဉ် စစ်ကောင်စီဘက်မှ လေယာဉ်ဖြင့် ထပ်မံဗုံးကြဲတိုက်ခိုက်ခဲ့သဖြင့် နေအိမ်ပျက်စီးမှုများလည်း ရှိကြောင်း သိရသည်။
လက်ရှိ တအာင်းတပ်ဖွဲ့ TNLA ထိန်းချုပ်ရာ နမ့်ခမ်းမြို့တွင်လည်း ဒေသခံနေအိမ်များ ဖောက်သွင်းခံရပြီး တန်းဖိုးကြီး ပစ္စည်းများလည်း ယူဆောင်းသွားခံရကြောင်း နေရပ်ပြန်သွားကြည့်သူများက ဆိုသည်။
“ကျနော်တို့ အိမ်ပြန်သွားရင် တိုက်ပွဲထပ်ဖြစ်လို့ ပြေးရမှာမကြောက်တော့ဘူး။ သေနတ်သံကြားရင် ပြေးဖို့အသင့်ပဲ။ ဒါပေမယ့် အိမ်မှာရှိတဲ့ကျနော်တို့ ဝယ်ထားတဲ့ပစ္စည်းတွေ ခိုးခံရလို့ ပျောက်ကုန်မှာပဲ ကြောက်တယ်။ ပျက်ကုန်မှာပဲ စိုးတယ်။ အခုချိန်မှာတော့ အိမ်ပြန်ကြည့်ချင်တာပဲ သိတယ်” ဟု မူဆယ်မြို့ စစ်ဘေးရှောင်တစ်ဦးက ပြောသည်။
ထို့အပြင် နမ့်ခမ်းမြို့တွင်လည်း စစ်ကောင်စီ၏ စခန်းသစ်ကုန်း သိမ်းပိုက်နိုင်ရေး ဖော်ဆောင်ခဲ့စဉ် ကာလအတွင်း စစ်ကောင်စီဘက်မှ လေကြောင်းဖြင့် အကြိမ်ရေ စုစုပေါင်း ၃၆၀ ဗုံးကြဲတိုက်ခိုက်ခဲ့ကြောင်း၊ တစ်လကျော်ကြာ စခန်းသစ်ကုန်း သိမ်းပိုက်ရေး ကာလ၌ နေအိမ်အလုံး ၁၀၀ နီးပါး ပျက်စီးဆုံးရှုံးခဲ့ကြောင်း TNLA မှထုတ်ပြန်ထားသည်။
Leave a Comments