သျှမ်းပြည် လောက်ကိုင်မြို့ကို စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်မှုကြောင့် အရပ်သား ၃ ဦးသေဆုံးပြီး ၅ ဦးဒဏ်ရာရရှိခဲ့ကြောင်း သတင်းသိရသည်။

လောက်ကိုင်မြို့ရှိ အိုလုံတုံ့နေရာကို ဒီဇင်ဘာလ ၂၃ ရက်က စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် စစ်ဘေးရှောင်များ ခိုလှုံရာနေရာသို့ ကျရောက်ပေါက်ကွဲခဲ့ကာ အရပ်သား ၃ ဦး သေဆုံးပြီး ကလေးငယ် ၁ ဦး အပါအဝင် ၅ ဦး ထိခိုက်ဒဏ်ရာရရှိခဲ့ကြောင်း ကိုးကန့်မီဒီယာက ယမန်နေ့ (ဒီဇင်ဘာလ ၂၄ ရက်)တွင် ထုတ်ပြန်ထားသည်။

ဒီဇင်ဘာလ ၂၃ ရက် တစ်ရက်တည်းတွင် မြန်မာ-တရုတ် နယ်စပ်မှတ်တိုင် (၁၂၃)အနီး စစ်ဘေးရှောင်စခန်းရှိ ၁၆ နှစ်အရွယ် မိန်းကလေးတစ်ဦးသည် ထင်းကောက်နေစဉ် စစ်ကောင်စီထောင်ထားခဲ့သော မိုင်းနင်းမိခြင်းကြောင့် ခြေနှစ်ချောင်းလုံး ထိမှန်ပြီး ညာခြေထောက် ကျိုးပြတ်သွားခဲ့သည်ဟု သိရသည်။

အလားတူ သိန္နီမြို့နယ်တွင်လည်း ဒီဇင်ဘာလ ၂၃ ရက်နေ့က စစ်ကောင်စီတပ်မှ သိန္နီရဲစခန်းအနီးသို့ လေကြောင်းဗုံးကြဲတိုက်ခိုက်ခဲ့ခြင်းကြောင့် အရပ်သား ၂ ဦး သေဆုံးပြီး ၅ ဦးဒဏ်ရာရရှိခဲ့ကြောင်း ထုတ်ပြန်ချက်တွင် ဖော်ပြထားသည်။

စစ်ကောင်စီနှင့် ညီနောင်မဟာမိတ် ၃ ဖွဲ့တို့သည် ဒီဇင်ဘာလ ဒုတိယပတ်အတွင်းက တရုတ်နိုင်ငံ၏ ကြားဝင်စေ့စပ်မှုဖြင့် ကူမင်းမြို့၌ တွေ့ဆုံဆွေးနွေးခဲ့ပြီးနောက် ယာယီအပစ်အခတ် ရပ်စဲရေးသဘောတူစာချုပ်ကို လက်မှတ်ရေးထိုးခဲ့ကြသည်ဟု တရုတ်နိုင်ငံဘက်က ပြောဆိုသော်လည်း မြန်မာ-တရုတ်နယ်စပ်ရှိ နမ့်ခမ်း၊ မူဆယ်နှင့် လောက်ကိုင်မြို့တို့တွင် တိုက်ပွဲဖြစ်ပွားမှု လျော့ကျသွားခြင်း မရှိပေ။

ထို့အပြင် စစ်ကောင်စီတပ်သည် စစ်ပွဲငြိမ်းဆဲမှုကို ချိုးဖောက်ပြီး ဒီဇင်ဘာလ ၁၈ ရက်မှ ၂၁ ရက်အတွင်း ကိုးကန့်ဒေသရှိ MNDAA တပ်ဖွဲ့၏ ခံတပ်နေရာများနှင့် လောက်ကိုင်မြို့တွင်းသို့ လေကြောင်းဖြင့် အကြိမ် ၅၀ နီးပါး လာရောက်ဗုံးကြဲ တိုက်ခိုက်ခဲ့ပြီး ပြည်သူထိခိုက်သေဆုံးမှုနှင့် နေအိမ်ပျက်စီးမှုတို့ကို အသေးစိတ် မသိရှိရသေးကြောင်း ကိုးကန့်မီဒီယာက ဒီဇင်ဘာလ ၂၂ ရက်တွင် ထုတ်ပြန်ထားသည်။

ဒီဇင်ဘာလ ၁၆ ရက်နေ့က ကိုးကန့်တပ်ဖွဲ့ MNDAA ၏ ကိုးကန့်ခရိုင် အထွေထွေအတွင်းရေးမှူးနှင့် နိုင်ငံရေးဌာန ဒု-ဌာနမှူးတို့ ဦးဆောင်သည့် အလုပ်အမှုဆောင်အဖွဲ့သည် မြန်မာ-တရုတ် နယ်စပ်အနီးရှိ BP-125 စစ်ဘေးရှောင်စခန်းသို့ လာရောက်ခဲ့ပြီး စစ်ကောင်စီတပ်အနေဖြင့် လောက်ကိုင်မြို့နယ်ကို အချိန်မရွေး လာရောက်ဗုံးကြဲ တိုက်ခိုက်နိုင်ကြောင်း ပြောဆိုခဲ့သည်ဟု သိရသည်။