သျှမ်းပြည် လားရှိုးမြို့နယ်ရှိ အီနိုင်းကျေးရွာ အနီးရှိ အီနိုင်းတံတား ဖြတ်သန်း သွားလာခွင့်ကို ပိတ်ပင်ထားကြောင်း စုံစမ်းသိရသည်။
ယနေ့( ဒီဇင်ဘာလ ၂၅) ရက် မွန်းလွဲပိုင်း (၁၂) နာရီဝန်းကျင်မှ စတင်ကာ လားရှိုးမြို့ အဝင် အီနိုင်းကျေးရွာရှိ တံတား ဖြတ်သန်းခွင့်ကို အကန့်အသတ်မရှိ ပိတ်ပင်တားမြစ်လိုက်ခြင်း ဖြစ်ကြောင်း လားရှိုးမြို့မှ ကားဆရာ တစ်ဦးက သျှမ်းသံတော်ဆင့်ကို ပြောသည်။
“အီးနိုင်းဘက်က တံတားကပိတ်လိုက်ပြီ၊ ပြီးခဲ့တဲ့ တပတ် (ဒီဇင်ဘာလ ၁၁ ဝန်းကျင်) တုန်းက သွားလာလို့ ရသေးတယ်၊ အဲ့နောက်တိုက်ပွဲတွ ပြင်းထန်လာတော့ ကျနော်လည်း အဲ့ဘက် ကားမထွက်နိုင်ခဲ့ဘူး။ ဒီနေ့တော့ အီနိုင်းတံတားက ပိတ်လိုက်ပြီ၊ ဖြတ်သန်းသွားလာခွင့် လုံးဝ ခွင့်မပြုတော့ဘူးတဲ့” ဟု လားရှိုးမြို့နေ နာမည်မဖော်လိုသူ ကားဆရာ တစ်ဦးက သျှမ်းသံတော်ဆင့်ကို ပြောသည်။
အီနိုင်း ကျေးရွာရှိ အီနိုင်းတံတားသည် လားရှိုးမြို့ – နမ္မတူမြို့ အတွက် အဓိက ဖြတ်သန်းသွားလာရသည့် ကားလမ်းမကြီးခု ဖြစ်ပြီး လားရှိုးမြို့အထွက် နှင့် ကပ်လျက် ရှိနေသည့် ကျေးရွာလည်း ဖြစ်သည်။
လက်ရှိ အီနိုင်းတံတား လမ်းပိတ်လိုက်သည့်အတွက် နမ္မတူဘက်မှ လာသည့် ခရီးသည်များ၊ စစ်ဘေးရှောင် များ၊ ကားသမား အတွက် အဆင်မပြေနိုင်ကြောင်း ၊လားရှိုးမြို့မှ နမ္မတူ စစ်ရှောင်များကို သွားရောက် ကူညီ ပေးမည့် ပရဟိတသမားများလည်း သွားလာရန် မဖြစ်နိုင်တော့ကြောင်း သိရသည်။
“နမ္မတူကို သွားဖို့ လက်ရှိ အချိန်ကတော့ ကူညီရေးကားတွေပေါ့၊ အခုလမ်းပိတ်ပြီဆိုရင် သွားလို့ မရနိုင်တော့ဘူး၊ အရင်နေ့ကလည်း နမ္မတူဘက်ကလာတဲ့ စစ်ရှောင်တွေကို လားရှိုးမြို့အဝင် စစ်ဆေးရေးဂိတ်မှာ ပိတ်ပြီး ပေးမဝင် ဘူးလို့ ကြားမိပါတယ်။ ဘာရည်ရွယ်ချက်နဲ့ လုပ်နေသလဲဆိုတာကိုတော့ မသိဘူး” ဟု အထက်ပါ ကားသမားက သျှမ်းသံတော်ဆင့်ကို ပြောသည်။
ပြီးခဲ့သည့် ဒီဇင်ဘာလ ၁၀ ရက်တွင် နမ့်ဆန်မြို့အတွင်း အာဏာသိမ်း စစ်ကောင်စီ နှင့် မဟာမိတ် ပူးပေါင်းတပ်ဖွဲ့ တိုင်းရင်းသား လက်နက်ကိုင်တို့၏ တိုက်ပွဲအပြီး အီနိုင်းတံတားကိုပါ မဟာမိတ်တပ်မှ ထိန်းချုပ်နိုင်ခဲ့သည်ဟု သတင်းများထွက်ပေါ်ခဲ့သည်။
လက်ရှိ အီနိုင်းတံတား ဖြတ်သန်းသွားလာခွင့်ကို ပိတ်ပင့်သည့် လက်နက်ကိုင်အဖွဲ့အစည်းကို သျှမ်းသံတော်ဆင့်မှ ဆက်လက်အတည်ပြုနေဆဲ ဖြစ်သည်။
ယခုရက်ပိုင်းအတွင်း အာဏာသိမ်း စစ်ကောင်စီ တပ်နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့၏ နမ္မတူမြို့နယ်အတွင်း တိုက်ပွဲပြင်းထန်မှုကြောင့်လားရှိုးဘက် စစ်ရှောင်လာသည့် ဒေသခံများကို စစ်ကောင်စီတပ်မှ တားမြစ်ပိတ်ပင်ထားကြောင်းလည်း သိရသည်။
Leave a Comments