သျှမ်းတောင် ဒေသများကို ထွက်ပြေး တိမ်းရှောင်လာသည့် ကရင်နီပြည်မှ ဒေသခံ အများစုမှာ ခရစ်ယာန် ဘာသာ၀င်များ ဖြစ်ကြပြီး ယခုနှစ် ခရစ္စမတ်ကာလကို အခက်အခဲများကြား ပွဲအကျဉ်းချုပ်သာ ပြုလုပ်ဖြတ်သန်းနေကြကြောင်း စုံစမ်းသိရသည်။

ကရင်နီပြည်နယ်ရှိ ဒေသခံအများစုသည် အာဏာမသိမ်းခင် နှစ်များတွင် ခရစ်စမတ်ကာလကို စည်ကား ပျော်ရွှင်စွာဖြင့် ဖြတ်သန်းခဲ့ကြသော်လည်း ယခုနှစ် ခရစ္စမတ်တွင်နေရပ် မဟုတ်သည့် ဒေသများတွင် စစ်ရှောင်ကာ အဆင်မပြေမှုများကြားက အချင်းချင်း အားပေးကူညီရင်း ခရစ္စမတ်ပွဲတော် အထိမ်းအမှတ် ပြုလုပ်ရန် ဆောင်ရွက်နေကြောင်း စစ်ရှောင် အမျိုးသမီးတစ်ဦးထံမှ သိရှိရသည်။

“ခရစ္စမတ်ဆိုပေမယ့် မပျော်ရပါဘူး။ ပျော်လည်း မပျော်ရက်ဘူး။ ဒါပေမယ့် ကလေးတွေက ခရစ္စမတ် ဖြတ်သန်းချင်တယ်ဆိုတော့ စုပြီး သီချင်းတိုက်ပေးတယ်။ ကလေးတွေ ကယ်ရိုစင်းထွက်လို့ ရတဲ့ ရန်ပုံငွေနဲ့ ဒီညနေမှာ ဆန်ပြုတ်ချက်ပေးမယ်။ ဒီမနက်တော့ ကျမတို့ မိသားစုတွေနဲ့ ဘုရားကျောင်းတက်မယ်ပေါ့။ လက်ရှိက ဒီလောက်ပဲ လုပ်လို့ရတဲ့ အခြေအနေ ဖြစ်နေတယ်လေ” ဟု အဆိုပါ အမျိုးသမီး ကပြောပြသည်။

ခရစ္စမတ်ကို အဆင်ပြေသလို အကျဥ်းချုပ် ပြုလုပ်နေသော တိမ်းရှောင်ရသူများအတွက် သျှမ်းတောင် ဒေသခံအချို့မှ စားစရာများနှင့် အမိုးအကာ အခင်းအချို့ လှူဒါန်းပါ၀င်ပေးကြောင်းလည်း ထပ်မံသိရှိရသည်။

“ဒေသခံ အလှူရှင်တွေက ဘုရားကျောင်းကနေ ပြန်လာရင် ခေါက်ဆွဲကြော် စားဖို့ လှူပေးတာ ရှိတယ်။ နောက်ပြီး စောင်အခင်းအချို့ပေါ့၊ စစ်ရှောင်တွေက အရမ်းများတော့ လူသစ်တွေအတွက်ပဲ အဆင်ပြေသလို စီစဥ်ပေးထားပါတယ်။ ခရစ်စမတ်မှာ မပျော်ပဲ ခုလို ဖြတ်သန်းနေရပေမယ့် ဘုရားကျောင်းတက်ခွင့် ရနေသေးတယ် ဆိုပြီးပဲ ပြန်နှစ်သိမ့်မိတယ်” ဟု ၎င်းက ထပ်လောင်း ပြောသည်။

ယခုအချိန်တွင် သျှမ်းတောင်ကို ရောက်ရှိနေကြသော စစ်ရှောင်အများစုမှာ စားနပ်ရိက္ခာ ရှားပါးမှု၊ နေရာထိုင်ခင်း၊ အ၀တ်နှင့် စောင်များ မလုံလောက်မှု ဒဏ်များကို ရင်ဆိုင် ကျော်ဖြတ်နေကြရပြီး စစ်ကောင်စီဘက်မှ စစ်ရှောင်များအတွက် အလှူရှင်များ သွားရောက်လှူဒါန်းခြင်း မပြုနိုင်ရန် ပိတ်ဆိုမှုများလည်း ရှိနေကြောင်း စုံစမ်းသိရှိရသည်။

ထို့အပြင် သျှမ်းတောင်ရှိ စစ်ရှောင်စခန်းအချို့တွင် ဘာသာရေး စုဝေးဆုတောင်းပွဲများ မပြုလုပ်ရန် စစ်ကောင်စီဘက်မှ ပိတ်ပင်တားဆီးထားပြီး ခရစ်ယာန် ဆုတောင်းပွဲပြုလုပ်ရန် အဆောက်အအုံများကို ဖြိုချဖျက်ဆီးခြင်းများလည်း ရှိခဲ့သည်။