သျှမ်းပြည် နမ့်ခမ်းမြို့တွင် TNLA တပ်ဖွဲ့က မြို့သိမ်းအောင်ပွဲ ဆင်နွှဲလာမည့်အပေါ် ဒေသခံများက လုံခြုံရေးကို အလွန်အမင်း စိုးရိမ်နေကြောင်း စုံစမ်းသိရသည်။

တအာင်း(ပလောင်)တပ်ဖွဲ့ TNLA မှ နမ့်ခမ်းမြို့သိမ်းအောင်ပွဲကို ဒီဇင်ဘာလ ၂၅ ရက်တွင် ပြုလုပ်မည်ဟု ဒေသခံများအကြား ပျံ့နှံ့နေပြီး ၎င်းလုပ်ရပ်ကြောင့် လုံခြုံရေးအခြေအနေ စိုးရိမ်နေရကြောင်း နမ့်ခမ်းဒေသခံများက ပြောသည်။

“မနက်ဖန် နမ့်ခမ်းမြို့လယ်ခေါင်မှာ TNLA တပ်ဖွဲ့က မြို့သိမ်းအောင်ပွဲလုပ်မယ်ဆိုပြီးတော့ အိမ်စောင့်တဲ့လူတွေမရှိရင် တပ်သားတွေကြောင့် ထိခိုက်ပျက်စီးမှုကို တာဝန်မယူဘူးလို့ ရွာလူကြီးတွေကို ပြောထားတာ။ ပြည်သူတွေရဲ့ ဥစ္စာပစ္စည်းတွေကို ဖောက်ဖျက်တာမျိုးလုပ်လာရင် တာဝန်မယူဘူးလို့ ပြောလာတာ”ဟု နမ့်ခမ်းမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

နမ့်ခမ်းမြို့ကို TNLA တပ်ဖွဲ့မှ ဒီဇင်ဘာလ ၁၉ ရက်တွင် အလုံးစုံထိန်းချုပ်နိုင်ခဲ့ပြီးနောက် မြို့တွင်း၌ TNLA တပ်သားများ နေရာယူထားသော်လည်း ထွက်ပြေးတိမ်းရှောင်နေရသည့် ပြည်သူများ၏နေအိမ်မှာ နေ့စဉ်ဖောက်ထွင်းခံနေရပြီး နေအိမ်ထဲရှိ ပစ္စည်းများ ခိုးယူခံနေရကြောင်း နမ့်ခမ်းဒေသခံများက ပြောသည်။

ထိုအိမ်များသည် လက်နက်ကြီးကြောင့် ထိခိုက်ပျက်စီးမှုရှိသကဲ့သို့ အချို့နေအိမ်များမှာ တမင်တကာ လာရောက်ဖျက်ဆီးထားသည့် အနေအထားဖြစ်ကြောင်း တိုက်ပွဲငြိမ်သက်ပြီးနောက် နေအိမ်ပြန်သွားကြည့်သူများက ပြောသည်။

“စိတ်ပူတာကတော့ သူတို့စစ်သားတွေ မြို့ထဲမှာ ရှိနေပြီး စစ်ကောင်စီတပ်က လေကြောင်းနဲ့ ထပ်လာတိုက်မှာကိုပေါ့။ ဒီနေ့တောင်မှ လေယာဉ် ၂ ခါလာတယ်။ ဒရုန်းတွေကော မြို့ထဲမှာ ပျံနေတာ။ မနက်ဖန် TNLA တပ်ဖွဲ့က မြို့သိမ်းအောင်ပွဲလုပ်မယ်လို့ ပြောကြတော့ နမ့်ခမ်းက လူတွေက သူတို့စစ်သားတွေ အိမ်ဖျက်တာမျိုး လုပ်မှာကြောက်လို့ အိမ်ပြန်စောင့်ဖို့ လုပ်နေကြပြီ”ဟု ဒေသခံများ၏ စိုးရိမ်ပူပန်မှုကို နမ့်ခမ်းမြို့မှ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။

အလားတူ နမ့်ခမ်းမြို့လယ်ရှိ အာဇာနည်ကျောင်တိုင်ကိုလည်း ဒီဇင်ဘာလ ၂၁ ရက်က TNLA တပ်ဖွဲ့မှ မြေကော်ကားဖြင့် လာ‌ရောက်ဖျက်ဆီးသွားခဲ့ပြီး စစ်အာဏာရှင်ချေမှုန်းရေး ပြုလုပ်နေသော ညီနောင်မဟာမိတ်၃ ဖွဲ့တို့အနေဖြင့် သမိုင်းဝင်နေရာများ ထပ်မံဖျက်စီးပြီး လူမျိုးရေးပဋိပက္ခ အသွင်ပြောင်းသွားမည်ကို စိုးရိမ်နေကြကြောင်း နမ့်ခမ်းဒေသခံများက ပြောသည်။

ယခုကဲ့သို့ “၁၀၂၇ စစ်ဆင်ရေး”နှင့်အတူ TNLA တပ်ဖွဲ့က မြို့သိမ်းတိုက်ပွဲများ ဆင်နွှဲနေပြီး နမ့်ခမ်း၊ နမ့်ဆန် စသည့် မြို့ကြီးများကို အလုံးစုံ ထိန်းချုပ်လာနိုင်သည့် အနေအထားကို သျှမ်းသံတော်ဆင့်က TNLA တပ်ဖွဲ့၏ ပြောရေးဆိုခွင့်ရှိသူ တားအိုက်ကျော်ထံသို့ အကြိမ်ကြိမ် ဆက်သွယ်မေးမြန်းသော်လည်း လက်ခံဖြေကြားခြင်း မရှိသေးပါ။

နမ့်ခမ်းမြို့ရှိ စစ်ကောင်စီတပ်၏ နောက်ဆုံးကျန်ရှိသည့် စခန်းသစ်ကုန်းကို သိမ်းပိုက်နိုင်ရန်အတွက် တအာင်း(ပလောင်)တပ်ဖွဲ့ TNLA မှ တစ်လကျော်ကြာ ထိုးစစ်ဆင် တိုက်ခိုက်ခဲ့စဉ်အတွင်း တပ်သား ၅၀ နီးပါးကျဆုံးပြီး အများအပြား ထိခိုက်ဒဏ်ရာရရှိခဲ့ပြီးနောက် ဒီဇင်ဘာလ ၁၉ ရက်၌ အပြီးသတ် ဝင်ရောက်ရှင်းလင်း သိမ်းပိုက်နိုင်ခဲ့ကာ နမ့်ခမ်းမြို့ကို TNLA တပ်ဖွဲ့က အလုံးစုံ ထိန်းချုပ်နိုင်ခဲ့သည်။

“၁၀၂၇ စစ်ဆင်ရေး” နှစ်လနီးပါးကာလအတွင်း နမ့်ခမ်းမြို့နယ်တွင် စစ်ကောင်စီ၏ လက်နက်ကြီး နှင့် လေကြောင်းဗုံးကြဲမှုကြောင့် အမျိုးသမီး ၆ ဦးနှင့် ကလေး ၄ ဦး အပါအဝင် စုစုပေါင်း ၁၆ ဦး သေဆုံးပြီး ၃၅ ဦးထက်မနည်း ထိခိုက်ဒဏ်ရာရရှိခဲ့ပြီး ပြည်သူနေအိမ် ၂၀၀ နီးပါး ထိခိုက်ပျက်စီးခဲ့ကြောင်း နမ့်ခမ်းဒေသခံများထံမှ သိရသည်။