သျှမ်းပြည် မူဆယ်မြို့နယ် နမ့်ခွမ်ရွာ-တုန်ခန်ရွာအကြားတွင် စစ်ကောင်စီတပ်ဖွဲ့နှင့် ညီနောင်မဟာမိတ်တပ်ဖွဲ့တို့ တိုက်ပွဲပြင်းထန်နေပြီး စစ်ကောင်စီဘက်မှ လေယာဉ်ဖြင့် ဗုံးကြဲတိုက်ခိုက် နေကြောင်း သတင်းသိရသည်။
ယနေ့ (ဒီဇင်ဘာလ ၂၄ ရက်) မွန်းလွဲပိုင်းအချိန်မှစပြီး မူဆယ်မြို့နယ် နမ့်ခွမ်ရွာ-တုန်ခုန်ရွာ အကြားတွင် စစ်ကောင်စီတပ်နှင့် ညီနောင်မဟာမိတ်တပ်ဖွဲ့တို့ တိုက်ပွဲပြင်းထန်နေပြီး စစ်ကောင်စီဘက်မှ လေယာဉ်ဖြင့် ဗုံးကြဲတိုက်ခိုက်နေကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“လက်နက်ကြီး၊ လက်နက်ငယ် အသံစုံကြားနေရတယ်။ တစ်ဖွဲ့က နမ့်ခွမ်ရွာအကျော်နားက နိုဝင်ဘာခြံထဲမှာနေပြီး တစ်ဖွဲ့ကတောင်ကုန်းပေါ်နေပြီး အပြန်အလှန်ပစ်ကြတာ။ တိုက်ပွဲကတော့ ပြင်းတယ်။ စစ်ကောင်စီဘက်က လေယာဉ်နဲ့ ဗုံးလာကြဲသွားတယ်”ဟု ၎င်းဒေသခံတစ်ဦးက ပြောသည်။
လက်ရှိသတင်းရေးသားချိန်အထိ တိုက်ပွဲဆက်လက် ဖြစ်ပွားနေပြီး စစ်ကောင်စီမှ လေယာဉ်ဖြင့် ပျံဝဲနေလျက်ရှိကြောင်း ဒေသခံများက ဆိုသည်။
အဆိုပါ တိုက်ပွဲနှင့်ပတ်သက်၍ ပြည်သူထိခိုက်သေဆုံးမှုများ မသိရှိရသေးပေ။
ထို့အပြင် ဒေသခံများကလည်း အဆိုပါ တိုက်ပွဲနှင့် လေယာဉ်သံကြားများကြောင့် စိုးရိမ်မှု မြင့်တက်နေလျက် ရှိသည်။
“လေယာဉ်လာတာ ခေါင်းမို့လောက်ပဲ ပျံနေတယ်လို့ ထင်ရတယ်။ အသံအကျယ်ကြီးပဲ မော့တောင် မကြည့်ရဲဘူး” ဟု မူဆယ်မြို့ဒေသခံတစ်ဦးက ဆက်ပြောသည်။
အလားတူ (ဒီဇင်ဘာလ ၂၂ ရက်)တွင်လည်း သိန္နီမြို့နယ် ကွန်ကောက်ကျေးရွာအုပ်စု ပိန်းဟုန်းရွာကို စစ်ကောင်စီမှ လေယာဉ်ဖြင့် ဗုံးကြဲခြင်းကြောင့် အမျိုးသမီးတစ်ဦး သေဆုံးသွားသည်။
“၁၀၂၇ စစ်ဆင်ရေး” နှစ်လနီးပါးအကြာ သျှမ်းမြောက်ရှိ ရွှေလီ(ထုန့်မောဝ်း) ဒေသတွင် ထွက်ပြေးတိမ်းရှောင်နေရသည့် စစ်ဘေးရှောင် ၉ ထောင်ကျော်အထိ ရှိလာပြီဖြစ်ကြောင်း သိရသည်။
Leave a Comments