သျှမ်းပြည် မန်တုံမြို့နယ်ကို TNLA တပ်ဖွဲ့က တိုက်ခိုက်သိမ်းပိုက်လိုက်ပြီးနောက် စတုတ္ထမြောက် ထိန်းချုပ်နိုင်သည့် မြို့ဖြစ်လာကြောင်း စုံစမ်းသိရသည်။

ယမန်နေ့ (ဒီဇင်ဘာလ ၂၃ ရက်)တွင် မန်တုံမြို့အခြေစိုက် စစ်ကောင်စီတပ် ခလရ-၁၃၀ ကို တအာင်း(ပလောင်)တပ်ဖွဲ့ TNLA က အပြီးသတ် သိမ်းပိုက်နိုင်ခဲ့ပြီးနောက် မန်တုံမြို့သည် နမ့်ဆန်၊ နမ့်ခမ်းနှင့် မိုင်းလုံမြို့တို့ကဲသို့ TNLA တပ်ဖွဲ့က စတုတ္ထမြောက် အလုံးစုံ ထိန်းချုပ်ထားနိုင်သည့် မြို့ဖြစ်လာသည်။

မန်တုံမြို့နယ်ရှိ စစ်ကောင်စီ တပ်စခန်းများကို TNLA တပ်ဖွဲ့က ဒီဇင်ဘာလ ၁၉ ရက်တွင် စတင်တိုက်ခိုက်ခဲ့ပြီး ၄ ရက်အကြာ ဒီဇင်ဘာလ ၂၂ ရက်တွင် မန်တုံမြို့အခြေစိုက် ခလရ-၁၃၀ ဗျူဟာကုန်း အပါအဝင် ခိုမုန်းတပ်စခန်း၊ လွယ်ဆိုင်တောင်တပ်စခန်း၊ စစ်ကောင်စီလက်အောက်ခံ ရဲစခန်းနှင့် ဌာနဆိုင်ရာရုံးများကို အလုံးစုံ သိမ်းပိုက်နိုင်ခဲ့ကြောင်း TNLA တပ်ဖွဲ့၏ သတင်းနှင့် ပြန်ကြားရေးဌာနက ယနေ့ (ဒီဇင်ဘာလ ၂၄ ရက်)တွင် သတင်းထုတ်ပြန်ထားသည်။

TNLA တပ်ဖွဲ့၏ မန်တုံမြို့သိမ်းတိုက်ပွဲ ၄ ရက်တာကာလအတွင်း စစ်ကောင်စီတပ်ဘက်မှ လေကြောင်းတိုက်ခိုက်မှု အကြိမ်ရေ ၃၀၀ နီးပါးပြုလုပ်ခဲ့ပြီး စံချိန်တင် ဗုံးကြဲချမှုအဖြစ် အကြိမ်ရေ ၁၀၀၀ ကျော် ဗုံးကြဲတိုက်ခိုက်ခဲ့ကာ လက်နက်ကြီးဖြင့်လည်း အကြိမ်ရေ ၁၀၀ ကျော် ရမ်းသမ်းပစ်ခတ်ခဲ့ကြောင်း ထုတ်ပြန်ချက်တွင် ဖော်ပြထားသည်။

ထို့အပြင် မန်တုံတိုက်ပွဲကာလအတွင်း စစ်ကောင်စီတပ်၏ ဟောင်ဝစ်ဇာအမြောက် ၂ လက် အပါအဝင် လက်နက်ခဲယမ်းမျိုးစုံနှင့် စစ်အသုံးအဆောင်ပစ္စည်း အမြောက်အများကို ရှင်းလင်းသိမ်းဆည်းရမိခဲ့ကြောင်း သိရသည်။

ယခုကဲ့သို့ “၁၀၂၇ စစ်ဆင်ရေး”နှင့်အတူ TNLA တပ်ဖွဲ့က မြို့သိမ်းတိုက်ပွဲများ ဆင်နွှဲနေပြီး နမ့်ခမ်း၊ နမ့်ဆန် စသည့် မြို့ကြီးများကို အလုံးစုံ ထိန်းချုပ်လာနိုင်သည့် အနေအထားကို သျှမ်းသံတော်ဆင့်က TNLA တပ်ဖွဲ့၏ ပြောရေးဆိုခွင့်ရှိသူ တားအိုက်ကျော်ထံသို့ အကြိမ်ကြိမ် ဆက်သွယ်မေးမြန်းသော်လည်း လက်ခံဖြေကြားခြင်း မရှိသေးပါ။

မန်တုံမြို့နယ်တွင် TNLA တပ်ဖွဲ့နှင့် စစ်ကောင်စီတပ်တို့၏ ပြင်းထန်သည့် နှစ်ဘက်တိုက်ပွဲအကြား ဆက်သွယ်ရေးကွန်ယက် ပြတ်တောက်မှုကြောင့် ပြည်သူထိခိုက်ဒဏ်ရာရရှိမှုနှင့် အိုးအိမ်ပျက်စီးမှုတို့ကို အသေးစိတ်မသိရှိရသေးဘဲ စစ်ကောင်စီတပ်၏ လက်နက်ကြီးနှင့် လေကြောင်းဗုံးကြဲမှုကြောင့် အမျိုးသမီး ၁ ဦး ထိခိုက်ဒဏ်ရာရပြီး လူနေအိမ် ၁၀ လုံးထက်မနည်း ထိခိုက်ပျက်စီးခဲ့ကြောင်း တအာင်းအမျိုးသမီးအဖွဲ့အစည်းက ဒီဇင်ဘာလ ၂၀ ရက်တွင် သတင်းထုတ်ပြန်ထားသည်။