သျှမ်းပြည် ကျောက်မဲခရိုင်၊ သီပေါမြို့နယ်၊ ကျင်သီကျေးရွာမှ စစ်ဘေး တိမ်းရှောင်ထွက်ပြေး နေရသည့် ဒေသခံ များသည် နေရပ်မပြန်နိုင်ကြသေးသည့်အတွက် စားသောက်ရေး နှင့် အနွေးအထည် အကူအညီများ လိုအပ်နေ ကြောင်းစုံစမ်းသိရသည်။

ပြီးခဲ့သည့် နိုဝင်ဘာလမှ စတင်ကာ အာဏာသိမ်း စစ်ကောင်စီ နှင့် တအာင်း (ပလောင်) အမျိုးသား လွတ်မြောက် ရေး တပ်မတော် (TNLA) တို့၏ တိုက်ပွဲကြောင့် စစ်ရှောင်ထွက်ပြေးရသည့် ကျင်သီကျေးရွာမှ ဒေသခံများသည် တစ်လကျော်ကြာအထိ နေရပ်မပြန်နိုင်ကြသေးဘဲ စားနပ်ရိက္ခာ နှင့် အနွေးထည် အကူအညီ လိုအပ်နေကြောင်း စစ်ရှောင်နေသူ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

“ကျမတို့ စစ်ရှောင်နေရတာ တစ်လကျော်ကြာပြီ။ TNLA စစ်သားတွေက ကျင်သီတံတားထိပ်နဲ့ ရွာနားမှာ ရှိနေ သေးလို့ ရွာထဲကိုလည်း မပြန်ရဲသေးဘူး၊ အခုက တောထဲက ယာခင်းတဲမှာ ခိုလှုံနေရတာ။ ဟိုတစ်စု ဒီတစ်စု နဲ့ ကျမတို့ စုစုပေါင်း အိမ်ခြေ ၁၀၀ ကျော်ရှိတယ်၊ စားဖို့သောက်ဖို့ရော၊ စောင်တွေ အနွေးထည်ရော လိုအပ်တယ်” ဟု စစ်ရှောင်နေရသူ ကျင်သီရွာခံ အမျိုးသမီးက သျှမ်းသံတော်ဆင့်ကို ပြောသည်။

လက်ရှိ အချိန်၌ ဒေသအတွင်း တိုက်ပွဲများ ငြိမ်သက်သွားသော်လည်း တအာင်း (ပလောင်)တပ် TNLA မှ ကျေးရွာ အနီးတစ်ဝိုက် ဆက်လက်နေရာယူ တပ်စွဲထားသည့်အတွက် စစ်ကောင်စီ တပ်နှင့် ထပ်မံ တိုက်ပွဲဖြစ်ပွားကို စိုးရိမ်ပြီး နေရပ်မပြန်နိုင်ကြသေးကြောင်း သိရသည်။

ထို့အပြင် ကျင်သီတံတား ဖျက်ဆီးခံရပြီးသည့်နောက်TNLA တပ်သားများသည် ကျင်သီချောင်းကူးရန်အတွက် ဒေသခံများ လှေအသုံးပြုမှုကို တားမြစ်ထားသည့် အတွက် သွားလာဆက်သွယ်ရေး၊ သယ်ယူပို့ဆောင်ရေးတို့ အတွက်လည်း အခက်အခဲများ ရှိနေကြောင်း အထက်ပါ စစ်ရှောင်အမျိုးသမီးက ဆက်ပြောသည်။

“တိုက်ပွဲဖြစ်ပြီးနောက်ပိုင်း ကျမတို့ဆီကို စစ်ရှောင်ကူညီပေးတဲ့သူတွေကနေ နှစ်ခေါက်ရောက်တယ်။ သူတို့ တစ်ခေါက်ရောက်လာရင် မိသားစုတစ်စုကို ဆန် သုံးပြည်၊ ငါးပြည် အဲ့လို ခွဲတမ်းတော့ရတယ်။ ဒါပေမဲ့ ခုတော့ မလာနိုင်တော့ဘူး၊ ကျမတို့ ဝယ်ခြမ်းဖို့ မြို့တက်ဖို့ TNLA က ချောင်းကို ကူးဖို့ လှေကို အသုံးပြုခွင့်မပေးဘူး၊ ကျမတို့မှာ ရှိတာလေးနဲ့ အချင်းချင်းမျှပြီး ချွေတာ စားနေရတာ ၊ တော်တော်ခက်ခဲတယ်” ဟု အထက်ပါ စစ်ရှောင်အမျိုးသမီးက သျှမ်းသံတော်ဆင့်ကို ဆက်ပြောသည်။

လက်ရှိအချိန်သည် ဆောင်းရာသီလည်း ဖြစ်သည့်အတွက် တောတောင်ထဲရှိ တောင်ယာစိုက်ခင်းများ၌ စစ်ရှော င်ခိုလှုံနေရသည့် ကျင်သီဒေသခံများတွင် ကလေးငယ် နှင့် သက်ကြီးရွယ်အိုများ၊ အမျိုးသမီးများအတွက် အနွေးထည်၊ စောင်များလည်း အရေးကြီး အကူအညီလိုအပ်နေကြောင်း သိရသည်။

“ညဘက်ဆို ကလေးငယ်တွေ နွေးအောင်ဆိုပြီး ကောက်ရိုးပုံထဲ ကွေးနေအောင်အိပ်တာ၊ လူကြီးတွေလည်း အဲ့လိုပဲ၊ စောင် နဲ့ အနွေးထည်က လုံလုံလောက်လောက် မရှိကြလို့လေ၊ ရွာပြန်ယူဖို့လည်း စစ်သားကို ကြောက်ရ တာနဲ့ လမ်းမှာတခုခုဖြစ်မှာကြောက်ရတာနဲ့ ဒီလိုပဲ တောထဲမှာ အတော် ဒုက္ခရောက်နေကြတယ်” ဟုလည်း အထက်ပါ အမျိုးသမီးက ဆက်ဆိုသည်။

ကျောက်မဲမြို့ နှင့် သီပေါမြို့ (ဘော်ကြို)ကြားရှိ ကျင်သီတံတားကို ပြီးခဲ့သည့် နိုဝင်ဘာလ ၁၂ ရက်နေ့ နံနက် ၄ နာရီခွဲ အချိန်တွင် TNLA တပ်ဖွဲ့က ဗုံးခွဲဖျက်ဆီးမှုကြောင့် သွားလာ၍ မရခြင်းဖြစ်ကြောင်းလည်း သိရသည်။

စစ်ကောင်စီတပ်နှင့် မဟာမိတ်တပ်တို့၏ သီပေါမြို့နယ်အတွင်း တိုက်ပွဲ ဖြစ်ပွားမှုကြောင့် တောင်ယာစိုက်ခင်း၊ တောထဲ စစ်ရှောင်နေရသည့် ဒေသခံများ အပြင် သီပေါမြို့ပေါ်ရှိ ဘိုးတော်ကျောင်း၊ စံဖိတ်၊ နားလွယ်၊ နောင်ကတ် ဘုန်းကြီးကျောင်းများနှင့် ရွှေမောင်းသိလရှင်ကျောင်းတို့မှာလည်း စစ်ဘေးရှောင် ၁၀၀၀ နီးပါး ရောက်ရှိနေကြောင်း သိရသည်။