သျှမ်းပြည် တောင်ပိုင်း တောင်ကြီးမြို့တွင် MPTလိုင်းများ ညစဉ်ညတိုင်း ပြတ်တောက်နေ၍ MPTအသုံးပြုသူများ ဆက်သွယ်ရေး ခက်ခဲပြီး လုပ်ငန်းများလည်း နှောင့်နှေးရကြောင်း ဒေသခံများ ပြောကြားချက်အရ သိရှိရသည်။
တောင်ကြီးတွင် ဒီဇင်ဘာလ (၆)ရက်နေ့မှ (၁၉) ရက်နေ့ထိ ညနေ(၅)နာရီ၀န်းကျင်တွင် စတင်ကာ MPTလိုင်းများ ပြတ်တောက်လေ့ရှိပြီး နံနက် (၇)နာရီကျော်၀န်းကျင်တွင် လိုင်းများ ပြန်လည်ရရှိမှုကြောင်း သိရှိရသည်။
“ညတိုင်း MPTတိုင် ပျောက်နေတော့ ဆက်သွယ်ရတာ အခက်အခဲ ဖြစ်တယ်။ ကြားထဲ မီးကလည်း ပျက်သေးတယ်။ တခါတလေ မနက်ပိုင်းလည်း လိုင်းပြတ်တယ်။ အပြင် သွားလာနေရင်း မိုဘိုင်းပိုက်ဆံ အသုံးပြုဖို့လည်း အဆင်မပြေတော့ဘူး။ အလုပ်ဖုန်းမို့ ဖောက်သည်တွေ၊ ဒိုင်တွေဘက်က ဖုန်းဆက်လို့ မရတော့ အလုပ်လည်း နှောင့်နှေးတာပေါ့။ လုပ်ငန်းဖုန်းအနေနဲ့ ထားပြီး လုပ်ကိုင်နေသူတွေဆိုရင် လိုင်းပြတ်တိုင်း အဆင်မပြေဘူး” ဟု ဒေသခံ အမျိုးသားတစ်ဦးမှ ပြောသည်။
ညစဥ် လိုင်းဖြတ်ရခြင်း အကြောင်းအရင်းကို ဒေသခံများမှ မေးမြန်းသော်လည်း MPTရုံးမှ ပြောကြားထားခြင်းမရှိသေးဘဲ အဆင်မပြေမှုများကို ဖြေရှင်းပေးပါမည်ဟု ဆိုထားသည်။
တောင်ကြီးတွင် MPTလိုင်းများ ပြတ်တောက်နေသော်လည်း ATOM, Ooredoo, Mytel ကဲ့သို့ အခြား ပြည်တွင်း ဖုန်းဆက်သွယ်ရေး လိုင်းများမှာ ပုံမှန်ရရှိနေပြီး တခါတရံ ATOMလိုင်းများလည်း ပြတ်တောက်တတ်သည်ဟု ဒေသခံများထံမှ သိရှိရသည်။
တိုက်ပွဲများ ဖြစ်ပွားမှုကြောင့် သျှမ်း- ကရင်နီ (ကယား) နယ်စပ်ဒေသ အများစုတွင် ဖုန်းလိုင်းများ ဖြတ်တောက်ခံထားရပြီး ဒေသခံများအတွက် ဆက်သွယ်ရေး ခက်ခဲနေပြီး သတင်းအချက်အလက်များ သိရှိရန်လည်း ခက်ခဲနေကြောင်း သိရှိရသည်။
လက်ရှိအချိန်တွင် MPTလိုင်းများ ပုံမှန်ရရှိနေပြီ ဖြစ်သော်လည်း လိုင်းများ မငြိမ်သေးသကဲ့သို့ လိုင်းပြတ်တောက် မှုများ ထပ်မံဖြစ်မည်ကိုလည်း ဒေသခံများမှ စိုးရိမ်လျက်ရှိသည်။
Leave a Comments