သျှမ်းပြည် လားရှိုးမြို့အတွင်း စစ်ကောင်စီမှ လက်နက်ကြီးဖြင့် ရမ်းသမ်းပစ်ခတ်မှုကြောင့် ဒေသခံများ စိုးရိမ်နေရကြောင်း စုံစမ်းသိရသည်။
ယမန်နေ့ (ဒီဇင်ဘာလ ၂၀ ရက်) ညပိုင်းအချိန်တွင် စစ်ကောင်စီတပ်စခန်းနေပြီး လက်နက်ကြီးဖြင့် ပစ်ခတ်ကာ ထိခိုက်ဒဏ်ရာရသူ မရှိခဲ့သော်လည်း ဒေသခံများအနေဖြင့် မြို့တွင်း တိုက်ပွဲဆက်ဖြစ်လာမည်ကို စိုးရိမ်နေရကြောင်း လားရှိုးမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့ညက လက်နက်ကြီး ပစ်ခတ်သံ ၂ ချက်ကြားလိုက်တယ်။ အသံက အကျယ်ကြီးပဲ။ ဒီချိန်မှာ တစ်ခုခုအသံကြားရင် လူတိုင်းကတော့ ကြောက်နေရတာ။ မြို့ထဲတိုက်ပွဲ ဆက်ဖြစ်လာမှာကိုပဲ စိုးရိမ်ရတယ်” ဟု ၎င်းဒေသခံတစ်ဦးက ပြောသည်။
ထို့အတူ စစ်တပ်လေယာဉ်ကလည်း နေ့တိုင်းနီးပါး ပျံသန်းနေလျက်ရှိသောကြောင့် ဗုံးကြဲချမည်ကို စိတ်ပိုင်းဆိုင်အရ စိုးရိမ်မှု မြင့်တက်ကြသည်။
လက်ရှိတွင် ညီနောင်မဟာမိတ်တပ်ဖွဲ့များသည် သျှမ်းမြောက် နမ့်ဆန်မြို့နှင့် နမ့်ခမ်းမြို့ကို အလုံးစုံ သိမ်းပိုက်ထားနိုင်ပြီဖြစ်သလို မန်တုံမြို့နှင့် ကွတ်ခိုင်မြို့တွင်လည်း စစ်ကောင်စီတပ်နှင့် ထိတွေ့ တိုက်ပွဲ ဖြစ်ပွားနေလျက် ရှိသည်။
ထို့အပြင် နမ္မတူမြို့နယ် နမ့်မိုင်းဆော့ကျေးရွာအတွင်း တအာင်း (ပလောင်) အမျိုးသား လွတ်မြောက်ရေး တပ်မတော် TNLAက ဝင်ရောက်နေရာယူပြီး ကတုတ်ကျင်းများပါ တူးထားနေသည်ဆိုသည့် သတင်းကြောင့် တိုက်ပွဲဖြစ်ပွားလာမည်ကို ဒေသခံများက စိုးရိမ်ပြီး တချို့ထွက်ပြေးတိမ်းရှောင်နေရကြောင်း သိရသည်။
Leave a Comments