သျှမ်းပြည် မူဆယ်ခရိုင် နမ့်ခမ်းမြို့နယ် စစ်ကောင်စီ၏ စခန်းသစ်ကုန်း သိမ်းပိုက်နိုင်ရန် တအာင်း (ပလောင်) အမျိုးသားလွှတ်မြောက်ရေး တပ်မတော် TNLA မှ တစ် လကျော်ကြာ ထိုးစစ်ဆင် တိုက်ခိုက်လာစဉ်အတွင်း တပ်သား ၅၀ နီးပါးကျဆုံးပြီး အများအပြားထိခိုက်ဒဏ်ရရှိကြောင်း ထုတ်ပြန်ထားသည်။
“၁၀၂၇ စစ်ဆင်ရေး” ဖော်ဆောင်နေသည့် ကာလအတွင်း နိုဝင်ဘာလ ၁၇ ရက်မှစ၍ နမ့်ခမ်းမြို့နယ် စစ်ကောင်စီ တပ်စခန်းများကို တအာင်း (ပလောင်)တပ်ဖွဲ့ TNLA မှ ထိုးစစ်ဆင် တိုက်ခိုက်ခဲ့ရာ တစ်ပတ်အကြာ တပ်စခန်းများ၊ ရဲစခန်းများနှင့် ဌာနဆိုင်ရာရုံးများအား အလုံးစုံသိမ်းပိုက်ရရှိခဲ့ကြောင်း ရေးသားဖော်ပြထားသည်။
သို့သော် နမ့်ခမ်းမြို့နယ် စစ်ကောင်စီ၏ စခန်းသစ်ကုန်းကို သိမ်းပိုက်နိုင်ရန်အတွက် စစ်ကောင်စီ၏ ပြင်းပြင်းထန်ထန် ခုခံတန်ပြန်တိုက်ခိုက်မှုကြောင့် အဆိုပါစခန်းကုန်းအား ရက်တိုအတောအတွင်း မှာတင် သိမ်းပိုက်နိုင်ခြင်းမရှိဘဲ ၁ လကျော်ကြာ ဒီဇင်ဘာလ ၁၈ ရက်မှ သိမ်းပိုက်နိုင်ခဲ့သည်။
ထိုစခန်းသိမ်းတိုက်ပွဲကာလအတွင်း တအာင်း (ပလောင်) တပ်ဖွဲ့ TNLA မှ တပ်သား ၄၉ ဦးသေဆုံးပြီး ၁၄၅ ဦး ထိခိုက်ဒဏ်ရာရရှိကာ စစ်ကောင်စီဘက်မှ ဗိုလ်မှူးအဆင့်အပါအဝင် အလောင်းများစွာနှင့် စစ်သုံ့ပန့် ၃ ဦးကို ဖမ်းဆီးရမိကြောင်း ဆိုသည်။
“ မနေ့ (ဒီဇင်ဘာ ၁၉)ရက် မနက် ၆ နာရီလောက်က စခန်းသစ်ကုန်း ကျသွားပြီးနောက်ပိုင်း စစ်ကောင်စီတပ်သားတွေက TNLA တို့နဲ့ ဘယ်လိုနားလည်မှု ယူကြလည်းတော့မသိဘူး။ မူဆယ်ဆေးရုံကို ရောက်လာတာ အများကြီးပဲ “ ဟု မူဆယ်မြို့ဒေသခံတစ်ဦးက သျှမ်းသံတော်ဆင့်ကို ပြောသည်။
အလားတူ ကလေး ၃ ဦးအပါအဝင် ပြည်သူ ၁၃ ဦးသေဆုံးပြီး ၄၃ ဦး ဒဏ်ရာရရှိကာ ဘာသာရေးအဆောက်အဦး၊ ဆေးရုံနှင့် နေအိမ် ၁၀၀ နီးပါး လက်နက်ကြီးထိမှန်၊ မီးလောင် ပျက်စီးသွားခဲ့သည်။
ထို့အပြင် တိုက်ပွဲကာလအတွင်း စစ်ကောင်စီ၏ လက်နက်ခဲယမ်းများ၊ လက်နက်ကြီးများနှင့် စစ်သုံးဆောင်ပစ္စည်းများ ရှင်းလင်းသိမ်းဆည်းရမိကြောင်း ထုတ်ပြန်ချက်၌ ရေးသားဖော်ပြထားသည်။
