သျှမ်းပြည် မူဆယ်ခရိုင်၊ မူဆယ်မြို့နယ်၊ မြောက်ရပ်ကွက်ရှိ နေအိမ် တစ်လုံး သေနတ် ပစ်ခတ် ဓားပြတိုက်ခံရပြီး အိမ်ရှင် အမျိုးသားက ထိခိုက်ဒဏ်ရာများ ရရှိသွားကြောင်း စုံစမ်းသိရသည်။
ယနေ့ ဒီဇင်ဘာလ ၂၀ ရက် နံနက်ပိုင်း ၆ နာရီဝန်းကျင်တွင် မူဆယ်မြို့၊ မြောက်ရပ်ကွက်ရှိ နေအိမ် တစ်လုံးသို့ မျက်နှာဖုံးစွပ်ထားသည့် အမျိုးသား (၆) ဦး ရောက်ရှိလာပြီး သေနတ်ပစ်ခတ် ဓားပြတိုက်မှု ဖြစ်ပွားခဲ့ကြောင်း မူဆယ်မြို့ ဒေသခံတစ်ဦးက သျှမ်းသံတော်ဆင့်ကို ပြောသည်။
“အိမ်ရှင်အမျိုးသမီးက ဆွမ်းဟင်းသွားဝယ်တဲ့အချိန်၊ သူတို့အိမ်အကူက အိမ်ရှေ့ တံမြက်စည်း လှည်းနေတဲ့ အချိန်မှာ ဓားပြတိုက်တဲ့အဖွဲ့က ဝင်လာတာ။ သေနတ် ၅ ချက်လောက် ပစ်သွားတယ်။ အိမ်သားတွေကိုလည်း လက်ပြန်ကြိုးတုတ်ပြီး အခန်းထဲ ထည့်ပိတ်ထားတာ၊ အိမ်ရှင်အမျိုးသားကတော့ သူတို့ပစ်လိုက်လို့ ကွဲသွားတဲ့ မှန်စတွေ ထိမှန်ဒဏ်ရာရထားတယ်” ဟု ဖြစ်စဥ်ကို သိရှိသည့် အမျိုးသား တစ်ဦးက သျှမ်းသံတော်ဆင့်ကို ပြောသည်။
မှန်စ ထိမှန်ဒဏ်ရာရထားသည့် အမျိုးသားသည် လက်ရှိတွင် ဆေးရုံ၌ ဆေးကုသမှု ခံယူနေလျက်ရှိကြောင်းလည်း သိရသည်။
“အိမ်ထဲဝင်ပြီးသူတို့ ရှာတာမတွေ့လို့ ဖုန်းကိုပဲ ယူသွားတယ်၊ ကျန်တာတော့ မယူဘူး။ အိမ်တွင်းပစ္စည်းတွေတော့ ဖျက်ဆီးခံရတာပေါ့” ဟု အထက်ပါ အမျိုးသားက ဆက်ဆိုထားသည်။
ဓားပြတိုက်ခံရသည့် နေအိမ်သည် ကောင်းရောင်းကောင်းဝယ်ဖြင့် စီးပွားရေးလုပ်နေကြ သည့် အရပ်သားများသာ ဖြစ်သည့်အတွက် လက်နက်ကို ရှာမတွေ့ခြင်း ဖြစ်နိုင်ကြောင်း လည်း အထက်ပါ ပုဂ္ဂိုလ်က ဆိုသည်။
မူဆယ်မြို့သည် မြန်မာ – တရုတ် နယ်စပ် ကုန်သွယ်ရေးမြို့ ဖြစ်သည့်အပြင် လက်နက်ကိုင် အဖွဲ့အစည်းများ နှင့် တရားမဝင် လုပ်ငန်းများ စုံလင်ပေါများသည့် ဒေသဖြစ်သည့်အတွက် ပစ်ခတ်မှု၊ ဓားပြတိုက်မှု နှင့် ပြန်ပေးဆွဲမှုများကလည်း မကြာခဏ ဖြစ်ပေါ်လေ့ရှိသည်။
ထို့အပြင် လက်ရှိအချိန်ထိ မဟာမိတ် ပူးပေါင်း တပ်ဖွဲ့ နှင့် အာဏာသိမ်း စစ်ကောင်စီ တို့၏ စစ်ရေးတင်းမာမှုများလည်း ရှိနေသေးသည့်အတွက် ပြည်သူများက စစ်ရေး၊ လုံခြုံရေးအတွက် စိုးရိမ်ကြောက်လန့်နေရကြောင်းလည်း သိရသည်။
Leave a Comments