သျှမ်းပြည် နမ့်ခမ်းမြို့ရှိ စစ်ကောင်စီတပ် စခန်းသစ်ကုန်းကို တအာင်းအမျိုးသား လွတ်မြောက်ရေးတပ်မတော် (TNLA)က သိမ်းပိုက်လိုက်ပြီး နမ့်ခမ်းမြို့ကို အလုံးစုံ ထိန်းချုပ်နိုင်ပြီဖြစ်ကြောင်း စုံစမ်းသိရသည်။
ယနေ့ (ဒီဇင်ဘာလ ၁၉ ရက်) နံနက် ၁ နာရီခွဲဝန်းကျင်တွင် နမ့်ခမ်းမြို့၌ စစ်ကောင်စီတပ်၏ နောက်ဆုံးကျန်ရှိသည့် စခန်းသစ်ကုန်းကို တအာင်း(ပလောင်)တပ်ဖွဲ့ TNLA က အပြီးသတ် ဝင်ရောက်ရှင်းလင်း သိမ်းပိုက်နိုင်ခဲ့ကြောင်း TNLA တပ်ဖွဲ့၏ သတင်းပြန်ကြားရေး တာဝန်ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ဟုတ်ပါတယ်၊ မနေ့က ည ၁:၃၀ နာရီမှာ ကျမတို့ TNLA တပ်ဖွဲ့က ဝင်ရောက်ရှင်းလင်း သိမ်းပိုက်နိုင်ခဲ့တယ်။ နမ့်ခမ်းမြို့ကို TNLA တပ်ဖွဲ့က အလုံးစုံ ထိန်းချုပ်နိုင်ပြီလို့ ပြောလို့ရပါပြီ”ဟု TNLA တပ်ဖွဲ့၏ သတင်းပြန်ကြားရေးတာဝန်ခံ အမျိုးသမီးတစ်ဦးက ပြောသည်။
နမ့်ခမ်းမြို့ရှိ စစ်ကောင်စီတပ် စခန်းသစ်ကုန်းကို TNLA တပ်ဖွဲ့က သိမ်းပိုက်လိုက်ပြီးနောက် လက်နက်ချအညံ့ခံသည့် စစ်သုံ့ပန်းနှင့် သိမ်းဆည်းရမိသည့် လက်နက်များကို အသေးစိတ်မသိရှိရသေးဘဲ နောက်ပိုင်းတွင် သတင်းထုတ်ပြန်မည်ဟု ပြန်လည်ဖြေကြားထားသည်။
နမ့်ခမ်းမြို့တွင် နောက်ဆုံးကျန်ရှိသည့် စခန်းသစ်ကုန်းကို ခုခံနိုင်ရန် စစ်ကောင်စီတပ်သည် တစ်လကျော်အတွင်း လေကြောင်းပစ်ကူဖြင့် အကြိမ်ရေ ၄၀၀ ကျော် ခုခံတိုက်ခိုက်ခဲ့ပြီးနောက် ယနေ့ (ဒီဇင်ဘာလ ၁၉ ရက်)တွင် ညီနောင်မဟာမိတ်တပ်များထံသို့ လက်လွတ်ဆုံးရှုံးလိုက်ရခြင်း ဖြစ်သည်။
Leave a Comments