သျှမ်းပြည် မူဆယ်မြို့ ဟိုမွန်ရပ်ကွက်ရှိ လူနေအိမ်ရပ်ကွက်အတွင်း စစ်ကောင်စီတပ်သားများ ဝင်ရောက်တပ်စွဲနေထိုင်မှု ပြုလုပ်နေသဖြင့် ဒေသခံများ ရွှေ့ပြောင်းနေရကြောင်း စုံစမ်းသိရသည်။
ယမန်နေ့ (ဒီဇင်ဘာလ ၁၇ ရက်) မွန်းလွဲပိုင်းအချိန်တွင် မူဆယ်မြို့ ဟိုမွန်ရပ်ကွက်၊ လေယာဉ်ကွင်းဟောင်းအနီးမှ လူနေအိမ်များအတွင်း အင်အား ၁၅၀ နီးပါးရှိ စစ်ကောင်စီ တပ်သားများက နှစ်နေရာခွဲ၍ လာရောက် တပ်စွဲနေထိုင်သဖြင့် ဒေသခံများ ရွှေ့ပြောင်းနေထိုင်ရကြောင်း မူဆယ်မြို့ဒေသခံ တစ်ဦးက ပြောသည်။
“မနေ့ကတော့ ဒေသခံတွေ ထွက်ဖို့လာပြောတာ။ စစ်ကောင်စီတပ်သား ၈၀ လောက်က တစ်နေရာမှာ နေတယ်။ သူတို့နှစ်နေရာခွဲပြီး နေကြတာ။ အင်အား စုစုပေါင်းက ၁၅၀ နီးပါးလောက်ရှိတယ်။ သူတို့နဲ့ နည်းနည်းဝေးတဲ့သူတွေကိုတော့ အိမ်ပြင်မထွက်ဖို့ ပြောတယ်” ဟု ၎င်းဒေသခံတစ်ဦးက ပြောသည်။
အဆိုပါ လူနေအိမ်အတွင်း စစ်ကောင်စီတပ်သားများ ဝင်ရောက်နေထိုင်သောကြောင့် အိမ်ခြေ ၁၀ ရှိ လူဦးရေ ၂၀ ခန့်က အခြားနေရာသို့ ရွှေ့ပြောင်းနေထိုင်ရကြောင်း သိရသည်။
ယင်းကဲ့သို့ စစ်ကောင်စီတပ်ဖွဲ့မှ ရွှေလီမြစ် (နမ့်မောဝ်း)ကမ်းဘေး ကပ်လျက်ရှိ ဟိုမွန်ရပ်ကွက်ရှိ လူနေအိမ်အတွင်း ဝင်ရောင်တပ်စွဲနေထိုင်မှု ပြလုပ်ရခြင်းသည် မြစ်ကမ်းတလျှောက် ညီနောင်မဟာမိတ်မဟာမိတ်တပ်ဖွဲ့များ စစ်ကြောင်းထိုးစစ်ဆင်လာသည့် သတင်းကြောင့် ဖြစ်နိုင်ကြောင်း ဒေသခံအမျိုးသားတစ်ဦးက သုံးသပ်ပြောဆိုသည်။
“အခုရွှေလီမြစ်အတိုင်း ညီနောင်မဟာမိတ်တပ်ဖွဲ့တွေက ထိုးစစ်ဆင်လာနေတယ်လို့ ကြားတယ်။ ဒါကြောင့်လည်း စစ်ကောင်စီက အခုလို လူနေအိမ်ရပ်ကွက်မှာ ဝင်နေပြီးတော့ နေရယူထားတာ ဖြစ်နိုင်တယ်”ဟု ၎င်းအမျိုးသားတစ်ဦးက ပြောသည်။
အလားတူ ယမန်နေ့ (ဒီဇင်ဘာလ ၁၇ ရက်) မွန်းလွဲပိုင်းအချိန်တွင် မူဆယ်မြို့ရှိ ဘောလုံးကွင်းတွင် စစ်ကောင်စီဘက်မှ ရဟတ်ယာဉ်တစ်စီးဖြင့် ရိက္ခာလာချသွားကြောင်း ဒေသခံများထံမှ သိရသည်။
လက်ရှိ သျှမ်းမြောက်ဒေသ မူဆယ်မြို့နယ် နှင့် နမ့်ခမ်းမြို့နယ်ရှိ စစ်းဘေးတိမ်းရှောင်သည့် ဒေသခံ (၈၀၀၀) ကျော်သည် စားနပ်ရိက္ခာ အရေးပေါ် အကူအညီ လိုအပ်နေသကဲ့သို့ မူဆယ် – နမ့်ခမ်း ကားလမ်းများ ပိတ်ထားခြင်းကြောင့် နမ့်ခမ်းမြို့နယ်ရှိ စစ်းဘေးရှောင်များအတွက် ဆေးဝါး အခက်အခဲ ဖြစ်နေလျက်ရှိကြောင်း သိရှိရသည်။
