သျှမ်းပြည်အတွင်းသို့ “၁၁.၁၁ စစ်ဆင်ရေး”ကြောင့် ထွက်ပြေးလာသည့် စစ်ရှောင်များ၏ နေအိမ်များ ယခုရက်ပိုင်း ဖောက်ထွင်းခံနေရကြောင်း စုံစမ်းသိရသည်။
သျှမ်း-ကရင်နီတကြော “၁၁.၁၁ စစ်ဆင်ရေး”ကြောင့် နိုဝင်ဘာလ ၁၅ ရက်မှထွက်ပြေးလာကြပြီး၊ အိမ်တွင် ကျန်စောင့်နေခဲ့ သူများလည်းရှိပြီး၊ ခိုးဆိုးလုယက်မှုများ စိုးရိမ်နေရသည့်အတွက်ကြောင့် ကရင်နီပြည် သို့ ပစ္စည်းပြန်သယ်ယူ နေသူများရှိနေကြောင်း စစ်ဘေးရှောင်လာသူတစ်ဦးက သျှမ်သံတော်ဆင့်ကို ပြောသည်။
“ပစ္စည်းတွေ ပြန်သယ်ကြတာပေါ့။ရေခဲသတ္တာတွေစောင်တွေအစရှိတာလေးတွေပေါ့။ခုထွက်လာတာလည်း အဝတ်တစ်ထည်ကိုယ်တခုနဲ့ထွက်ခဲ့ကြတယ်လေ။ တချို့တွေကြတော့ အိမ်စောင့်ကျန်တာတွေရှိတယ်။ တချို့တွေက ခိုးဖို့ကို စောင့်နေတာတွေရှိတယ်။မရှိမဲ့ရှိမဲ့လေး နဲ့ဝယ်ထားကြတာလေ။ ”ဟု စစ်ရှောင် အမျိုးသားတစ်ဦးက ပြောသည်။
ကရင်နီတွင် ပိတ်မိသူ၊ အိမ်တွင်စောင့်နေသူများကိုလည်း ပြန်လည်း ခေါ်ဆောင်နေ ကြပြီး စားဝတ်နေရေး အတွက် နှင့် နေထိုင်ခင်း ကျပ်တည်းခြင်းကြောင့် ပစ္စည်းများကို ပြန်လည်း သယ်ဆောင် နေကြောင်း ဒေသခံများကပြောသည်။
ညောင်ရွှေမြို့နယ်၊ လက်ရှိ စစ်ရှောင်ဦးရေမှာ တစ်သောင်းနှစ်ထောင်ခန့် ရှိနေပြီ ဖြစ်သည်။ ထိုစစ်ရှောင်များသည် ဘုရားဆောင်းတန်းများ၊ ဘုန်းကြီးကျောင်းများ နှင့် ဇရပ်များတွင်နေထိုင်ရပြီး စစ်ရှောင်စခန်း တစ်ခုလျှင် လူဦးရေ (၂၀၀) ခန့် စုပေါင်း နေထိုင်ကြကြောင်းသိရသည်။
သျှမ်း-ကရင်နီတကြော “၁၁.၁၁ စစ်ဆင်ရေး”ကြောင့် နိုဝင်ဘာလ ၁၅ ရက်မှထွက်ပြေးလာပြီး၊ လက်ရှိတွင် သျှမ်းပြည် တောင်ပိုင်း ပင်လောင်း၊ ညောင်ရွှေ၊ အင်းလေးနှင့် ဆီဆိုင် ဒေသများတွင် ကရင်နီပြည်မှ အရေးပေါ် တိမ်းရှောင်လာပြီး ဘုန်းကြီးကျောင်းများနှင့် ဆွေမျိုးအိမ်များသို့ လာရောက် စစ်ဘေးရှောင်နေကြပြီး စားဝတ်နေရေး နှင့် အနွေးထည်များ လိုအပ်နေကြောင်း သိရသည်။
