သျှမ်းပြည် မူဆယ်မြို့အတွင်း ပိတ်မိနေသူများနှင့် စစ်ဘေးရှောင်များသည် နေရပ်ပြန်လာစဉ် တိုက်ပွဲကြောင့် စယ်လန့်ကျေးရွာတွင် ပိတ်မိနေကြကြောင်း စုံစမ်းသိရသည်။
ယခုသီတင်းပတ် ၁ ပတ်အတွင်း မူဆယ်မြို့မှ ထွက်ခွာသည့် ပြည်သူများနှင့် စစ်ဘေးရှောင်များသည် တိုက်ပွဲကြောင့် ဖြတ်သန်းသွားလာ၍ မရကာ မူဆယ်-နမ့်ခမ်းလမ်းကြား စယ်လန့်ကျေးရွာတွင် ရာနှင့်ချီရှိသော ယာဉ်များနှင့်အတူ တစ်ပတ်နီးပါးကြာ ပိတ်မိနေကြောင်း စယ်လန့်ဒေသခံတစ်ဦးက ပြောသည်။
“တချို့က မန္တလေး ဆင်းမယ့်သူရှိသလို တချို့ကျတော့လည်း လားရှိုး၊ နမ့်လန် ဘက်ကပြန်မယ့်သူတွေလည်း အများကြီးပဲ။ မူဆယ်မှာရှိတဲ့ စစ်ဘေးရှောင်စခန်းတွေက စစ်ဘေးရှောင်တွေကော ပါတယ်။ စစ်ဘေးရှောင်စခန်းမှာနေတာ ကြာလာတော့ ငွေရေးကြေးရေး အဆင်မပြေဘူးလေ။အခုလို ကားငှားပြီး နေရပ်ပြန်ကြတာ။ ၁၀၅ မိုင်ဘက်ကလည်း သွားလာမရတော့ ဒီဘက်လမ်းကိုလာရတာ ” ဟု ၎င်းဒေသခံတစ်ဦးက ပြောသည်။
အဆိုပါ နေရပ်ပြန်လာကြသူများက ကားခကို မြန်မာ ကျပ်ငွေ ၃ သိန်းမှ ၄ သိန်းအထိ ပေးဆောင်ရကြောင်း သိရသည်။
လက်ရှိတွင် နမ့်ခမ်းမြို့နယ် စစ်ကောင်စီ၏ စခန်းသစ်ကုန်း ပိုက်သိမ်းနိုင်ရန်အတွက် ညီနောင်မဟာမိတ်၃ ဖွဲ့များက အပြင်းအထန် ထိုးဆင်နေပြီး စစ်ကောင်စီဘက်မှ အဆိုပါစခန်းမဆုံးရှုံးရေးအတွက် လေကြောင်းဖြင့် ပစ်ကူနေလျက်ရှိပြီး တစ်လခွဲကျော်ကြာမြင့်သော်လည်း စခန်းသစ်ကုန်းကို ညီနောင်မဟာမိတ်များက သိမ်းပိုက်နိုင်ခြင်း မရှိသေးပေ။
“အထူးသဖြင့်တော့ နမ့်ခမ်းမှာက သူတို့ဂျက်တိုက်လေယာဉ်နဲ့ အများအပြား တိုက်ခိုက်တာရှိတာပေါ့နော်။ အခုဆိုရင် အကြိမ်အရေအတွက် ၄၀၀ ကျော်လောက်ရှိနေပြီ” ဟု တအာင်း(ပလောင်) အမျိုးသားလွတ်မြောက်ရေး တပ်မတော် TNLA ၏ ပြောရေးဆိုခွင့်ရှိသူ အမျိုးသမီးတစ်ဦးက ပြောသည်။
ထို့ကြောင့် တိုက်ပွဲပြင်းထန်နေချိန်အတွင်း မြေပြင်စစ်ရေး အားနည်းသည့် စစ်ကောင်စီတပ်ဖွဲ့သည် လေကြောင်းဖြင့် တစ်နည်းသာ တိုက်ခိုက်လာနိုင်သောကြောင့် မသက်ဆိုင်သည့် လူနေအိမ်၊ ပြည်သူလူထု အပေါ် ဗုံးကြဲမည်ကို စိုးရိမ်နေသည်ဟု လမ်းတစ်ဝက်မှာ ပိတ်မိနေသူတစ်ဦးက ပြောသည်။
“အခုညီနောင်မဟာမိတ်တွေ စိုးမိုးထားတဲ့နယ်မြေတွေဆို ကျနော်တို့မှာ စိုးရိမ်နေရတယ်။ စစ်တပ် လေယာဉ်လာရင် ဘယ်ကိုပစ်မယ်ဆိုတာ ခန့်မှန်းလို့မရဘူး။ များသောအားဖြင့် သူတို့ပစ်လိုက်ရင် လူနေအိမ်ကိုပဲ ထိတာများတယ်။ ညကြီးညမင်းလာရင် ပိုပြီးစိုးရိမ်ရတယ်။ သူတို့က ခန့်မှန်းပြီး ပစ်ချင်သလို ပစ်တာ။ ဒီမှာပြေးလို့မရတဲ့ သက်ကြီးရွယ်အိုတွေလည်းရှိတယ်” ဟု လမ်းတစ်ဝက်မှာ ပိတ်မိနေသူ တစ်ဦးက လုံခြုံရေးအရ စိုးရိမ်ရကြောင်း ပြောသည်။
“ ၁၀၂၇ စစ်ဆင်ရေး” တိုက်ပွဲ တစ်လခွဲကျော်အတွင်း အရပ်သား ၁၂၆ ဦးသေဆုံးပြီး ၂၀၄ ဦး ထိခိုက်ဒဏ်ရာရရှိခဲ့ကာ လူနေအိမ် ၄၀၀ ခန့် ထိခိုက်ပျက်စီးသွားပြီဖြစ်ကြောင်း ကုလသမဂ္ဂ လူသားချင်း စာနာထောက်ထားမှု ပေါင်းစပ်ညှိနှိုင်းရေးရုံး(UNOCHA)က ဒီဇင်ဘာလ ၈ ရက်မှာ ထုတ်ပြန်ထားသည်။
Leave a Comments