သျှမ်းပြည် နမ့်ဆန်မြို့တွင် စစ်ကောင်စီတပ် လေကြောင်းဗုံးကြဲ တိုက်ခိုက်ခြင်းကြောင့် အရပ်သား ၁ ဦး သေဆုံးခဲ့ပြီး နမ့်ဆန်ရဲစခန်းကို TNLA တပ်ဖွဲ့က တိုက်ခိုက်သိမ်းပိုက်လိုက်ကြောင်း စုံစမ်းသိရသည်။
ယနေ့ (ဒီဇင်ဘာလ ၁၂ ရက်) နံနက် ၆ နာရီခန့်မှစ၍ စစ်ကောင်စီတပ်မှ လေကြောင်းဖြင့် နမ့်ဆန်မြို့ပေါ်သို့ ဗုံးကြဲတိုက်ခိုက်ခဲ့ခြင်းကြောင့် နမ့်ဆန်မြို့ လွယ်ခမ်းရွာမှ အသက် ၃၃ နှစ်ခန့် အရွယ်ရှိ မောင်ဟိန်းလတ် ဆိုသူ သေဆုံးခဲ့ကြောင်း နမ့်ဆန်မြို့ဒေသခံများက ပြောသည်။
“ဒီမနက်ကျတော့ ၆ နာရီလောက်ကတည်းက လေယာဉ်ရောက်လာတယ်။ ဟက်စကီးနဲ့ လာပစ်ချသွားတယ်။ လွယ်ခမ်းရွာသား အောင်သစ္စာဆီဆိုင်က ကောင်လေးတစ်ယောက် ဆုံးသွားတယ်။ တခြားလူ ထိခိုက်တာတော့ မကြားဘူး။ မြို့ထဲမှာ အိမ်တွေ ၁၀ လုံးထက်မက ထိတာတော့ ရှိတယ်”ဟု နမ့်ဆန်မြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
လက်ရှိသတင်းရေးသားချိန်အထိ နမ့်ဆန်မြို့တွင် စစ်ကောင်စီတပ်မှ လေကြောင်းအသုံးပြု၍ ၃ ကြိမ်ထက်မနည်း ဗုံးကြဲတိုက်ခိုက်လျက်ရှိပြီး မန်တုံမြို့အခြေစိုက် ခလရ-၁၃၀ တပ်စခန်းမှလည်း လက်နက်ကြီးများဖြင့် နမ့်ဆန်မြို့ဘက်သို့ ဦးတည်ပစ်ခတ်လာကြောင်း နမ့်ဆန်မြို့ဒေသခံများထံမှ သိရသည်။
“မန်တုံကနေ ပစ်လာတာ နမ့်ဆန်ကို လက်နက်ကြီးကျတယ်။ အခုအခြေအနေကတော့ မြို့ထဲမှာ လူတွေ မရှိတော့ဘူးပြောတယ်။ မနေ့မနက်ကစပြီး TNLA တပ်ကကော စစ်ကောင်စီတပ်ကကော အကြီးအကျယ် ပစ်ကြတယ်။ တစ်မြို့လုံးလည်း TNLA က စိုးမိုးထားပြီ။ လက်နက်ကြီးသံက အခုထိ ကြားရတုန်းပဲ”ဟု နမ့်ဆန်မြို့မှ ၎င်းဒေသခံက သျှမ်းသံတော်ဆင့်ကို ဆက်ပြောသည်။
နမ့်ဆန်မြို့နယ်ရှိ စစ်ကောင်စီတပ်၏ ကဒိုင်းဖူးတောင်စခန်း၊ ကောင်းမူးဆိုင်စခန်းနှင့် နမ့်ဆန်ရဲစခန်းတို့အပြင် မန်တုံမြို့နယ်ရှိ မန်နား(ခိုမုန်း)တပ်စခန်းတို့ကို တိုက်ခိုက်သိမ်းပိုက်နိုင်ခဲ့ကြောင်း တအာင်း(ပလောင်)တပ်ဖွဲ့ TNLA ၏ သတင်းနှင့်ပြန်ကြားရေးဌာနက ဒီဇင်ဘာလ ၁၁ ရက်တွင် ထုတ်ပြန်ထားသည်။
ထို့အပြင် နမ့်ဆန်မြို့နယ်အတွင်းရှိ ပြည်သူများအား စစ်ကောင်စီ၏ ပစ်မှတ်ထားတိုက်ခိုက်မှုမှ ကင်းဝေးရန် လုံခြုံသည့်နေရာသို့ ပြောင်းရွှေ့ပြီး အစာခြောက်နှင့် ဆေးဝါးများကို စုဆောင်းထားရန် တအာင်း(ပလောင်)အမျိုးသားပါတီမှ နမ့်ဆန်မြို့နယ် လွှတ်တော်ကိုယ်စားလှယ် ၂ ဦးတို့က သတိပေးနှိုးဆော်ထားသည်။
“စစ်ရှောင်တာကတော့ တကွဲတပြားစီ ရှောင်နေကြတယ်၊ မြို့ပြင်ကို ထွက်တာပေါ့၊ တချို့တွေလည်း ဆိုင်ကယ်နဲ့ အဆင်ပြေမယ်ထင်တဲ့ နေရာကို သွားကြတယ်။ တချို့က လားရှိုးလမ်း၊ တချို့က သီပေါလမ်း၊ တချို့လဲ မန္တလေးလမ်း အဲ့လိုသွားကြတယ်။ ကိုယ်နဲ့နီးစပ်ရာ မြို့ကိုသွားကြတာ၊ အခုက ဖုန်းလိုင်းလည်းမရ အင်တာနက်လည်း ပြတ်နေတယ်”ဟု နမ့်ဆန်မြို့မှ စစ်ဘေးရှောင်နေသူများ၏ အခြေအနေကို ၎င်းဒေခံအမျိုးသမီးက ဆက်ပြောသည်။
“၁၀၂၇ စစ်ဆင်ရေး” တစ်လကျော်ကာလအတွင်း နမ့်ဆန်မြို့နယ်တွင် စစ်ကောင်စီ၏ လက်နက်ကြီးနှင့် လေကြောင်းဗုံးကြဲမှုကြောင့် ကလေး ၃ ဦး အပါအဝင် စုစုပေါင်း ၄ ဦး သေဆုံးပြီး ၁၅ ဦးထက်မနည်း ထိခိုက်ဒဏ်ရာရရှိခဲ့ကြောင်း နမ့်ဆန်မြို့ ဒေသခံများထံမှ သိရသည်။
