သျှမ်းပြည် လားရှိုးမြို့သို့ ရောက်ရှိလာသည့် အာဏာသိမ်းစစ်ခေါင်းဆောင် မင်းအောင်လှိုင်က စစ်ဘေးရှောင်များ အမြန်ဆုံးနေရပ်ပြန်နိုင်ရန် ကြိုးပမ်းသွားမည်ဖြစ်ကြောင်း စစ်ကောင်စီလက်အောက်ခံ မြန်မာ့အလင်း သတင်းစာက ယနေ့ (ဒီဇင်ဘာ ၁၁ ရက်) တွင် သတင်းထုတ်ပြန်သည်။
“၁၀၂၇ စစ်ဆင်ရေး” တစ်လကျော်အကြာ ဆင်နွှဲပြီးနောက်ပိုင်း ယမန်နေ့ (ဒီဇင်ဘာလ ၁၀ ရက်) နေ့လယ်ပိုင်းအချိန်က စစ်ကောင်စီခေါင်းဆောင် မင်းအောင်လှိုင်သည် အပေါင်းအပါများနှင့်တကွ လားရှိုးမြို့သို့ ရောက်ရှိလာပြီး မန်ဆူသျှမ်းကျောင်းရှိ စစ်ဘေးရှောင်များအတွက် အလှူငွေ ကျပ်သိန်း ၅၀၀၀ ၊ အဝတ်အထည်နှင့် ဆန်တို့ကို လှူဒါန်းခဲ့ကာ စစ်ဘေးရှောင်များနှင့် တွေ့ဆုံစဉ် အမြန်ဆုံး နေရပ်ပြန်နိုင်ပြီး နယ်မြေတည်ငြိမ်အေးချမ်းမှု ရရှိအောင် လုပ်ဆောင်ပေးသွားမည်ဟု ပြောဆိုခဲ့ကြောင်း သတင်းထုတ်ပြန်ချက်ထဲတွင် ရေးသားထားသည်။
ထို့အပြင် လားရှိုးစစ်ဆေးရုံရှိ “၁၀၂၇ စစ်ဆင်ရေး”အတွင်း ထိခိုက်ဒဏ်ရာရစစ်သား၊ ရဲတပ်ဖွဲ့ဝင်များနှင့်လည်း တွေ့ဆုံခဲ့ပြီး အားပေးစကားပြောကြားခဲ့သည်ဟု သတင်းဖော်ပြထားသည်။
ယခုကဲ့သို့ စစ်ကောင်စီခေါင်းဆောင် မင်းအောင်လှိုင်က “၁၀၂၇ စစ်ဆင်ရေး” တစ်လကျော်အကြာတွင် လားရှိုးမြို့သို့ ရောက်ရှိလာခြင်းသည် ၎င်း၏ နိုင်ငံခြားရေးဝန်ကြီးက တရုတ်နိုင်ငံအနေဖြင့် မြန်မာပြည်တွင်း ငြိမ်းချမ်းရေးနှင့် တည်ငြိမ်မှုရရှိဖို့ ထောက်ခံကူညီပေးရန် တောင်းဆိုခဲ့ခြင်းနှင့်လည်း တိုက်ဆိုင်နေသည်။
အလားတူ ယခုဖြစ်ပွားနေသည့် တိုက်ပွဲဖိအားများ လျှော့ချနိုင်ရန် မြန်မာနိုင်ငံအတွင်း စစ်ရေးပဋိပက္ခနယ်မြေများတွင် ဖော်ဆောင်မည့် တရုတ်-မြန်မာ စီးပွားရေးစင်္ကြံနှင့် ပိုးလမ်းမစီမံကိန်းတို့ကို စစ်ကောင်စီက ရှေ့တန်းတင်လာသည်။
အခြားတစ်ဖက်တွင် စစ်ကောင်စီနှင့် ညီနောင်မဟာမိတ် ၃ ဖွဲ့တို့သည် တရုတ်နိုင်ငံ၏ ကြားဝင်စေ့စပ်ပေးမှုအရ ဒီဇင်ဘာလ ဒုတိယပတ်က ကူမင်းမြို့တွင် တွေ့ဆုံဆွေးနွေးခဲ့သည်ဟု စုံစမ်းသိရပြီး သျှမ်းသံတော်ဆင့်အနေဖြင့် ညီနောင်မဟာမိတ်များထံ ဆက်သွယ်မေးမြန်းသော်လည်း သီးခြားအတည်ပြုချက် မရရှိသေးပေ။
စစ်ကောင်စီတပ်သည် သျှမ်းမြောက်ရှိ ၎င်း၏တပ်စခန်း ၂၂၀ ကျော်နှင့် ပန်ဆိုင်း(ကြူကုတ်)၊ မုံးကိုး၊ ဖောင်းဆိုင်၊ ကွမ်းလုံ၊ သိန္နီ၊ နမ့်ခမ်းနှင့် ချင်းရွှေဟော်မြို့တို့ကို “၁၀၂၇ စစ်ဆင်ရေး” တစ်လကျော်အတွင်း ညီနောင်မဟာမိတ်တပ်များထံ လက်လွှတ်ဆုံးရှုံးခဲ့ရသည်။
လက်ရှိအချိန်တွင် နှစ်ဖက်ထိတွေ့တိုက်ပွဲများ နေ့စဉ်ပြင်းထန်လျက်ရှိကာ လားရှိုး၊ မူဆယ်နှင့် လောက်ကိုင်မြို့များသည် ညီနောင်မဟာမိတ်တပ်များ၏ ဝိုင်းရံပိတ်ဆို့ခြင်း ခံနေရပြီး တရုတ်-မြန်မာ နယ်စပ်ရှိ နမ့်ခမ်းမြို့အခြေစိုက် စစ်ကောင်စီတပ် စခန်းသစ်ကုန်းကို TNLA တပ်ဖွဲ့က တစ်လကျော်ကြာ ထိုးစစ်ဆင်တိုက်ခိုက်နေပြီး နှစ်ဘက်တိုက်ပွဲ ပြင်းထန်လျက်ရှိကြောင်း ဒေသခံများထံမှ သိရသည်။
Leave a Comments