မူဆယ်ရက်ရှည်လျှပ်စစ်ပြတ်တောက် ရွှေလီမြစ်ထဲသို့ ရေဆင်းချိုးကျသူများ ရေနစ်သေဆုံး

မြန်မာ-တရုတ် နယ်စပ်ဒေသ မူဆယ်မြို့တွင် ရက်ရှည်လျှပ်စစ်မီးပြတ်တောက်မှုကြောင့် ဒေသခံများ ရွှေလီမြစ်(နမ့်မောဝ်း)ထဲသို့ ရေဆင်းချိုးနေကြစဉ် ရေနစ်သေဆုံးမှုများ ဖြစ်ပေါ်နေကြောင်း လူမှုကူညီရေးအသင်းထံမှ သိရသည်။

ယခု သီတင်းပတ် ၁ ပတ်အတွင်း မူဆယ်မြို့တွင် ရက်ရှည်လျှပ်စစ်မီး ပြတ်တောက်မှုကြောင့် ရေများပြတ်လပ်သဖြင့် ဒေသခံများသည် ရွှေလီမြစ်ထဲသို့ ရေဆင်းချိုးရသည့်အဆင့်ထိ ဖြစ်ခဲ့ပြီး အဆိုပါ မြစ်ထဲသို့ ရေဆင်းကြသူ ၃ ဦး ရေနစ်သေဆုံးသွားခဲ့ကြောင်း မူဆယ်မြို့ ဒေသခံတစ်ဦးက ပြောသည်။

“ အခုမူဆယ်မှာ မီးမလာ၊ ရေမရှိတော့ ရွှေလီမြစ်ထဲကို ရေဆင်းချိုးတဲ့ လူတွေအများကြီးရှိတယ်။ အဲ့လို ရေဆင်းချိုးကြတဲ့လူတွေ သုံးရက်ဆက်တိုက် ၃ ယောက် ဆုံးသွားပြီ “ ဟု ၎င်းဒေသခံတစ်ဦးက ပြောသည်။

ရေနစ်သေဆုံးသူများမှာ အသက် ၁၈ နှစ်အောက် ကလေးများ ဖြစ်ကြသည်။ ထို့ကြောင့် လူငယ်များအနေဖြင့် ရွှေလီမြစ်ထဲသို့ ရေဆင်းချိုးခြင်း မပြုလုပ်ကြရန် တိုက်တွန်းလိုပါသည်။

ယခင်တွင် ရွှေလီမြစ်ကမ်းတလျှောက်၌ သဲထုတ်ယူမှု လုပ်ငန်းများ လုပ်ကိုင်ခဲ့သောကြောင့် လက်ရှိ မြစ်ရေအောက်၌ သဲဝဲကျင်း ပုံသဏာန် ကျန်ရစ်နေပြီး ရေဆင်းချိုးကြသူများသည် ရေဝဲစုပ်ခံ နေရကြောင်း ဒေသခံတစ်ဦးက ဆက်ပြောသည်။

“ အရင်က မြစ်ကမ်းတလျှောက်မှာ သဲတွေစုတ်ထုတ်တာရှိတယ်။ သဲထုတ်လုပ်ငန်းတွေ ရှိတယ်။ အဲ့မှာ သူတို့သဲတွေ ထုတ်ယူပြီးနောက်ပိုင်း သဲဝဲကျင်းတွေ ရှိတယ်။ အဲ့ဒါကို ရေတိမ်တယ်ဆိုပြီး ကူးကြ၊ ချိုးကြတော့ ဝဲစုပ်တာခံရတာလေ။ ဖြစ်နိုင်ရင်တော့ မြစ်ထဲမှာ ဆင်းမချိုးဘဲ ရေခွက်နဲ့ ခပ်ချိုးရင်ကြဖို့ ပြောချင်ပါတယ် “ ဟု ၎င်းဒေသခံတစ်ဦးက တိုက်တွန်းထားသည်။

ထို့အပြင် မူဆယ်မြို့ရှိ ရွှေလီမြစ်တွင် လူငယ်များ အုပ်စုဖွဲ့၍ ရေဆင်းကူး၊ ပျော်ပါးကြသဖြင့် ရေနစ်မှုများ၊ သေဆုံးမှုများ နှစ်စဉ်နှစ်တိုင်း ဖြစ်ပွားနေကြောင်း ဒေသခံများထံမှ သိရသည်။