သျှမ်းပြည် မူဆယ်ခရိုင် နမ့်ခမ်းမြို့နယ်ရှိ စစ်ကောင်စီ စခန်း ၁ ကုန်းအား သိမ်းပိုင်နိုင်ရေးအတွက် လက်ရှိအချိန် ညီနောင်မဟာမိတ်သုံးဖော်နှင့် စစ်ကောင်စီတပ်တို့ တိုက်ပွဲဆက်လက် ပြင်းထန်နေကြောင်း စုံစမ်းသိရသည်။
ယမန်နေ့ (ဒီဇင်ဘာလ ၇ ရက်) ညပိုင်းအချိန်ထိ နမ့်ခမ်းမြို့နယ်တွင် စစ်ကောင်စီတပ်နှင့် ညီနောင်မဟာမိတ်တို့ ထိတွေ့တိုက်ပွဲဖြစ်ပွားပြီး စစ်ကောင်စီဘက်မှ လေယာဉ်ဖြင့် ဗုံးကြဲတိုက်ခိုက်မှုများ ထပ်မံပြုလုပ်ခဲ့ကြောင်း နမ့်ခမ်းမြို့ဒေသခံတစ်ဦးက သျှမ်သံတော်ဆင့်ကို ပြောသည်။
“မနေ့ညထိတော့ ပစ်ခတ်သံတွေ ကြားနေရသေးတယ်။ လက်နက်သံပစ်ခတ်တွေကော ကြားရတယ်။ ဟိုနားကျေးရွာဘက်မှာဆို လေယာဉ်နဲ့ ထပ်ပြီးဗုံးလာကြဲတယ် ” ဟု နမ့်ခမ်းမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။
အဆိုပါ တိုက်ပွဲနှင့် ပတ်သက်၍ စစ်ကောင်စီရဲ့ သတင်းထုတ်ပြန်ရေး အဖွဲ့ခေါင်းဆောင် ဇော်မင်းထွန်းကလည်း နမ်းခမ်းမှာ ထိတွေ့တိုက်ပွဲအနည်းငယ်ရှိကြောင်း သတင်းထုတ်ပြန်ထားသည်။
အလားတူ (ဒီဇင်ဘာလ ၇ ရက်) ညပိုင်းအချိန်တွင် နမ့်ခမ်းမြို့နယ် ရွှေလီကြိုးတံတားအနီး အပါအဝင် ပန်ခါးရွာ၊ ပန်ကူရွာနှင့် ဟိုနားရွာ စသည့် ကျေးရွာ ၅ ရွာကို စစ်ကောင်စီဘက်မှ တိုက်လေယာဉ် သုံးစင်းဖြင့် ၅ ကြိမ်ထက်မနည်း ဗုံးကြဲတိုက်ခိုက်ခဲ့သေးကြောင်း မြေပြင်စစ်ရေး သတင်းရင်းမြစ်တစ်ဦးက သတင်းအချက်အလက်ပေးပို့သည်။
ထို့အပြင် နမ့်ခမ်းမြို့နယ် စစ်ကောင်စီ၏ စခန်း ၁ ကုန်းအား “ ၁၀၂၇ စစ်ဆင်ရေး” စတင်ချိန်မှ ညီနောင်မဟာမိတ်သုံးဖော်တို့ ထိုးစစ်ဆင် တိုက်ခိုက်လာရာ ၁ လကျော် ကြာမြင့်ခဲ့သော်လည်း လက်ရှိအချိန်ထိ သိမ်းပိုက်နိုင်ခြင်း မရှိသေးပေ။
“ ဒီအခြေအနေကတော့ ကျမတို့ စောင့်ကြည့်နေတဲ့ အနေအထားမှာ ရှိတယ်။ အခုထိချိန်ထိတော့ စခန်း ၁ ကုန်းကို မသိမ်းပိုက်နိုင်သေးဘူး။ စစ်ကောင်စီတပ်သားတွေလည်း ရှိအုန်းမယ်ထင်တယ်” ဟု တအာင်း (ပလောင်) အမျိုးသားလွတ်မြောက်ရေး တပ်မတော် TNLA ရဲ့ ပြန်ကြားရေးတာဝန်ခံတစ်ဦးက အတည်ပြုသည်။
တိုက်ပွဲကြောင့် နမ့်ခမ်းမြို့နယ် စစ်ဘေးရှောင် (၅,၁၀၀) ကျော်လည်း ဘေးလွတ်ရာ ထွက်ပြေးတိမ်းရှောင်နေရကြောင်း သိရသည်။
