သျှမ်းပြည် ကျောက်မဲမြို့နယ် မိုင်းလုံမြို့အနီးရှိ စစ်ကောင်စီ၏ လယ်ကြီးတပ်စခန်းကို TNLA နှင့် မိုးကုတ်-PDF ပူးပေါင်းတပ်ဖွဲ့တို့က တိုက်ခိုက်သိမ်းပိုက်နိုင်ခဲ့ကြောင်း သတင်းသိရသည်။

ယမန်နေ့ (ဒီဇင်ဘာလ ၇ ရက်) နံနက် ၅ နာရီခွဲခန့်မှ စတင်ပြီး မိုးကုတ်မြို့နှင့် မိုင်းလုံမြို့အကြားရှိ စစ်ကောင်စီ လယ်ကြီးတပ်စခန်းကို TNLA နှင့် မိုးကုတ်-PDF ပူးပေါင်းတပ်ဖွဲ့တို့က ဝင်ရောက်တိုက်ခိုက်ခဲ့ပြီး တိုက်ပွဲပြင်းထန်ခဲ့ကြောင်း မိုင်းလုံမြို့ဒေသခံများက ပြောသည်။

“မနေ့ကတော့ လယ်ကြီးရွာနားက ကြိုးတံတားနားမှာ တိုက်ပွဲဖြစ်တာ။ မိုးကုတ်နဲ့ မိုင်းလုံကြား ပြင်ဦးလွင်သွားတဲ့ဘက်မှာ ဖြစ်တာလို့ ပြောရမှာပေါ့။ လယ်ကြီးဘက်ကိုလဲ တိုက်လေယာဉ်နဲ့ ၂ ခါ ဗုံးလာကြဲတယ်။ မနက် ၅ နာရီခွဲကျော်လောက်ကနေ ၁၀ နာရီကျော်အထိ တိုက်ပွဲဖြစ်တယ်။ ”ဟု မိုင်းလုံမြို့ဒေသခံ အမျိုးသားတစ်ဦးက သျှမ်းသံတောင်ဆင့်ကို ပြောသည်။

မိုင်းလုံမြို့အနီးရှိ စစ်ကောင်စီတပ်များကို TNLA နှင့် မိုးကုတ်-PDF ပူးပေါင်းတပ်ဖွဲ့တို့က ပြီးခဲ့သည့် ဒီဇင်ဘာလ ၅ ရက်နေ့တွင် စတင်တိုက်ခိုက်ခဲ့ပြီး မိုင်းလုံတပ်စခန်းကို ဒီဇင်ဘာ ၅ ရက် ညပိုင်းတွင်လည်းကောင်း၊ လယ်ကြီးတပ်စခန်းကို ဒီဇင်ဘာ ၇ ရက်တွင်လည်းကောင်း တိုက်ခိုက်သိမ်းပိုက်နိုင်ခဲ့ကြောင်း TNLA တပ်ဖွဲ့၏ သတင်းနှင့်ပြန်ကြားရေးက ထုတ်ပြန်ထားသည်။

“မိုင်းလုံက ပြီးခဲ့တဲ့ ၆ ရက်နေ့က စစ်ကောင်စီရဲ့ တပ်စခန်းကို သိမ်းပိုက်နိုင်တယ်။ ပြီးတော့ အဲ့မှာရှိတဲ့ သူတို့ရဲ့ လက်နက်ကြီး အပါအဝင် စစ်လက်နက် အသုံးအဆောင်တွေလည်း သိမ်းဆည်းရမိခဲ့တယ်”ဟု TNLA တပ်ဖွဲ့၏ သတင်းနှင့်ပြန်ကြားရေး တာဝန်ခံတစ်ဦးက သျှမ်းသံတော်ဆင့်ကို ပြောသည်။

မိုင်းလုံမြို့အနီးတွင် စစ်ကောင်စီတပ်နှင့် TNLA ၊ မိုးကုတ်-PDF ပူးပေါင်းတပ်ဖွဲ့တို့၏ တိုက်ပွဲများကြောင့် ဒေသခံ ၅၀၀ ကျော်မှာ နီးစပ်ရာဆွေမျိုးများနှင့် ဘုန်းကြီးကျောင်းတို့တွင် ထွက်ပြေးတိမ်းရှောင်နေရပြီး စားနပ်ရိက္ခာ လိုအပ်နေကြောင်း မိုင်းလုံမြို့ဒေသခံများက ပြောသည်။

“မိုင်းလုံမြို့ပေါ်မှာတော့ အိမ်စောင့်ပဲကျန်ခဲ့ပြီး တော်တော်များများ ထွက်ပြေးကုန်ကြပြီ။ အရင်ရက်က တပ်နဲ့နီးတဲ့ အထက်ရပ်ဘက်မှာ ထိခိုက်မှုများတယ်”ဟု မိုင်းလုံမြို့မှ ၎င်း‌ဒေသခံက သျှမ်းသံတော်ဆင့်ကို ဆက်ပြောသည်။

ပြီးခဲ့သည့် ဒီဇင်ဘာလ ၅ ရက်က သျှမ်း-မန္တလေးနယ်စပ်ရှိ မိုင်းလုံမြို့တွင် စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် အမျိုးသမီး ၁ ဦး ပွဲချင်းပြီး သေဆုံး၍ ကလေး ၃ ဦးနှင့် မသန်စွမ်း ၁ ဦးအပါအဝင် စုစုပေါင်း ၁၀ ဦး ထိခိုက်ဒဏ်ရာရရှိကာ နေအိမ် ၅ လုံး မီးလောင်ပျက်စီးခဲ့ကြောင်း မိုင်းလုံမြို့ဒေသခံများထံမှ သိရသည်။