သျှမ်းပြည် နမ့်ခမ်းမြို့နယ်တွင် စစ်ကောင်စီတပ် လေကြောင်းဗုံးကြဲမှုကြောင့် ကလေး ၂ ဦး အပါအဝင်အရပ်သား ၅ ဦးထိမှန်သေဆုံးခဲ့ကြောင်း စုံစမ်းသိရသည်။
ယနေ့ (ဒီဇင်ဘာလ ၇ ရက်) နံနက် ၁ နာရီဝန်းကျင်တွင် စစ်ကောင်စီတပ်မှ လေကြောင်းအသုံးပြု၍ နမ့်ခမ်းမြို့နယ် ကောင်းကတ်ကျေးရွာအုပ်စု၊ ဟိုနားကျေးရွာသို့ ဗုံးကြဲတိုက်ခိုက်ခဲ့ရာ ကလေး ၂ ဦးအပါအဝင် ၅ ဦးသေဆုံးခဲ့ကြောင်း နမ့်ခမ်းမြို့နယ် ဒေသခံများက ပြောသည်။
“မနက် ၁ နာရီလောက်ထင်တယ်၊ တောင်ပေါ် ဟိုနားရွာက တစ်အိမ်ထဲနေတဲ့ ကလေး ၂ ယောက်နဲ့ လူကြီး ၃ ယောက်ဆုံးသွားတယ်လို့ ပြောတယ်။ လူသေဆုံးတာက လက်နက်ကြီးကြောင့်လား လေယာဉ်ပေါ်ကကြဲချတဲ့ ဗုံးကြောင့်လား သေချာမသိရသေးဘူး။ နမ့်ခမ်းမြို့တောင်ဘက်က တောင်ကြောတွေပေါ်ကို စစ်ကောင်စီတပ်က အခုရက်ပိုင်းမှာ တိုက်လေယာဉ်နဲ့ ခပ်စိပ်စိပ် ဗုံးလာကြဲနေတယ်”ဟု နမ့်ခမ်းမြို့နယ်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် နမ့်ခမ်းမြို့နယ် မန်ကတ်၊ ပန်လော်ကျေးရွာများတွင်လည်း ညသန်းခေါင်တွင် လေယာဉ်ဖြင့် ဗုံးကြဲမှုကြောင့် ပြည်သူနေအိမ် ၁၀ လုံးထက်မနည်း ထိခိုက်ပျက်စီးခဲ့ကြောင်း နမ့်ခမ်းမြို့မှ ၎င်းဒေသခံက ဆက်ပြောသည်။
အလားတူ ဒီဇင်ဘာလ ၁ ရက် ည ၉ နာရီကျော်တွင် စစ်ကောင်စီမှ ဂျက်ဖိုက်တာလေယာဉ်ဖြင့် ဗုံးကြဲတိုက်ခိုက်ခဲ့သဖြင့် နမ့်ခမ်းမြို့နယ် နောင်စန့်၊ ဟိုကတ်၊ ကောင်းနောင်မိုရပ်ကွက်တို့တွင် ကျရောက်ပေါက်ကွဲခဲ့ကာ အမျိုးသား ၁ ဦးထိခိုက်သေဆုံးပြီး အရပ်သား ၅ ဦးထက်မနည်း ထိခိုက်ဒဏ်ရာရရှိခဲ့ကြောင်း နမ့်ခမ်းမြို့ဒေသခံများထံမှ သိရသည်။
နမ့်ခမ်းမြို့နယ်အခြေစိုက် စစ်ကောင်စီတပ် စခန်းသစ်ကုန်းကို သိမ်းပိုက်နိုင်ရန် TNLA တပ်ဖွဲ့မှ ထပ်မံထိုးစစ်ဆင်လျက်ရှိရာ ယမန်နေ့ (ဒီဇင်ဘာလ ၆ ရက်)တွင် ဖြစ်ပွားခဲ့သော တိုက်ပွဲအတွင်း စစ်ကောင်စီလက်အောင်ခံ မန်တပ်နှင့် နမ့်ဖတ်ကာ တပ်စခန်းတို့မှ လက်နက်ကြီးဖြင့် ပစ်ခတ်ခဲ့ပြီး ဂျက်ဖိုက်တာဖြင့် ၂၁ ကြိမ် လာရောက်ပစ်ကူခဲ့ကြောင်း TNLA တပ်ဖွဲ့၏ သတင်းနှင့်ပြန်ကြားရေးဌာနမှ သတင်းထုတ်ပြန်ထားသည်။
“ဒီမနက် ၄ နာရီလောက်တုန်းက စစ်ကောင်စီတပ်က လေယာဉ်နဲ့တစ်ခါ ဗုံးထပ်လာကြဲတယ်။ ဒီနေ့တော့ မိုးရွာနေတယ်။ မနေ့တုန်းကလဲ လေယာဉ်နဲ့ တစ်နေကုန် ဗုံးလာကြဲတယ်၊ လက်နက်ကြီးနဲ့လဲ တစ်နေကုန်ပစ်တယ်။ ဖုန်းလိုင်းလဲ ပြတ်နေတော့ အဲ့ဘက်ရွာကို ဆက်သွယ်လို့မရသေးဘူးဖြစ်နေတာ။ ဖုန်းလိုင်းကလဲ ရတချက် မရတချက် အဲ့လိုဖြစ်နေတယ်”ဟု နမ့်ခမ်းမြို့နယ်မှ ၎င်းဒေသခံတစ်ဦးက သျှမ်းသံတော်ဆင့်ကို ဆက်ပြောသည်။
စစ်ကောင်စီတပ်သည် “၁၀၂၇ စစ်ဆင်ရေး”အတွင်း တပ်စခန်း ၂၀၀ ကျော် လက်လွှတ်ဆုံးရှုံးထားရခြင်းကြောင့် ညအချိန်များတွင် ပြည်သူနေထိုင်ရာ ကျေးရွာများသို့ လေကြောင်းအားကိုးဖြင့် ဗုံးကြဲတိုက်ခိုက်မှုများ ပိုမိုလုပ်ဆောင်လာနေသည်။
ထို့အပြင် အရပ်ဘက် အဆောက်အဦများမှနေ၍ ရန်သူမှ ပစ်ခတ်တိုက်ခိုက်လာပါက စစ်ဘက်ဆိုင်ရာ အဆောက်အဦအဖြစ် သတ်မှတ်ပြီး ပြန်လည်တိုက်ခိုက်သွားမည်ဟု စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ဒီဇင်ဘာလ ၂ ရက်တွင် ပြောကြားထားသည်။
“၁၀၂၇ စစ်ဆင်ရေး” တစ်လကျော်ကာလအတွင်း နမ့်ခမ်းမြို့နယ်တွင် စစ်ကောင်စီတပ်၏ လက်နက်ကြီးနှင့် လေကြောင်းဗုံးကြဲမှုကြောင့် အမျိုးသမီး ၄ ဦးနှင့် ကလေး ၅ ဦးအပါအဝင် စုစုပေါင်း ၁၅ ဦး သေဆုံးပြီး ၂၀ ဦးထက်မနည်း ထိခိုက်ဒဏ်ရာရရှိခဲ့ကြောင်း နမ့်ခမ်းမြို့ဒေသခံများထံမှ သိရသည်။
Leave a Comments