သျှမ်းမြောက်ဒေသ တိုက်ပွဲအတွင်း ပိတ်မိနေကြသည့် ပြည်သူများသည် အရေးပေါ် ကူညီမှုမရသဖြင့် မလိုအပ်ဘဲ သေဆုံးနေရကြောင်း ဒေသအတွင်း လူမှုကူညီရေးအသင်းများထံမှ စုံစမ်း သိရသည်။

အောက်တိုဘာလ ၂၇ ရက်မှ စတင်သည့် “ ၁၀၂၇ စစ်ဆင်ရေး “ တိုက်ပွဲကြောင့် လမ်းကြောင်းပိတ်ဆို့ခြင်း၊ လွတ်လပ်စွာဖြတ်သန်းသွားခွင့် မရခြင်း၊ တိုက်ပွဲဖြစ်ပွားခြင်း စသည်ဖြင့်ကြောင့် တိုက်ပွဲကြားမှ ထိခိုက်ဒဏ်ရ ပြည်သူများကို အရေးပေါ်သွားရောက် ကူညီ၍ မရသည့်အချိန်တွင် မလိုအပ်ဘဲ သေဆုံးရကြောင်း မူဆယ်မြို့နယ်အတွင်း လှုပ်ရှားနေသည့် လူမှုကူညီရေးအသင်းမှ တာဝန်ခံတစ်ဦးက ပြောသည်။

“ အခုနောက်ပိုင်းမှာ အရင်လိုမဟုတ်တော့ဘူး။ ကျနော်တို့ ဒေသမှာ ပေးမသွားတာရှိတယ်။ အဲ့မှာ ကျနော်တို့ အခက်ခဲတွေ အများကြီးရှိတယ်။ ဂိတ်တွေက မလွှတ်ဘူး။ ကျနော်တို့က ကယ်တင်ချင်ပေမယ့်လည်း၊ အားလုံးအဖွဲ့က သွားချင်ပေမယ့်လည်း ဒီကပေးမသွားတဲ့အခါမှာ ခက်ခဲမှုတွေ အများကြီးရှိတယ်။ မလိုအပ်ဘဲ ပြည်သူတွေအများကြီး သေဆုံးရတယ်။ ခြေထောက်ထိရုံနဲ့ သွေးထွက်လွန်ပြီး သေတာမျိုးတို့၊ လက်ထိပြီး သေတာမျိုးတို့ရှိတယ်။ ပြီးခဲ့တဲ့ တစ်လမှာ ၁၀ ကျော်ရှိနေပြီ “ ဟု ၎င်းတာဝန်ခံတစ်ဦးက ပြောသည်။

ယင်းသေဆုံးမှု ဦးရေသည် မူဆယ်မြို့နယ်အတွင်းသာ ဖြစ်ပြီး လက်လှမ်းမှီသလောက်သာ သိရှိထားသဖြင့် အဆိုပါဦးရေထက်သေဆုံးမှု များနိုင်ကြောင်း ၎င်းကဆက်ပြောသည်။

အလားတူ ကျောက်မဲမြို့နယ်အတွင်း လှုပ်ရှားနေသည့် လူမှုကူညီရေး ပရဟိတအသင်းကလည်း ဖုန်းလိုင်း၊ အင်တာနက်လိုင်း ပြတ်တောက်မှုကြောင့် ပြည်သူများနှင့် ပရဟိအသင်းများကြား အချင်းချင်းဆက်သွယ်ရန် ခက်ခဲခြင်း၊ ဒေသအတွင်း အာဏာပိုင်များနှင့် ချိတ်ဆက်ရန် ခက်ခဲခြင်း စသည့်ဖြင့် အခက်ခဲများ ကြုံတွေ့နေရကြောင်း တာဝန်ခံတစ်ဦးက ပြောသည်။

“ အခုနောက်ပိုင်း လိုင်းဖုန်းက အဆင်မပြေတော့ ကျနော်တို့နဲ့ ပြည်သူတွေကြား ဆက်သွယ်ဖို့ ခက်လာတယ်။ တစ်ယောက်ယောက်က ယာဉ်တိုက်မှု၊ လက်နက်ကြီး ထိမှန်လို့ အကြောင်းကြားလာရင် နောက်ကျမှသိရတာ။ ကျနော်တို့ နောက်ကျမှ ရောက်သွားတော့ လူနာက သွေးထွက်လွန်ပြီး ဆုံးသွားပြီ။ နောက်တခုက ဒေသအာဏာ ပိုင်တွေနဲ့ အဝင်၊ထွက်မရှိတော့ တစ်ခါတလေ လူနာသွားကြိုချင်ရင် သူတို့ကမသိတော့ ပေးမသွားဘူး။ တိုက်ပွဲကာလမှာ အရင်ကချိတ်ဆက်နေကျ တစ်ယောက်လည်း နေရာပြောင်းသွားတော့ ထပ်ပြီးချိတ်ဆက်ဖို့ ခက်ခဲတာ စတာတွေအခက်ခဲအမျိုးမျိုးရှိတာပေါ့ဗျာ “ ဟု ၎င်းတာဝန်ခံတစ်ဦးက ပြောသည်။

ထို့ကြောင့် ဒေသအတွင်းရှိ စစ်တပ်အပါအဝင် တော်လှန်ရေး လက်နက်ကိုင်တပ်ဖွဲ့များအနေဖြင့် တိုက်ပွဲကြားမှ မလိုအပ်ဘဲ ပြည်သူများ မသေဆုံးရအောင် ကန့်သတ်ချက်ဖြင့် သော်လည်းကောင်း လမ်းပိုင်းများအား ဖွင့်ပေးစေလို ကြောင်း လူမှုကူညီရေးအသင်းများက တောင်းဆိုလိုက်သည်။

“ ကျနော်တို့ ပရဟိတတွေကတော့ ထိခိုက်ဒဏ်ရတဲ့သူ၊ ဒုက္ခရောက်နေတဲ့သူတွေကို ရာခိုင်နှုန်းပြည့် ကယ်တင်ချင်တာပေါ့ဗျာ။ တချို့ပိတ်မိနေသူတွေလည်း ဟိုဘက်မှာသွားလာမရတော့ အစားအသောက် ပြတ်ပြီး ဒုက္ခရောက်သွားနိုင်တယ်။ ကျနော်တို့က ဒုက္ခရောက်နေသူတွေ၊ ဒဏ်ရာရသူတွေကို သွားရောက်ကယ်တင် ချင်တယ်။ ဒါကြောင့် အချိန်ပိုင်းဖြင့် သဘောက ၈ နာရီကနေ ၉ နာရီလား၊ ညနေလား ဖြစ်ဖြစ် သွားလာခွင့် ပြုဖို့လိုတယ်။ ကျနော်တို့ကယ်ဆယ်မှုကို အချိန်ပိုင်းဖြင့် ပေးစေလိုတယ် “ ဟု မူဆယ်မြို့နယ် ပရဟိတအသင်းဝင် တစ်ဦးက တောင်းဆိုသည်။

သျှမ်းသံတော်ဆင့်မှ သီးခြားအတည်ပြုထားသည့် စာရင်းအရ “ ၁၀၂၇ စစ်ဆင်ရေး “ တစ်လအတွင်း လက်နက်ကြီး ထိမှန်မှုကြောင့် အရပ်သား ၁၀၀ နီးပါး သေဆုံးရသည်။