သျှမ်းပြည် ကျောက်မဲမြို့နယ် မိုင်းလုံမြို့တွင် စစ်ကောင်စီတပ်မှ လေကြောင်းဗုံးကြဲမှုကြောင့် အမျိုးသမီး ၁ ဦး ပွဲချင်းပြီး သေဆုံးပြီး အရပ်သား ၁၀ ဦး ထိခိုက်ဒဏ်ရာရရှိကြောင်း စုံစမ်းသိရသည်။

ယမန်နေ့ (ဒီဇင်ဘာလ ၅ ရက်) နံနက် ၉ နာရီအချိန်ခန့်က သျှမ်း-မန္တလေးနယ်စပ်ရှိ မိုင်းလုံမြို့တွင် စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် မိုင်းလုံမြို့ အထက်အောင်မြေရပ်ကွက်ရှိ အသက် ၄၅ နှစ်အရွယ် မအေးနန်း ဆိုသူ အမျိုးသမီး ၁ ဦး ပွဲချင်းပြီး သေဆုံး၍ ကလေး ၃ ဦးနှင့် မသန်စွမ်း ၁ ဦးအပါအဝင် စုစုပေါင်း ၁၀ ဦး ထိခိုက်ဒဏ်ရာရရှိပြီး နေအိမ် ၃ လုံး မီးလောင်ပျက်စီးကြောင်း မိုင်းလုံမြို့ဒေသခံများက ပြောသည်။

“မနေ့က မနက် ၅ နာရီခွဲလောက် စတိုက်ကြတာ။ အထက်ရပ်မှာ တိုက်လေယာဉ်နဲ့ ဗုံးလာကြဲတာကတော့ မနက် ၉ နာရီကျော်လောက်ဖြစ်မယ်။ မအေးနန်း ကတော့ ဗုံးစထိပြီး ခါးပြတ်ခါနီးလေးပဲ အဲ့မှာ ပွဲချင်းပြီးဆုံးသွားတယ်။ သူ့အမျိုးသားနဲ့ ကလေး ၂ ယောက်လဲ နည်းနည်းစီ ဒဏ်ရာရတယ်။ ” မိုင်းလုံမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီ၏ တိုက်လေယာဉ်ပေါ်မှ ကြဲချသည့် ဗုံးစထိမှန်ပြီး သေဆုံးသွားသူ၏ မျက်နှာချင်းဆိုင်အိမ်မှ ကျောင်းသူတစ်ဦးနှင့် အမျိုးသမီးတစ်ဦး အပါအဝင် မိသားစု ၃ ယောက်တွင် ဦးခေါင်းနှင့်မျက်နှာ ဒဏ်ရာရရှိပြီး အခြားတစ်အိမ်ရှိ မသန်စွမ်းအမျိုးသမီး တစ်ဦးနှင့် အမျိုးသမီး ၂ ဦးအပါအဝင် မိသားစုဝင် ၄ ဦး ထိခိုက်ဒဏ်ရာရရှိကြောင်း မိုင်းလုံမြို့မှ ၎င်းဒေသခံက ဆက်ပြောသည်။

မိုင်းလုံမြို့အခြေစိုက် စစ်ကောင်စီတပ် ခလရ-၇၁ တပ်ရင်းကို ယမန်နေ့ (ဒီဇင်ဘာ ၅ ရက်)တွင် TNLA တပ်ဖွဲ့က ဝင်ရောက်တိုက်ခိုက်ခဲ့ကာ စစ်ကောင်စီတပ်မှ တိုက်လေယာဉ်ဖြင့် ၈ ကြိမ်ထက်မနည်း လာရောက်တိုက်ခိုက်ခဲ့ခြင်းကြောင့် တစ်နေကုန် တိုက်ပွဲပြင်းထန်ခဲ့ပြီး လက်ရှိအချိန်ထိ မိုးကုတ်မြို့အခြေစိုက် စစ်ကောင်စီတပ်များမှ လက်နက်ကြီးဖြင့် ရမ်းသမ်းပစ်ခတ်လာနေကြောင်း မိုင်းလုံမြို့ဒေသခံများထံမှ သိရသည်။

“မနေ့က စစ်လေယာဉ်နဲ့ ၈ ခေါက်ကျော်တောင် လာတယ်။ မိုင်းလုံအနေအထားနဲ့ဆိုရင် စစ်ကောင်စီတပ် ခလရ-၇၁ ထဲက တပ်သားတွေ မနေ့ည ၉ နာရီခွဲလောက်က တပ်ဆုတ်သွားပြီ။ လောလောဆယ်တော့ TNLA တပ်ပဲ ရှိမယ်။ မိုးကုတ်ဘက်က စစ်ကောင်စီတပ်တွေကနေလည်း အခုထက်ထိ လက်နက်ကြီးနဲ့ လှမ်းပစ်လာတာရှိတယ်”ဟု မိုင်းလုံမြို့ဒေသခံတစ်ဦးက သျှမ်းသံတော်ဆင့်ကို ပြောသည်။

ကျောက်မဲ-မိုးကုတ် ကားလမ်းမပေါ်ရှိ မိုင်းလုံမြို့တွင် TNLA တပ်ဖွဲ့နှင့် စစ်ကောင်စီတပ်တို့၏ နှစ်ဘက်ထိတွေ့တိုက်ပွဲများအတွင်း လုံခြုံရေးစိုးရိမ်မှုကြောင့် ‌ဒေသခံပြည်သူ ၅၀၀ ကျော်မှာ မြို့ဟောင်းရပ်ကွက်နှင့် ပန်ပေါင်းကျေးရွာများရှိ နီးစပ်ရာဆွေမျိုးနေအိမ်သို့ ထွက်ပြေးတိမ်းရှောင်လျက်ရှိပြီး စားနပ်ရိက္ခာများ လိုအပ်နေကြောင်း မိုင်းလုံမြို့ဒေသခံများထံမှ သိရသည်။