သျှမ်းပြည် လောက်ကိုင်မြို့မှ လားရှိုးမြို့သို့ နေရပ်ပြန်လာသည့် လူငယ် ၇ ဦးကို ကိုးကန့်တပ်ဖွဲ့ MNDAA က စစ်မှုထမ်းရန် ဖမ်းဆီးခေါ်ဆောင်သွားကြောင်း စုံစမ်းသိရသည်။
ပြီးခဲ့သည့် နိုဝင်ဘာလ ၂၄ ရက်တွင် လောက်ကိုင်မြို့မှ နေရပ်ပြန်ရန် ထွက်ခွာလာသည့် လူငယ် ၇ ဦးသည် ချင်းရွှေဟော်မြို့သို့ မရောက်မီတွင် ပျောက်ဆုံးသွားခဲ့ပြီး နိုဝင်ဘာ ၂၅ ရက်နေ့တွင် ကိုးကန့်တပ်ဖွဲ့ MNDAA ၏ ဖမ်းဆီးခြင်းခံရကာ စစ်မှုထမ်းရန် ခေါ်ဆောင်သွားကြောင်း လောက်ကိုင်မြို့မှ ထွက်ပြေးတိမ်းရှောင်လာသူများက ပြောသည်။
“လောက်ကိုင်ကနေ ချင်းရွှေဟော်ကို ဆင်းလာတဲ့အချိန် ကိုးကန့်တပ်က သူတို့ကို ဖမ်းထားပြီး သူတို့မှတ်ပုံတင်ကိုလည်း မီးရှို့လိုက်တယ်။ ပြီးတော့ အဝတ်အစားတွေ ချွတ်ခိုင်းပြီးတော့ သူတို့ ကိုးကန့်စစ်ဝတ်စုံကို ချက်ချင်းဝတ်ခိုင်းတယ်လို့ ပြောတာ။ ၆ ယောက်က အတူတူ ဖမ်းခံရပြီး ကျန်တစ်ယောက်က သက်သက်ဖမ်းခံရတယ်၊ စုစုပေါင်း ၇ ယောက်ရှိမယ်။ ချင်းရွှေဟော် စခန်းကုန်းမှာ ဖမ်းထားတာလို့ပြောတယ်”ဟု ဖမ်းဆီးခံရသည့် လူငယ်များ၏ မိသားစုနှင့် ရင်းနှီးသူတစ်ဦးက သျှမ်းသံတော်ဆင့်ကို ပြောသည်။
ကိုးကန့်တပ်ဖွဲ့ MNDAA ၏ ဖမ်းဆီးခြင်းကို ခံရပြီး စစ်မှုထမ်းရန် ခေါ်ဆောင်ခံရသူများမှာ လားရှိုးမြို့မှ စိုင်းလျန်းဟန် ၂၀ နှစ်၊ စိုင်းအိုက်နော် ၁၈ နှစ်၊ စိုင်းအိုက်လောဝ် ၂၆ နှစ်၊ မောင်ညီကား ၁၉ နှစ်နှင့် ကချင်ပြည်နယ် မံစီမြို့နယ်မှ စိုင်းအောင်လှိုင်း ၂၇ နှစ်၊ စိုင်းလှိုင်း ၂၆ နှစ်၊ မောင်နော်ဂွန်း ၂၀ နှစ် တို့ဖြစ်ကြောင်း ဖမ်းဆီးခံရသည့် လူငယ်များ၏ မိသားစုနှင့် နီးစပ်သူများထံမှ သိရသည်။
ကိုးကန့်တပ်ဖွဲ့ MNDAA ၏ ဖမ်းဆီးခြင်းကို ခံခဲ့ရသည့် လူငယ်များ၏ မိဘများမှာ နိုဝင်ဘာလ နောက်ဆုံးပတ်တွင် လောက်ကိုင်မြို့မှ လားရှိုးမြို့သို့ ပြန်ရောက်လာသည့် ၎င်းတို့၏ သူငယ်ချင်းများထံမှ ဖြစ်စဉ်ကို ပြန်လည်သိရှိရပြီး ကိုးကန့်တပ်ဖွဲ့ MNDAA အား ဖမ်းဆီးထားသည့် လူငယ်များကို ပြန်လွတ်ပေးစေလိုကြောင်း လားရှိုးမြို့မှ ၎င်းဒေသခံက ဆက်ပြောသည်။
ပြီးခဲ့သည့် နိုဝင်ဘာလအတွင်းက သိန္နီမြို့နယ်တွင် ကိုးကန့်တပ်ဖွဲ့ MNDAA က အသက်မပြည့်သေးသည့် လူငယ်များအပါအဝင် အမျိုးသား ၂၀ နီးပါးခန့်ကို ဖမ်းဆီးသွားခဲ့ပြီး မူဆယ်မြို့နယ် မုံးကိုးမြို့တွင်လည်း ကိုရင်များကို လူဝတ်လဲစေပြီး စစ်မှုထမ်းရန် ဖမ်းဆီးခေါ်ဆောင်သွားခဲ့ကြောင်း ဒေသခံများက ပြောသည်။
ထို့အပြင် ကိုးကန့်တပ်ဖွဲ့ MNDAA ၏ အုပ်ချုပ်ရေးယန္တရား စတင်လည်ပတ်နေသည်ဟု ကြေညာထားသော ပန်ဆိုင်း(ကြူကုတ်)မြို့တွင်လည်း သန်းခေါင်စာရင်း ကောက်ယူနေပြီး အသက် ၁၅ နှစ်အထက် အမျိုးသားများတင်မကဘဲ အမျိုးသမီးများကိုပါ စစ်မှုထမ်းရန် ဒီဇင်ဘာ ၄ ရက်နေ့က လာရောက်ခေါ်ဆောင်နေကြောင်း ပန်ဆိုင်းမြို့ ဒေသခံများထံမှ သိရသည်။
ကိုးကန့်တပ်ဖွဲ့ MNDAA မှ သတ်မှတ်ထားသည့် အထူးဒေသ(၁)တွင် ပါဝင်သော ကိုးကန့်ခရိုင်၊ ကွတ်ခိုင်ခရိုင်၊ သိန္နီခရိုင်နှင့် မုံးကိုးခရိုင်တို့မှ အသက် ၁၆ နှစ်မှစ၍ အမျိုးသမီး၊ အမျိုးသား စသည့်ဖြင့် လူမျိုးဘာသာ မခွဲခြားဘဲ တပ်သားအဖြစ် စုဆောင်းရန်ရှိပြီး ထိုအထဲတွင် အမျိုးသမီးများကို ရုံးပိုင်ဆိုင်ရာ ဝာာဝန်အဖြစ်လည်းကောင်း၊ အမျိုးသားများကို စစ်မှုထမ်းအဖြစ်လည်းကောင်း တာဝန်ပေးအပ်မည် ဖြစ်ကြောင်း ကိုးကန့်တပ်ဖွဲ့ MNDAA ၏ ပြောရေးဆိုခွင့်ရှိသူ လီကျာဝင်းက သျှမ်းသံတော်ဆင့်သို့ နိုဝင်ဘာ ၂၇ ရက်တွင် ပြောကြားထားသည်။
Leave a Comments