ကရင်နီပြည်အတွင်း “၁၁.၁၁ စစ်ဆင်ရေး” တိုက်ပွဲကြောင့် သျှမ်းပြည် ဆီဆိုင်မြို့နယ်ရှိ စစ်ရှောင်စခန်းများတွင် စစ်ရှောင်ဦးရေ ၁ သောင်းကျော်တိုးလာပြီး ထိုထဲတွင် အမျိုးသမီးနှင့် ကလေးများ ထက်ဝက်ကျော်ရှိကြောင်း စစ်ဘေးရှောင်စခန်း တာဝန်ရှိသူများက ပြောသည်။
ဆီဆိုင်မြို့နယ်အတွင်း ယခင် စစ်ရှောင်ဦးရေနှင့် ယခု “၁၁.၁၁ စစ်ဆင်ရေး”ကြောင့် အသစ်ရောက်လာသည့် စစ်ရှောင် စုစုပေါင်း လူဦးရေ ၁ သောင်းကျော်အထိ ရှိလာသည်။
“ အခုက အမျိုးသမီးနဲ့ ကလေးက (၂) ဆလောက် ပိုများတယ်။ မွေးခါနီး ကိုယ်ဝန်သည်လည်း ပါတယ်။” လို့ စစ်ရှောင်စခန်း တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
ထိုစစ်ဘေးရှောင် အမျိုးသမီးများလာသည့်အတွက် လစဥ်သုံးပစ္စည်းများနှင့် တကိုယ်ရည် သန့်ရှင်းရေး အတွက်ဆပ်ပြာများလည်း အရေးပေါ်လိုအပ်နေပြီး၊ ကိုယ်ဝန်ဆောင်မိခင်များအတွက်လည်း ကလေးမီးဖွားရန် အခက်အခဲများရှိနေကြောင်း သိရသည်။
“ကလေးမွေးဖို့ကလေးအနှီးတောင် မရှိသေးဘူး။ထွက်လာတုန်းက အဝတ်တစ်ထည် ကိုယ်တစ်ခုနဲ့ဘဲဆိုတော့ ပိုက်ဆံ အစ အကုန်ကျန်ခဲ့ကြတာ။သူတို့အတွက်ကအကူညီရမ်းလိုအပ်နေပါတယ်။ ” ဟု ၎င်းက ဆက်ပြောသည်။
ထို့အပြင် လက်ရှိတွင် စစ်ဘေးရှောင်များအတွက် အလှူရှင်များအလွန်ခက်ခဲလာပြီး ရွာခံများက ကိုယ်ထူကိုယ်ထဖြင့် ရှာဖွေကျွေးမွေးနေရသည့်အဆင့်ရောက်နေကြောင်း၊ အလှူရှင်များအနေဖြင့် စားနပ်ရိက္ခာနှင့် ဆေးဝါးများ လာရောက်ကူညီလှူဒါန်းပေးရန်လည်း စစ်ဘေးရှာင်ကော်မတီဝင်များက တောင်းဆိုလိုက်သည်။
စစ်ဘေးရှောင်အများစုသည် ဆီဆိုင်မြို့နယ် ရေဖြူကျေးရွာ၊ လာဇရုကျေးရွာ၊ အောင်ကလပ်ကျေးရွာ၊နောင်ထောဝ်ကျေးရွာနှင့် မြို့ပေါ်ဖြစ်သည့် ဘုရားဖြူရပ်ကွက် ၊ ဟိုခဲရပ်ကွက်၊ အောင်သပြေရပ်ကွက်၊ သီရိ ရက်ကွက်၊ မင်္ဂလာရပ်ကွက်၊ မြကန်သာရပ်ကွက်တွင်အများဆုံး ရှိနေကြောင်း သိရသည်။
