စစ်ကောင်စီ တပ်ရောက်ရှိနေသည့် သျှမ်းပြည် မူဆယ်မြို့ လွိုင်တိန်ခမ်း တောင်ပေါ်ဘုရားပေါ် သို့ ညီနောင်မဟာမိတ်တပ်ပေါင်းစုမှ ဒရုန်းဖြင့် တိုက်ခိုက်ကြောင်း စုံစမ်းိသရသည်။
ယမန်နေ့ (ဒီဇင်ဘာလ ၃) ရက် နံနက်ပိုင်း ၉ နာရီဝန်းကျင်တွင် သာသနာ့နယ်မြေဖြစ်သည် လွိုင်တိန်ခမ်း တောင်ပေါ်ဘုရားသို့ စစ်ကောင်စီ စစ်ကြောင်း တက်သွားပြီးနောက် ညီနောင်မဟာမိတ်တပ်ဖွဲ့က ဒရုန်းဖြင့် တိုက်ခိုက်ခဲ့ကြောင်း လုံခြုံရေးအရ အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
“စစ်တပ် အဲ့တောင်ပေါ်ဘက် တက်သွားတာတွေ့လို့ ကိုးကန့်တပ်တွေဘက်က ဒရုန်း နဲ့ လိုက်ပစ် တာတဲ့။ လူကို ထိလား ဆိုတာ သေချာမသိပေမဲ့ ကျောင်းဆောင်တွေတော့ တော်တော်ထိထားတယ်။ အခုချိန်ထိ လည်း အဲ့တောင်ပေါ် အခြေအနေကို ဘယ်သူမှ တက်မကြည့်ရဲဘူး” ဟု လုံခြုံရေးအရ အမည်မဖော်လိုသူ အမျိုးသားက သျှမ်းသံတော်ဆင့်ကို ပြောသည်။
သာသနာ့နယ်မြေ လွိုင်တိန်ခမ်းရှိ မိဂဒါကျောင်းတိုက်သည် မူဆယ်မြို့ အဝင်တွင် တည်ရှိပြီး မူဆယ်မြို့နှင့် ၁ မိုင်ဝန်းကျင်သာ ကွာဝေးသည်။
ယင်းကဲ့သို့ သာသနာ့နယ်မြေများအပါအဝင် အရပ်သားများ ရှိရာသို့ စစ်တပ်မှ နေရာယူခြင်း၊ ဦးတည် တိုက်ခိုက်ခြင်း တို့ကြောင့် ဒေသအတွင်း နေထိုင်သည့် ဒေသခံများ အနေဖြင့် လုံခြုံရေးအတွက် စိုးရိမ်နေရ ကြောင်းလည်း အသက် (၄၀) ဝန်းကျင် အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“ဘယ်နေရာမှာပဲနေနေ လုံခြုံမှုဆိုတာကတော့ မရှိတော့ဘူး။ အရင်ကတော့ ထိတ်လန့်လို့ ၊ ကြောက်လန့်လို့ ဘုရားတကြရတယ်။ အခုဆို သူတို့က ဘုရားနေရာတောင် အလွတ်မပေးတော့ဘူး။ ပြည်သူတွေရဲ့ဘဝက တိုက်ပွဲကြားကနေ ဓားစာခံ ဖြစ်နေရတယ်” ဟု အသက် (၄၀) ဝန်းကျင် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် နိုဝင်ဘာလ ၁၅ ရက် နေ့လည်ပိုင်းတွင်လည်း မြန်မာ – တရုတ်နယ်စပ်ရှိ ပန်ဆိုင်းမြို့မှ ဓမ္မာရုံကျောင်းတိုက် လက်နက်ကြီး ထိမှန်ပြီး ပျက်စီးဆုံးရှုံးမှုများပြားခဲ့ ကြောင်းလည်း သိရသည်။
လက်နက်ကိုင်တပ်ဖွဲ့ဝင် တပ်သားများမှ သာသနာ့နယ်မြေ အနီးပတ်ဝန်းကျင်တွင် တိုက်ပွဲပစ်ခတ်မှု ဖြစ်ပွားခြင်း၊ ကျေးရွာအတွင်း လူထုနှင့်အတူ ရောနှောနေထိုင်ခြင်း တို့သည် ဂျီနီဗာ ကွန်ဗင်းရှင်း (Geneva Convention) ဥပဒေနှင့် ဆန့်ကျင်သည့်အပြင် စစ်ရာဇဝတ်မှု မြောက်သည်။
