သျှမ်းပြည် မူဆယ်မြို့နယ်၊ တုန့်ခန်ကျေးရွာအတွင်း၌ အာဏာသိမ်း စစ်ကောင်စီ တပ်ဖွဲ့ နှင့် ညီနောင်မဟာမိတ်တပ်ဖွဲ့တို့သည် အရပ်သားများကို အကာအကွယ်ယူပြီး တိုက်ပွဲ ဖြစ်ပွားနေကြောင်း စုံစမ်း သိရသည်။
ယနေ့( နိုဝင်ဘာလ ၃၀) ရက် နံနက်ပိုင်းမှ စတင်ကာ စစ်ကောင်စီ တပ်စွဲနေထိုင်သည့် မူဆယ်မြို့နယ် တုန်ခန်ကျေးရွာ အတွင်းသို့ ညီနောင်မဟာမိတ် တပ်ဖွဲ့မှ ဒရုန်းဖြင့် ပစ်ခတ်တိုက်ခိုက်ခဲ့သည့်အတွက် အရပ်သားနေအိမ် များစွာ ထိခိုက်ပျက်စီးကြောင်း လုံခြုံရေး အရ အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ဒရုန်းနဲ့ ဗုံးတွေ ကြဲချတာ အလုံး ၅၀ ကျော်ရှိနေပြီ။ ရွာထဲလည်း ဘယ်သူမှ မနေရဲတော့ဘူး။ မူဆယ်မြို့ပေါ်ကို စစ်ရှောင်ထွက်ပြေးသွားကြပြီ။ ရွာထဲက အိမ်တွေဆိုရင်လည်း ထိခိုက်ပျက်စီးတာ တော်တော် များတယ်။ အခုထိ လည်း ပစ်နေကြတုန်းမို့ အရေအတွက်တိတိကျကျတော့ မသိရသေးဘူး” ဟု အထက်ပါ အမည်မဖော်လိုသူ အမျိုးသားက သျှမ်းသံတော်ဆင့်ကို ပြောသည်။
လက်ရှိ သတင်းရေးသားနေသည့် အချိန်အထိ တုန့်ခန်ကျေးရွာဘက်၌ ပစ်ခတ်သံများ ကြားနေရလျက်ရှိပြီး နှစ်ဖက်တပ်ဖွဲ့မှ အရပ်သားများ နေထိုင်ရာ ကျေးရွာအတွင်း တိုက်ပွဲ ဖြစ်ပွားနေသည့်အတွက် အရပ်သား နေအိမ် အဆောက်အဦးများ ထိခိုက်ပျက်စီးမှုများနေကြောင်း ဒေသခံများထံမှ သိရ သည်။
အလားတူပင် ယမန်နေ့ (နိုဝင်ဘာလ ၂၉) ရက် မွန်းလွှဲပိုင်းတွင်လည်း တုန်ခန်ကျေးရွာအတွင်း တပ်စွဲ နေထိုင်ထားသည့် စစ်ကောင်စီတပ်မှ လက်နက်ကြီး RPG ဖြင့် လူနေအိမ်များထံသို့ ဦးတည်ပစ်ခတ်သည့်အတွက် အရပ်သားနေအိမ် ၃၀ ထက်မနည်း ထိခိုက်ပျက်စီးရကြောင်းလည်း အသက် (၄၀) ဝန်းကျင် ဒေသခံ အမျိုးသားက သျှမ်းသံတော်ဆင့်ကို ပြောသည်။
“ရွာထဲမှာနေပြီး RPG နဲ့ ပစ်တာ အိမ်ကြီး အိမ်ကောင်းတွေကိုပဲ ဦးတည်ပစ်နေကြတာ။ မနေ့က အိမ် (၃၀) လုံးထက်မနည်း ပျက်စီးရတယ်။ အမှန်ဆိုရင် သူတို့က ဒီလိုမလုပ်သင့်ပါဘူး။ ရွာသားတွေဆိုလည်း အကုန် စစ်ရှောင်ရပြီ” ဟု အသက် (၄၀) ဝန်းကျင် အမျိုးသားက သျှမ်းသံတော်ဆင့်ကို ပြောသည်။
ယင်းကဲ့သို့ စစ်ကောင်စီ နှင့် မဟာမိတ်တပ်များ တိုက်ပွဲဖြစ်ပွားရာ တုန့်ခန်ကျေးရွာသည် လူနေအိမ်ခြေ (၁၂၀) ကျော် ၊ လူဦးရေ ၃၀၀ ဝန်းကျင် နေအထိုင်သည့် ကျေးရွာဖြစ်ပြီး လက်ရှိအချိန်တွင် နှစ်ဖက် တပ်ဖွဲ့ တိုက်ပွဲကြား အရပ်သား နေအိမ် (၃၀) ထက်မနည်း ထိခိုက်ပျက်စီးရကြောင်း သိရသည်။
လက်ရှိ အချိန်တွင် တုန်ခန်ကျေးရွာခံများသည် မူဆယ်မြို့ပေါ်ရှိ ဝေဠုဝန်ဘုရားကျောင်းသို့ စစ်ရှောင်ရောက်ရှိပြီး စားနပ်ရိက္ခာ နှင့် နေရာထိုင်ခင်း၊ ဆေးဝါး အကူအညီများလိုအပ်နေကြောင်းလည်း သိရသည်။
ညီနောင်မဟာမိတ် တပ်ဖွဲ့များ နှင့် စစ်ကောင်စီ တပ်ဖွဲ့တို့သည် ပြီးခဲ့သည့် အောက်တိုဘာလနှောင်းပိုင်းမှ စတင်ကာ မူဆယ်မြို့နယ်အတွင်း တိုက်ပွဲများ ဖြစ်ပွားခဲ့ပြီး တိုက်ပွဲအတွင်း လက်နက်ကြီး/လက်နက်ငယ်များဖြင့် ပစ်ခတ်မှု ကြောင့် အရပ်သား ထိခိုက်ဒဏ်ရာရမှုသည် (၁၀) ဦးနှင့် အထက်၊ သေဆုံးသူဦးရေ (၅) ဦးထက်မနည်း ရှိနေကြောင်းလည်း သိရသည်။
Leave a Comments