သျှမ်းပြည် လောက်ကိုင်မြို့ ဒေသကွပ်ကဲမှု စစ်ဌာနချုပ်(ဒကစ) လက်အောက်ရှိ ခလရ-၁၂၅ တပ်ရင်းတစ်ရင်းလုံးသည် ကိုးကန့်တပ်ဖွဲ့ MNDAA ထံသို့ ထပ်မံလက်နက်ချ အလင်းဝင်ခဲ့ကြောင်း စုံစမ်းသိရသည်။
ကုန်းကြမ်းမြို့နယ်အခြေစိုက် စစ်ကောင်စီ ခလရ-၁၂၅ တပ်ရင်းကို ညီနောင်မဟာမိတ်တပ်ဖွဲ့များမှ အပြင်းအထန် ထိုးစစ်ဆင် တိုက်ခိုက်ခဲ့ပြီးနောက် ခမရ-၁၂၅ တပ်ရင်းမှူးနှင့် တပ်ဖွဲ့ဝင်များအပါအဝင် စစ်ကောင်စီလက်အောက်ခံ ပြည်သူ့စစ်အဖွဲ့ဝင်များ စုစုပေါင်း (၂၇၂)ဦးသည် နိုဝင်ဘာလ ၂၈ ရက်နေ့တွင် ကိုးကန့်တပ်ဖွဲ့ MNDAA ထံသို့ လက်နက်ချအလင်းဝင်ခဲ့ကြောင်း ကိုးကန့်မီဒီယာမှ သတင်းထုတ်ပြန်သည်။
ပြီးခဲ့သည့် နိုဝင်ဘာ ၂၈ ရက်နေ့အထိ ကုန်းကြမ်းမြို့နယ် စစ်ကောင်စီ တပ်စခန်း (၅)ကို ကိုးကန့်တပ်ဖွဲ့ MNDAA က တိုက်ခိုက်သိမ်းပိုက်နိုင်ခဲ့ပြီးနောက် ခလရ-၁၂၅ တပ်ရင်းတစ်ရင်းလုံးမှာ အလံဖြူထောင်ပြီး ၎င်းတပ်ရင်းမှ တပ်ရင်းမှူးသည် ရဲဘော်တစ်ဦးနှင့်အတူ လက်နက်ချအလင်းဝင်ရန် ကိုးကန့်တပ်ဖွဲ့ MNDAA ထံသို့ ဆွေးနွေးတောင်းဆိုခဲ့သည်ဟု ထုတ်ပြန်ထားသည်။
ကုန်းကြမ်းမြို့နယ်တွင် နှစ်ပေါင်း (၃၀)ခန့် တပ်စွဲထားခဲ့သော စစ်ကောင်စီတပ်များမှ ကိုးကန့်တပ်ဖွဲ့ MNDAA သို့ လက်နက်ချ အလင်းဝင်လာသူများမှာ ခလရ-၁၂၅ အဖွဲ့ဝင် (၉၃)ဦး၊ စကခ-၁၆ အဖွဲ့ဝင် (၃၆)ဦး၊ စကခ-၁၂ အဖွဲ့ဝင် (၁၄)ဦး၊ စစ်ဆင်ရေးအကြံပေးသူ (၅)ဦး၊ ပြည်သူ့စစ်အဖွဲ့ဝင် (၂၇)ဦး၊ ရဲတပ်ဖွဲ့ဝင် (၁၁)ဦးနှင့် စစ်မိသားစုဝင် (၈၆)ဦး စုစုပေါင်း ၂၇၂ ဦး ရှိကြောင်း ထုတ်ပြန်ချက်တွင် ပါဝင်သည်။
လက်နက်ချ အလင်းဝင်ရောက်လာသည့် စစ်ကောင်စီတပ်ဖွဲ့ဝင်များကို စစ်သုံ့ပန်းဥပဒေအရ ထိန်းသိမ်းစောင့်ရှောက်ထားပြီး ၎င်းတို့၏ မိသားစုဝင်များနှင့် ဒဏ်ရာရလူနာများကို စောင့်ရှောက်ပေးထားကြောင်း ညီနောင်မဟာမိတ်တို့၏ ထုတ်ပြန်ချက်အရ သိရသည်။
ထို့အပြင် ခလရ-၁၂၅ တပ်ရင်းမှူး၏ ပြောဆိုချက်အရ စစ်ကောင်စီ စကခ-၁၆၏ စကခမှူးမှာ နိုဝင်ဘာလ ၂၇ ရက်နေ့တွင် အဖွဲ့ဝင် ၁၀၀ ကျော် ခေါ်ဆောင်ထွက်ပြေးသွားခဲ့ကြောင်း ထုတ်ပြန်ချက်တွင် ပါရှိသည်။
ယခုကဲ့သို့ ကုန်းကြမ်းမြို့နယ်မှ ခလရ-၁၂၅ တပ်ရင်းတစ်ရင်းလုံး ကိုးကန့်တပ်ဖွဲ့ MNDAA ထံသို့ လက်နက်ချ အလင်းဝင်ခဲ့ခြင်းကြောင့် ကုန်းကြမ်းမြို့နယ် ဒေသတစ်ခုလုံးကို သိမ်းပိုက်နိုင်ခဲ့ပြီဖြစ်ကြောင်း ကိုးကန့်တပ်ဖွဲ့ MNDAA က ကြေညာသည်။
အလားတူ နိုဝင်ဘာ ၁၂ ရက်ကလည်း လောက်ကိုင်မြို့နယ် ညံခွမ်း(ရန်ခွမ့်)ရွာတွင် အခြေစိုက်သည့် ခလရ-၁၂၉ တပ်ရင်းမှ တပ်ရင်းမှူး ဗိုလ်မှူးကျော်ရဲအောင် ဦးဆောင်သည့် တပ်ဖွဲ့ဝင် ၁၂၆ ဦးနှင့် မိသားစုဝင် ၁၃၄ ဦး၊ စုစုပေါင်း ၂၆၂ ဦးတို့က ပြည်သူ့ရင်ခွင်သို့ အလင်းဝင်ရောက်လာခဲ့ကြောင်း ညီနောင်မဟာမိတ် ၃ ဖွဲ့က နိုဝင်ဘာ ၁၄ ရက်တွင် သတင်းထုတ်ပြန်ထားသည်။
လောက်ကိုင်မြို့အခြေစိုက် ဒေသကွပ်ကဲမှု စစ်ဌာနချုပ် (ဒကစ) လက်အောက်တွင် ခလရ-၁၂၅ (ကုန်းကြမ်း)၊ ခလရ-၁၂၈ (ပါစင်ကျော်)၊ ခလရ-၁၂၉ (ညံခွမ်း)၊ ခလရ-၂၃၉ နှင့် ခမရ-၃၂၂ ဟူ၍ တပ်ရင်းတို့ရှိပြီး ကိုးကန့်တပ်ဖွဲ့ MNDAA က လောက်ကိုင်မြို့အား ဝင်ရောက်တိုက်ခိုက်မည်ဟု ကြေညာအပြီးနောက် ယခုကဲ့သို့ ခလရ-၁၂၅ (ကုန်းကြမ်း) တပ်ရင်းတစ်ရင်းလုံးသည် ညီနောင်မဟာမိတ်ထံသို့ တတိယမြောက်တပ်ရင်းအဖြစ် လက်နက်ချ အလင်းဝင်ရောက်လာခြင်း ဖြစ်သည်။
Leave a Comments