သျှမ်းပြည် ကျောက်မဲမြို့အခြေစိုက် စစ်ကောင်စီတပ် ခလရ-၅၀၁ ကို TNLA နှင့် မန္တလေး-PDF ပူးပေါင်းတပ်ဖွဲ့တို့က ဝင်ရောက်တိုက်ခိုက်ခဲ့ကြောင်း စုံစမ်းသိရသည်။
ယနေ့ (နိုဝင်ဘာ ၂၉ ရက်) နံနက် ၉ နာရီကျော်အချိန်ခန့်က ကျောက်မဲမြို့ လွယ်ခွင်တောင်ဘက်ရှိ စစ်ကောင်စီ ခလရ-၅၀၁ တပ်ကို TNLA နှင့် မန္တလေး-PDF ပူးပေါင်းတပ်ဖွဲ့တို့က ဝင်ရောက်တိုက်ခိုက်ခဲ့ခြင်းကြောင့် နှစ်ဖက်ထိတွေ့တိုက်ပွဲ ဖြစ်ပွားခဲ့ကြောင်း ကျောက်မဲမြို့ဒေသခံများက ပြောသည်။
“ဒီနေ့ကျောက်မဲမြို့ထဲဘက်ထိတော့ ဘာမှမဖြစ်လိုက်ဘူး။ လက်နက်ကြီးနဲ့ မြို့ပြင်ဘက်တွေကို ပစ်သွားတာမျိုးရှိတယ်၊ နာရီခြားတစ်ခါ အဲ့လိုတော့ အသံကြားနေရတယ်။ မနက် ၉ နာရီလောက်က ၅၀၁ တပ် လွယ်ခွင်တောင်ဘက်မှာ ပစ်ခတ်သံ ကြားရတယ်။ အဲ့တပ်နားကို မဟာမိတ်တပ်တွေ ကပ်လာတော့ တိုက်ပွဲဖြစ်လာတဲ့သဘောထင်တယ်။ ၁၀ နာရီလောက်ကျတော့ ပြန်ဆုတ်သွားတာလား မသိဘူး၊ တပ်ထဲအထိတော့ မဝင်နိုင်သေးဘူး”ဟု ကျောက်မဲမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့နယ်တွင် ယမန်နေ့ (နိုဝင်ဘာ ၂၇/၂၈ ရက်)က စစ်ကောင်စီနှင့် TNLA တပ်ဖွဲ့တို့၏ နှစ်ဖက်ထိတွေ့တိုက်ပွဲများကြောင့် နားခေါ်၊ လွယ်ခေါ်၊ ပန်ပေါင်း၊ ဇောတိကုန်း၊ နမ့်ဟူးတောင်းကျေးရွာများမှ ဒေသခံပြည်သူ ၁၀၀၀ ခန့်သည် နီးစပ်ရာ ဘုန်းကြီးကျောင်းများတွင် ထွက်ပြေးတိမ်းရှောင်နေရပြီး စားနပ်ရိက္ခာ လိုအပ်နေကြောင်း ကျောက်မဲမြို့ ဒေသခံများထံမှ သိရသည်။
“ကျောက်မဲမှာ ဒီနှစ်ရက် သုံးရက်အတွင်း တိုက်ပွဲဖြစ်လို့ ဇောတိကုန်း၊ နမ့်ဟူးတောင်း၊ ပန်ပေါင်းဘက်က မြို့နားက ဒီရွာတွေ စစ်ရှောင်ကြရတယ်။ နောက်ပြီးတော့ နားခေါ်၊ လွယ်ခေါ်ရွာတွေဘက်မှာလဲ ဘုန်းကြီးကျောင်းကို ထွက်ပြေးရတာရှိတယ်။ ဒီနေ့အထိလဲ ထပ်ရှောင်နေရတုန်းဆိုတော့ စစ်ဘေးရှောင်ဦးရေက မငြိမ်သေးဘူး။ ခန့်မှန်းခြေကတော့ ၁၀၀၀ နီးပါးရှိမယ်”ဟု ကျောက်မဲမြို့မှ စစ်ဘေးရှောင်ကူညီသူတစ်ဦးမှ သျှမ်းသံတော်ဆင့်ကို ပြောသည်။
ထို့အပြင် နိုဝင်ဘာ ဒုတိယပတ်က ကျောက်မဲမြို့နယ် နောင်ပိန်ဂုတ်တွင်းတွင် ဖြစ်ပွားခဲ့သော စစ်ကောင်စီတပ်နှင့် TNLA ၊ မန္တလေး-PDF ပူးပေါင်းတပ်ဖွဲ့တို့၏ တိုက်ပွဲများကြောင့် နောင်ပိန်တိုက်နယ်ရှိ အောင်ဓမ္မာရုံ၊ ထန်းတပင်၊ လုပ်ပါ၊ ခေးနင်းကျောင်းတိုက်နှင့် ရှမ်းစာပေယဉ်ကျေးမှုခန်းမတို့တွင် စစ်ဘေးရှောင်ဦးရေ ၅၀၀ ကျော် တိမ်းရှောင်နေကြရသည်။
ပြီးခဲ့သည့် နိုဝင်ဘာ ၂၇ ရက်ကလည်း ကျောက်မဲမြို့တွင် စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ရာ ကျောက်မဲအေးရှားဝေါလ် တိုးဂိတ်အနီးရှိ BOC ဓာတ်ဆီဆိုင်နှင့် အနီးရှိ နေအိမ်များ မီးလောင်ပျက်စီးခဲ့ပြီး ၎င်းပျက်စီးမှုကြားတွင် ကျား/မ ခွဲခြားမရနိုင်ဘဲ မီးလောင်သေဆုံးနေသော အလောင်း ၄ လောင်း တွေ့ရှိခဲ့သည်ဟု ကျောက်မဲဒေသခံများက ပြောသည်။
ကျောက်မဲမြို့တွင် စစ်ကောင်စီတပ် စကခ-(၁) ၊ ခမရ-(၅၀၁) (၅၀၂) နှင့် အမြောက်တပ်-၃၅၂ တို့ အခြေစိုက်ပြီး လက်ရှိတွင် ကျောက်မဲမြို့ စစ်ကောင်စီတပ်နှင့် TNLA တပ်ဖွဲ့တို့ ထိတွေ့တိုက်ပွဲ ပြင်းထန်လျက် ရှိသည်။
