သျှမ်းပြည် နောင်ချိုမြို့နယ်တွင် စစ်ကောင်စီတပ်မှ ရမ်းသမ်းပစ်ခတ်သော လက်နက်ကြီးကြောင့် အမျိုးသား ၂ ဦး သေဆုံးပြီး၊ ၁ ဦးထိခိုက်ဒဏ်ရာ ပြင်းထန်ကြောင်း စုံစမ်းသိရသည်။

ယမန်နေ့ (နိုဝင်ဘာ ၂၆ ရက်) နေ့လယ် ၁၁ နာရီကျော်ခန့်က နောင်ချိုမြို့နယ် အုမ္မသီးလမ်းခွဲတွင် တပ်စွဲထားသော စစ်ကောင်စီတပ်မှ လက်နက်ကြီးဖြင့် သုံးဆယ်ကျေးရွာဘက်သို့ ရမ်းသမ်းပစ်ခတ်ခဲ့ရာ အသက် ၄၀ ကျော်အရွယ် အမျိုးသား ၂ ဦး ထိမှန်သေဆုံးပြီး ၁ ဦးမှာ ဒဏ်ရာပြင်းထန်ကြောင်း နောင်ချိုမြို့နယ်ဒေသခံများက ပြောသည်။

“အရင်နေ့ (နိုဝင်ဘာ ၂၆ ရက်)က နေ့လယ် ၁၁ နာရီကျော်မှာ ရွာထဲကို လက်နက်ကြီးကျတာ။ တစ်ယောက်က အိမ်မှာ ဖုန်းအားသွင်းနေရင်း လက်နက်ကြီးမှန်ပြီး ပွဲချင်းပြီး ဆုံးသွားတယ်။ နောက်တစ်ယောက်ကလည်း စာသင်ကျောင်းနားမှာ လမ်းလျှောက်နေတုန်း လက်နက်ကြီးစ မှန်ပြီး ဆုံးသွားတာ။ နှစ်ယောက်စလုံး အသက် ၄၀ ကျော် အမျိုးသားတွေ။ တခြားအိမ်သားတွေက တိမ်းရှောင်သွားတော့ မထိမှန်ဘူးလို့ ကြားတယ်”ဟု နောင်ချိုမြို့ သုံးဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

နောင်ချိုမြို့နယ် ရွှေညောင်ပင်ကျေးရွာတွင် စခန်းချတပ်စွဲထားသည့် စစ်ကောင်စီတပ်မှ သုံးဆယ်ကျေးရွာဘက်သို့ လက်နက်ကြီး ရမ်းသမ်းပစ်ခတ်မှုကြောင့် အမျိုးသား ၂ ဦး သေဆုံးပြီး ၁ ဦး ထိခိုက်ဒဏ်ရာရရှိကြောင်း TNLA တပ်ဖွဲ့၏ သတင်းနှင့်ပြန်ကြားရေးဌာနက နိုဝင်ဘာ ၂၆ ရက်တွင် ထုတ်ပြန်ထားသည်။

ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသည့် စစ်ကောင်စီယာဉ်တန်းများမှ စစ်ကောင်စီတပ်သားအချို့သည် နောင်ချိုမြို့နယ် အုမ္မသီးလမ်းခွဲနှင့် ရွှေညောင်ပင်ကျေးရွာတို့တွင် စခန်းချတပ်စွဲထားပြီး ၎င်းနေရာမှနေ၍ အနီးရှိ ကျေးရွာများသို့ လက်နက်ကြီးဖြင့် နေ့စဉ်နီးပါး ရမ်းသမ်းပစ်ခတ်နေကြောင်း နောင်ချိုမြို့နယ် ဒေသခံများက ပြောသည်။

ပြီးခဲ့သည့် နိုဝင်ဘာလ ၁၅ ရက်ကလည်း နောင်ချိုမြို့နယ် စစ်ကောင်စီတပ် သံဘိုတပ်စခန်းမှ ရမ်းသမ်းပစ်ခတ်လာသည့် လက်နက်ကြီးသည် သုံးဆယ်အုပ်စု ဇီးဖြူရေကျေးရွာမှ မိသားစု ၄ ယောက် နေထိုင်သည့် နေအိမ်ပေါ်သို့ ကျရောက်ပေါက်ကွဲခဲ့ရာ ကလေး ၂ ဦး ပွဲချင်းပြီး သေဆုံးကာ မိခင်ဖြစ်သူနှင့် အခြားကလေးငယ် ၁ ဦး ထိခိုက်ဒဏ်ရာ ရရှိခဲ့ကြောင်း မန္တလေး-PDF တပ်ဖွဲ့က သတင်းထုတ်ပြန်ထားသည်။

နောင်ချိုမြို့နယ်တွင် TNLA နှင့် မန္တလေး-PDF ပူးပေါင်းတပ်ဖွဲ့တို့က အုမ္မသီးလမ်းခွဲနှင့် ရွှေညောင်ပင်‌ကျေးရွာအနီး စစ်ကောင်စီ၏ ထောက်ပို့ယာဉ်တန်းကို ဖြတ်တောက်တိုက်ခိုက်ခဲ့ပြီး “၁၀၂၇ စစ်ဆင်ရေး”နှင့်အတူ မန္တလေး-PDF တပ်ဖွဲ့က “တောင်တမန် စစ်ဆင်ရေး”ကို ဖော်ဆောင်နေသည်။

နောင်ချိုမြို့နယ်အတွင်း နှစ်ဖက်ထိတွေ့တိုက်ပွဲများကြောင့် စစ်ဘေးရှောင်ဦးရေ ၂၅၀၀ ကျော်မှာ သဖန်းကိုင်း၊ သုံးဆယ်၊ ငို့ကလေး၊ အင်းဝိုင်း၊ ဘန့်ဘွေးနှင့် ပြင်ဦးလွင်မြို့ရှိ ဘုန်းကြီးကျောင်းများတွင် ထွက်ပြေးတိမ်းရှောင်နေရသည်ဟု နောင်ချိုဒေသခံများထံမှ သိရသည်။