မြန်မာ-တရုတ်နယ်စပ် ပန်ဆိုင်းမြို့တွင် စစ်ကောင်စီတပ်နှင့် ညီနောင်မဟာမိတ်တို့ အကြား တိုက်ပွဲကြောင့် ဘုန်းကြီးကျောင်းအပါအဝင် နေအိမ်အလုံးပေါင်း ၃၀ ကျော် ပျက်စီးသွားခဲ့ကြောင်း ဒေသအတွင်းစာရင်း ပြုစုထားချက်အရ သတင်းရရှိသည်။
ပြီးခဲ့သည့် အောက်တိုဘာလ ၃၀ ရက်မှ နိုဝင်ဘာလ ၂၄ ရက်ထိ ပန်ဆိုင်းမြို့အတွင်း စစ်ကောင်စီတပ်နှင့် ညီနောင်မဟာမိတ်တပ်ဖွဲ့ဝင် ကိုးကန့်တပ်ဖွဲ့ MNDAA တို့အကြား အပြန်အလှန် ပစ်ခတ်မှုကြောင့် ရပ်ကွက် ၃ အတွင်း နေအိမ် ၆ လုံး၊ ရပ်ကွက် ၄ အတွင်း နေအိမ် ၁၀ လုံး၊ ရပ်ကွက် ၆ အတွင်း နေအိမ် ၆ လုံးနှင့် ဝမ်မိုင်ရွာမှ နေအိမ် ၁၂ လုံး စုစုပေါင်း နေအိမ် ၃၄ လုံး ပျက်စီးသွားခဲ့သည်။
ယင်းကဲ့သို့ နေအိမ်အများအပြား ထိခိုက်ပျက်စီးသွားပြီးနောက် စစ်ရှောင်များသည် ၎င်းတို့နေရပ်အိမ် ပြန်လာချင်ကြသော်လည်း နေစရာ အိမ်မရှိတော့သဖြင့် မူဆယ်မြို့ရှိ စစ်ရှောင်စခန်းနှင့် တရုတ်ပြည်သို့ ထွက်ပြေးတိမ်းရှောင်နေရကြောင်း ပန်ဆိုင်းမြို့ စစ်ရှောင်တစ်ဦးက ပြောသည်။
“ ပန်ဆိုင်းမြို့မှာ အခုရက်ပိုင်း တိုက်ပွဲငြိမ်နေတော့ နေရပ်ပြန်သွားကြတာရှိတယ်။ ကိုးကန့်တပ်ဖွဲ့ ကလည်း ပြန်ဖို့ပြောတာလေ။ အိမ်ပြန်သွားတဲ့သူတွေက တိုက်ပွဲအတွင်း အိမ်မထိတဲ့သူတွေပေါ့။ နေအိမ်တွေ ထိထားတဲ့သူတွေက ပြန်လာဖို့နေသာသာ နေစရာအိမ်တွေလည်း မရှိတော့ဘူး။ နောက်ပြီး လက်နက်ကြီးကျမှာ စိုးရိမ်လို့ ပြန်မလာရဲတာရှိသေးတယ် “ ဟု ၎င်းစစ်ရှောင်တစ်ဦးက ပြောသည်။
လက်ရှိ နေရပ်အိမ်သို့ ပြန်လာကြသူများသည်လည်း ပန်းဆိုင်းမြို့ရှိ မိမိနေရပ်အိမ်တွင် ပုံမှန်အတိုင်း ပြန်လည်နေထိုင်နိုင်ကြသော်လည်း တိုက်ပွဲကြောင့် စိတ်ဒဏ်ရာခံစားနေရပြီး တိုက်ပွဲ ပြန်လည်ဖြစ်ပွားမည်ကို စိုးရိမ်နေသည်။
သျှမ်းမြောက်ဒေသတွင် “ ၁၀၂၇ စစ်ဆင်ရေး “ တိုက်ပွဲကြောင့် ၁ လကျော်ကြာတွင် သေဆုံးဦးရေမှာ ကလေးငယ်နှင့် အမျိုးသမီးအပါအဝင် ပြည်သူ ၈၁ ဦး အထိရှိပြီဖြစ်ကြောင်း သျှမ်းသံတော်ဆင့်မှ သီးခြားကောက်ယူထားသည့်စာရင်းအရ ဖြစ်သည်။
