သျှမ်းပြည် ကျောက်မဲမြို့တွင် စစ်ကောင်စီတပ်မှ လေကြောင်းဗုံးကြဲ တိုက်ခိုက်မှုကြောင့် ကျား/မ ခွဲခြားမရနိုင်အောင် ၄ ဦး မီးလောင်သေဆုံးသွားကြောင်း စုံစမ်းသိရသည်။
ကျောက်မဲမြို့နယ်တွင် ယမန်နေ့ (နိုဝင်ဘာ ၂၇ ရက်) ည ၉ နာရီအချိန်ခန့်က စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ရာ ကျောက်မဲအေးရှားဝေါလ် တိုးဂိတ်အနီးရှိ BOC ဓာတ်ဆီဆိုင်နှင့် အနီးရှိ နေအိမ်များ မီးလောင်ပျက်စီးခဲ့ပြီး ၎င်းပျက်စီးမှုကြားတွင် ကျား/မ ခွဲခြားမရနိုင်ဘဲ မီးလောင်သေဆုံးနေသော အလောင်း ၄ လောင်း တွေ့ရှိရသည်ဟု ကျောက်မဲဒေသခံများက ပြောသည်။
“ကျတော်တို့ ရွာသားတွေ တွေ့တာ။ အလောင်းက မီးလောင်ထားတော့ ရုပ်လဲခွဲလို့မရဘူး၊ မီးသွေးခဲလိုမျိုးကို ဖြစ်သွားတာ။ ခြေတွေ လက်တွေလဲ မီးကျွမ်းပြီး ခေါင်းတွေလဲ အကုန်မည်းနေပြီ။ အဲ့လို မီးလောင်ပြီး သေနေတဲ့အလောင်း ၄ လောင်းရှိတယ်။ အေးရှားဝေါနား ပန့်ဆီဆိုင်နဲ့ ကပ်လျက်က မီးလောင်ထားတဲ့ အိမ်မှာတွေ့တာ၊ စစ်သားလား ပြည်သူလား သေချာမသိဘူး”ဟု ကျောက်မဲမြို့ ပန်ပေါင်းဒေသခံတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (နိုဝင်ဘာ ၂၇ ရက်) ညအချိန်တွင် စစ်ကောင်စီတပ်၏ လေကြောင်းမှ ဗုံးကြဲတိုက်ခိုက်မှုကြောင့် မီးလောင်သေဆုံးသွားခဲ့သည့် အလောင်းများမှာ ကျား/မ ခွဲခြားမရဘဲ BOC ဓာတ်ဆီဆိုင်အပြင် အနီးရှိ တိုးဂိတ်နှင့် နေအိမ် ၁၀ လုံးခန့် မီးလောင်ပျက်စီးခဲ့ပြီး စက်သုံးဆီဆိုင်အနီး ရပ်နားထားသော တွဲကား ၂ စီးလည်း မီးလောင်ပျက်စီးခဲ့သည်ဟု ကျောက်မဲဒေသခံများထံမှ သိရသည်။
ထို့အပြင် ကျောက်မဲမြို့ ရန်ကင်းရပ်ကွက်မှ သက်ကြီးအဘွားအိုတစ်ဦးလည်း လက်နက်ကြီး ပစ်ခတ်သံကြောင့် ထိတ်လန့်ပြီး နှလုံးရပ်တန့်ကာ သေဆုံးသွားကြောင်းလည်း ကျောက်မဲမြို့ ဒေသခံများက ပြောသည်။
“ဟက်စကီးနဲ့ အပေါ်က ချတယ်။ ည ၈ ခွဲ ၉ နာရီလောက် ဖြစ်တာ။ ဖြစ်တာကတော့ မနေ့က နေ့လယ်ကတည်းက ချနေတာ။ ရန်ကင်းဘက်ကလဲ အဘွား ၁ ယောက်ဆုံးသွားတယ်။ သူကတော့ အိမ်ထဲမှာပဲ လက်နက်ကြီးသံကြောင့် ထိတ်လန့်ပြီး သေတာ။ မနေ့ညကတော့ တိုက်ပွဲပြင်းတယ်၊ လေယာဉ်နဲ့ကော လာတာဆိုတော့။ အခုလဲ နာရီခြား တစ်ခါလောက် လက်နက်ကြီးသံ ကြားနေရသေးတယ်”ဟု ကျောက်မဲမြို့မှ ၎င်းဒေသခံက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် နိုဝင်ဘာ ၂၇ ရက်ကလည်း စစ်ကောင်စီ၏ လက်နက်ကြီးကြောင့် ကျောက်မဲမြို့နယ် နမ့်ဟူးကျေးရွာမှ ဦးပဉ္ဇင်း ၁ ပါးနှင့် လွယ်ခေါ်ကျေးရွာမှ အမျိုးသမီးတစ်ဦးတို့ ထိခိုက်ဒဏ်ရာရရှိခဲ့ပြီး ကျောက်မဲပြည်သူ့ဆေးရုံတွင် ဆေးကုသမှု ခံယူနေကြောင်း ကျောက်မဲဒေသခံများထံမှ သိရသည်။
လက်ရှိတွင် ကျောက်မဲမြို့နယ် စစ်ကောင်စီတပ်နှင့် TNLA တပ်ဖွဲ့တို့ ထိတွေ့တိုက်ပွဲ ပြင်းထန်လျက်ရှိကာ ကျောက်မဲမြို့ရှိ စစ်ကောင်စီတပ်၏ မန်စံတပ်စခန်းကို TNLA တပ်ဖွဲ့မှ သိမ်းပိုက်ထားပြီး ကျောက်မဲမြို့အခြေစိုက် စစ်ကောင်စီတပ် ခမရ-၅၀၁/၅၀၂ နှင့် အမြောက်တပ်-၃၅၂ တို့မှ လက်နက်ကြီးများဖြင့် ရမ်းသမ်းပစ်ခတ်နေကြောင်း ကျောက်မဲဒေသခံများက ပြောသည်။
