မြန်မာ-တရုတ် နယ်စပ်ကုန်သွယ်ရေးဇုန် မူဆယ်မြို့နယ် ၁၀၅ မိုင်တွင် စစ်ကောင်စီနှင့် ညီနောင်မဟာမိတ် တိုက်ပွဲတို့ကြောင့် ကလေးအပါအဝင် ၃ဦး သေဆုံးမှုရှိပြီး၊ အရပ်သား ၅ ဦးဒဏ်ရာရရှိခဲ့ ကြောင်း စုံစမ်းသိရသည်။
မူဆယ် (၁၀၅) မိုင် 123 KTV လမ်းကြားတွင် ယနေ့ (နိုဝင်ဘာလ ၂၈) ရက် နံနက် ၅ နာရီခန့်၌ စစ်ကောင်စီနှင့် ညီနောင် မဟာမိတ်တပ်ဖွဲ့တို့ တိုက်ပွဲကြောင့် အမျိုးသား ၁ ဦးနှင့် အမျိုးသမီး ၂ ဦး လက်နက်ကြီး ထိမှန်ခဲ့ကြောင်း မူဆယ် (၁၀၅)မိုင်မှ ဒေသခံများက သျှမ်းသံတော်ဆင့်ကို ပြောသည်။
“ဒီမနက်မှာ နောက်ထက် ၃ ယောက်ထိသွားတာ။ကျနော်တို့ နံနက် ၅ နာရီကျော် မီးထမွှေးတော့ သူတို့ လက်နက်ကြီးတောင် စပစ်နေပြီ” ဟု မူဆယ်မြို့နယ် မှ အသက် ၅၀အရွယ်ရှိ အမျိုးသားတစ်ဦးက သျှမ်းသံတော်ဆင့်ကိုပြောသည်။
အလားတူ ယမန်နေ့ (နိုဝင်ဘာလ ၂၇)ရက် ည ၄နာရီခွဲခန့် မူဆယ် ၁၀၅ မိုင်ရှိ နမ္မတူ နွားခြံ တွင်လည်း စစ်ကောင်စီ၏ လေကြောင်း တိုက်ခိုက် မှုကြောင့် အသက် ၅ နှစ်အောက် ကလေးငယ် အပါအဝင် ၃ ဦးသေဆုံးပြီး၊ အရပ်သား ၂ ဦး ဒဏ်ရာရရှိခဲ့ကြောင်း ၁၀၅မိုင် ဒေသခံများက ပြောသည်။
“မနေ့က အူတွေထွက်နေတဲ့ကလေးက ဒီမနက်မှာ သေသွားတာ။ မနေ့ကတော့ ကလေးတစ်ယောက်နဲ့ ကလေး အမေဆုံးသွားတယ်။ အဖွားတစ်ယောက်နဲ့ အမျိုးသားတစ်ယောက် ဒဏ်ရာရတာပေါ့။ ကလေးတွေက လေယာဉ်လာလို့ထွက်ကြည် ပြီး အပစ်ခံရတာ ဒီနောက်ဆို လေယာဉ်လာလို့ ဗီဒီယိုရိုက်တာတွေ သတိထားသင့်တယ်။” ဟု အသက် ၅၀အရွယ်ရှိ အမျိုးသားတစ်ဦးက သျှမ်းသံတော်ဆင့်ကိုပြောသည်။
စစ်ကောင်စီ နှင့် ညီနောင်မဟာမိတ် ၃ ဖွဲ့တို့သည် ယနေ့ (နိုဝင်ဘာ ၂၈)ရက် အထိ တိုက်ပွဲများပြင်းထန်ပြီး မူဆယ်မြို့ထဲထိ လက်နက်ကြီးသံများ လေယာဉ်သံများ ကျယ်လောင်စွာကြားရသည်။
စစ်ကောင်စီဘက်မှ ယခုနောက်ပိုင်း လေကြောင်း တိုက်ခိုက်မှုကို ပိုမိုအသုံးပြုလာကြောင်း ပြည်သူများက ပြောသည်။
မူဆယ်မြို့နယ် (၁၀၅)မိုင်အနီးတွင် ယမန်နေ့ (နိုဝင်ဘာ ၂၆)ရက် ည ၇နာရီခွဲဝန်းကျင်မှ စပြီး စစ်ကောင်စီနှင့် ညီနောင်မဟာမိတ်တပ်ဖွဲ့တို့သည် တိုက်ပွဲပြင်းထန်ခဲ့ပြီး အမျိုးသားတစ်ဦး လက်နက်ကြီးစထိမှန်သေဆုံးကာ နေအိမ် နှင့် ဆိုင်ခန်းများလည်း ထိခိုက်ပျက်စီးမှုများရှိခဲ့ကြောင်း သိရသည်။
Leave a Comments