သျှမ်းပြည် တောင်ပိုင်း ပင်လောင်း၊ ညောင်ရွှေ၊ အင်းလေးနှင့် ဆီဆိုင် ဒေသများတွင် ကရင်နီပြည်မှ အရေးပေါ် တိမ်းရှောင်လာရသူများအတွက် အရေးပေါ် အကူအညီများလိုအပ်နေကြောင်း စစ်ရှောင်စခန်း တာဝန်ရှိသူများထံ စုံစမ်းသိရသည်။
ကရင်နီပြည်တွင် ဖြစ်ပွားသော တိုက်ပွဲများနှင့်၊ စစ်ကောင်စီ၏ လေကြောင်းတိုက်ခိုက် မှုများကြောင့် ကရင်နီပြည်သူများမှာ နီးစပ်ရာ သျှမ်းတောင် ဒေသအသီးသီးသို့ အသက်လုပြီး ထွက်ပြေးလာရသဖြင့် အဝတ်အစား၊ အသုံးအဆောင်ပစ္စည်းများ၊ စားစရာများ မသယ်ဆောင်နိုင်ခဲ့ကြောင်း စစ်ရှောင်ကူညီပေးသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
” ရုတ်တရက်ကြီး လိုက်ပြေးရတာ၊ ကားလည်း လမ်းကြုံလိုက်စီးရတော့ ဘာမှ ယူမလာနိုင်ဘူး။ အဓိက အရေးကြီးဆုံးက ဆန်နဲ့ဆီပေါ့။ အခု လောလောဆယ်တော့ အချင်းချင်း ကူညီပြီး ရှိသလို ချက်ပြုတ်စားနေရပေမယ့် လူကများတော့ မလောက်ငှဘူး။ ကိုယ့်ဒေသလည်း မဟုတ်တော့ ဟင်းရွက်ကအစ ဝယ်စားရတယ်။ပြောင်းမချိုးရခင် ပြေးလာခဲ့ရတော့ ပိုက်ဆံလည်း မရှိဘူး။ စားသောက်ဖို့အတွက် အရမ်းပူပန်နေရတယ်” ဟု အဆိုပါ အမျိုးသမီးမှ ပြောပြသည်။
စစ်ရှောင်ဦးရေက တစ်နေရာနှင့်တစ်နေရာ မတူညီဘဲ အချို့စခန်းများတွင် ယခင်ကတည်းက စစ်ရှောင်လာသည့် စစ်ရှောင်များ အပါအဝင် ထပ်ရောက်လာသူများဖြင့် စစ်ရှောင်ပေါင်း (၁၀၀၀၀)ကျော်ရှိပြီး အချို့နေရာများတွင် စစ်ရှောင်ဦးရေ (၈၀၀၀)ခန့် ရှိသည်ကိုလည်း သိရှိရသည်။
ထိုကဲ့သို့ စစ်ရှောင်ဦးရေများပြီး စစ်ရှောင်စခန်းများတွင် နေရာထိုင်ခင်း မလုံလောက် မှုကြောင့် ဘုန်းကြီးကျောင်းများနှင့် ဓမ္မာရုံများ၌ပါ အဆင်ပြေသလို လူစုပြီး နေထိုင်နေရကြောင်းလည်း သိရှိရသည်။
“အခုက နေစရာလည်း မလုံလောက်တော့ ကျပ်ကျပ်တည်းတည်းနေရတယ်။ အဓိက နေဖို့၊ အိပ်ဖို့ ရရင် တော်သေးတာပေါ့နော်။ အဲ့အတွက် မိုးကာတွေလည်း အရေးကြီးလိုတယ်။ အခု အင်္ကျီအနွေးထည်တွေ မရှိကြတော့ အရမ်းအေးတယ်။ ညဆိုလည်း စောင်တွေ မရှိတော့ အရမ်းအေးပြီး အိပ်ဖို့ခက်တယ်။ ကိုယ့်ဘေးနားက ကလေးတွေ၊ အဖိုးဖွားတွေကိုဆိုရင် ရှိတဲ့ တစ်ထည်၊နှစ်ထည် ပေးထားရတယ်” ဟု ၎င်းမှ ဆက်လက်ပြောသည်။
ယခုလက်ရှိ စစ်ရှောင်များထဲတွင် မွေးကင်းစ လသားအရွယ် ကလေးငယ်များ၊ မွေးဖွားခါနီး ကိုယ်ဝန်ဆောင်မိခင်များ၊ မသန်စွမ်းများနှင့် သက်ကြီးရွယ်အိုများအပါအဝင်ဖြစ်ပြီး ရာသီဥတု အပြောင်းအလဲကြောင့် နာမကျန်းဖြစ်ကြသူများလည်း ရှိနေပြီး ဆေးဝါးများ မရှိသည့်အတွက် အရေးပေါ် လိုအပ်နေကြောင်း စစ်ရှောင်များမှ ပြောပြသည်။
အဆိုပါ စစ်ရှောင်စခန်းများသို့ ယခုလက်ရှိ ကာလအတွင်း ကူညီထောက်ပံ့မည့် အဖွဲ့အစည်းများ လာရောက်ခြင်း မရှိသေးပေ။
ယခုချိန် စစ်ဘေးရှောင်များအတွက် သက်နိုင်သမျှ ကူညီနေသော်လည်း တိမ်းရှောင်ရသူ အရမ်းများသည့်အတွက် စားနပ်ရိက္ခာ၊ နေစရာများ မလုံလောက်သဖြင့် လက်လှမ်းမှီသလောက် ကူညီထောက်ပံ့မှုများ ပေးကြရန် လိုအပ်ကြောင်း စစ်ရှောင်စခန်း တာဝန်ရှိသူများမှ တောင်းဆိုထားသည်။
