မြန်မာ-တရုတ်ကုန်သွယ်ရေးဇုန် မူဆယ်မြို့နယ် မိုင်းယု (၁၀၅) မိုင် အောက်နမ့်ဟွယ်ကျေးရွာရှိ ဘုန်းကြီးကျောင်းထဲ ဒရုန်း ဗုံးပြုတ်ကျပြီး ပေါက်ကွဲမှုကြောင့် ကိုရင်ကြီး တစ်ပါး ထိမှန်ကာ ဒဏ်ရာရရှိခဲ့ပြီး အဆောက်အဦးများ ပျက်စီးသွားခဲ့ကြောင်း စုံစမ်း သိရသည်။
မူဆယ်မြို့နယ် မိုင်းယု (၁၀၅) မိုင် အောက်နမ့်ဟွယ်ကျေးရွာရှိ ဇေယျမင်္ဂလာကျောင်းတိုက် အတွင်းတွင် ယနေ့ (နိုဝင်ဘာလ ၂၂) ရက် ၁၁ နာရီခွဲကျော်၌ ဒရုန်းဗုံးပြုတ်ကျ ပေါက်ကွဲမှုကြောင့် ကိုရင်ကြီး တစ်ပါး ပေါင်နှစ်ဖက် ထိမှန်ပြီး ဒဏ်ရာ ရရှိခဲ့ကြောင်း မူဆယ် ၁၀၅ မိုင် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဟုတ်တယ် ဘုန်းကြီးကျောင်းထဲ ဒရုန်းဗုံးပြုတ်ကျပြီး ကိုရင်ကြီးတစ်ပါးထိသွားတာ ဟုတ်တယ်။ ဆေးရုံကိုပို့ လိုက်ပြီ”ဟု ၎င်းဒေသခံ က ပြောသည်။
ဒရုန်းဗုံးပြုတ်ကျ ပေါက်ကွဲမှုကြောင့် ကိုရင်ကြီးတစ်ပါး ပေါင်ထိခိုက်သွားပြီး ဘုန်းကြီးကျောင်းဆောင် (၃)ဆောင် နှင့် ကား ၂ စီးပျက်စီးသွားကြောင်း ဒေသခံများက ပြောသည်။
မြန်မာ-တရုတ်နယ်စပ် မူဆယ်မြို့နယ် မိုင်းယု (၁၀၅) မိုင်တွင် (နိုဝင်ဘာ ၁၆) ရက် တွင် လည်း စစ်ကောင်စီနှင့် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) တို့ တိုက်ပွဲဖြစ်ပွားမှုကြောင့် ကလေးတစ်ဦးနှင့်အမျိုးသမီး တစ်ဦး ကျည်ထိမှန်ခဲ့ကြောင်း စုံစမ်းသိရသည်။
Leave a Comments