ကရင်နီပြည် လွိုင်ကော်မြို့တွင် ၁၁.၁၁ စစ်ဆင်ရေးနောက်ပိုင်း စစ်ကောင်စီမှ ပြည်သူများ နေထိုင်သည့် ရပ်ကွက် များထဲသို့ လေယာဉ်များဖြင့် ဗုံးကြဲ တိုက်ခိုက်သည့်အတွက် ဒေသခံများ ထိခိုက်၊ သေဆုံး ကြရသလို နေအိမ်မှာ ပိတ်မိနေသည့် သူများလည်း ရှိသေးကြောင်း စုံစမ်းသိရသည်။

ပိတ်မိနေသည့် ကရင်နီ ဒေသခံများသည် ဘေးလွတ်ရာသို့ ရှောင်တိမ်းထွက်ပြေးနိုင်ရန် မြင့်မားသော ကားခများ မတတ်နိုင်သည့်အတွက် တိမ်းရှောင်ရန် ခက်ခဲနေသည်။

ယခင်က လွိုင်ကော်မှ ပင်လောင်း ကားခဈေးနှုန်းမှာ တစ်ဦးလျှင် နှစ်သောင်းကျပ်ခန့် ဖြစ်သော်လည်း ယခုတွင်မူ တစ်ဦးလျှင် နှစ်သိန်းကျပ်နီးပါး‌ ထိ ကောက်နေသောကြောင့် စစ်ပွဲဘေးမှ ထွက်ပြေးတိမ်းရှောင်ခဲ့သည် အမျိုးသမီး တစ်ဦး က သျှမ်းသံတော်ဆင့်ကို ပြောပြသည်။

“အရင်တစ်ခါက စစ်ရှောင်ရတာ ခက်ခဲလို့ နေရပ်ပြန်ပြီး ပြောင်းပြန်စိုက်တာ။ ပြောင်းလည်း မချိုးရသေးခင် အခုလို ပိတ်မိတော့ ပိုက်ဆံလည်း သုံးစရာမရှိဘူး။ ပင်လောင်းသွားဖို့ ကားခက လေးယောက်ကို (၈)သိန်းဆိုတော့ ငှားဖို့ အဆင်မပြေဘူး” ဟု ၎င်းမှ ဆက်ပြောသည်။

ကားခ ဈေးနှုန်းများ တက်ရခြင်း အကြောင်းမှာ ယခုကာလ အတောအတွင်း ဒေသအနှံ့အပြား စက်သုံးဆီများ ပြတ်လပ်သဖြင့် စက်သုံးဆီဝယ်ယူရရှိရန် ခက်ခဲပြီး လမ်းခရီး အခြေအနေတွင်လည်း မလုံခြုံသည့် အတွက်‌ကြောင့် ဖြစ်နိုင်သည်ဟု စစ်ရှောင်လာသူများ ပြောကြားချက်အရ သိရှိရသည်။

“ဘုရားကျောင်းမှာ နှစ်ရက်လောက်နေပြီး ဈေးသက်သာတဲ့ကားကို လိုက်ရှာရတာပေါ့။ ကားတိုင်း မဟုတ်ပေမယ့် တချို့ကားတွေတော့ အရမ်းဈေးကြီးတယ်။ အခုက တစ်ယောက် (၅)သောင်းနဲ့ ရခဲ့ပေမယ့် လက်ထဲလည်း ပိုက်ဆံမရှိတော့ အကြွေးနဲ့ စီးလာရတယ်။ လမ်းမှာ စစ်ရှောင်လာတဲ့ကားတွေ အရမ်းများတော့ ခရီးကကြာပြီး လွိုင်ကော်ကနေ မနက်(၄)နာရီမှာ စထွက်ခဲ့တာ၊ ပင်လောင်းကို ည(၆)နာရီကျော်လောက်ကမှ ရောက်တယ်” ဟု အဆိုပါ စစ်ရှောင်အမျိုးသမီးက ဆက်လက်ပြောပြသည်။

လွိုင်ကော်မြို့အတွင်း ကျန်ရှိနေသူများ တိမ်းရှောင်ရာတွင် ကားအခမဲ့ စီးနိုင်ရန် ကူညီကြသူများ ရှိနေသော်လည်း၊ ပိတ်မိသူမှာ အလွန်များသဖြင့် တတ်နိုင်သလောက်သာ ကူညီနိုင်ကြပြီး၊ အချို့ကူညီသည့် အဖွဲ့အစည်းများကို ဆက်သွယ် အကူညီတောင်းခဲ့သော်လည်း မရခဲ့ကြောင်း ၎င်အမျိုးသမီးက ပြောပြသည်။

လက်ရှိတွင် စစ်ကောင်စီမှ ပြင်းထန်စွာ လေကြောင်းဖြင့် ဆက်လက် တိုက်ခိုက်လျက်ရှိပြီး လွိုင်ကော်မြို့အတွင်း ကျန်ရှိနေသူများထဲတွင် ကိုယ်ဝန်ဆောင်မိခင်များ၊ ကလေးသူငယ်များနှင့် သက်ကြီးရွယ်အိုများ အပါအဝင် ဖြစ်ကာ အသက်အန္တရာယ် စိုးရိမ်ရသဖြင့် တတ်နိင်သည့်အားဖြင့် ခေါ်ထုတ် ကူညီပေးကြရန်၊ ခက်ခဲသည့်ကာလတွင် အချို့သူများ အကျိုးအမြတ် ထုတ်ခြင်းကို ရပ်တန့်ပေးရန် စစ်ရှောင်များမှ တောင်းဆိုထားသည်။