သျှမ်းပြည် နမ့်ဆန်မြို့နယ် အုမ်းစွမ်ကျေးရွာတွင် စစ်ကောင်စီမှ ရမ်းသမ်းပစ်ခတ်သည့် လက်နက်ကြီးကြောင့် ကျောင်းသူ ၁ ဦး ပွဲချင်းပြီး သေဆုံး၍ ၄ ဦး ဒဏ်ရာရရှိခဲ့ကြောင်း စုံစမ်းသိရသည်။
နမ့်ဆန်မြို့နယ်တွင် ယမန်နေ့ (နိုဝင်ဘာ ၂၀ ရက်) ညသန်းခေါင် ၁၁ နာရီခွဲကျော်၌ နမ့်ဆန်မြို့နှင့် မိုင်းငေါ့မြို့တို့ရှိ စစ်ကောင်စီတပ်များမှ လက်နက်ကြီးဖြင့် ရမ်းသမ်းပစ်ခတ်ခဲ့ရာ အုမ်းစွမ်ကျေးရွာသို့ ကျရောက်ပေါက်ကွဲခဲ့ပြီး အသက် ၁၄ နှစ်အရွယ်ရှိ လွေးမြသန္တာလင်း ဆိုသည့် ၆ တန်းကျောင်းသူတစ်ဦး ပွဲချင်းပြီး သေဆုံးသွားခဲ့ပြီး ၄ ဦး ထိခိုက်ဒဏ်ရာရရှိခဲ့ကြောင်း နမ့်ဆန်ဒေသခံများက ပြောသည်။
“ညသန်းခေါင် ၁၁ နာရီခွဲကျော်လောက်မှာ လက်နက်ကြီးကျတာတော့ အုမ်းစွမ်ရွာရဲ့ ကုန်းပေါ် ရွာသစ်ဘက်ပေါ့။ အဲမှာ နေအိမ်တစ်လုံးပေါ် ကျပြီးတော့ ၆ တန်းကလေး ထိသွားတယ်။ မ ၂ ယောက်နဲ့ ကျား ၂ ယောက်လဲ ဒဏ်ရာရတာပေါ့။ ဘေးအိမ်က တစ်ယောက်လည်း ပါတယ်။ ဆုံးသွားတဲ့ တစ်ယောက်က လွေးမြသန္တာလင်း၊ အသက်က ၁၄ နှစ်။ ဒဏ်ရာရရှိတဲ့ သူ့အဖေအမေနဲ့ အစ်ကိုရယ်၊ အိမ်သားတွေထဲ ၃ ယောက် ဒဏ်ရာရတယ်”ဟု နမ့်ဆန်မြို့နယ် အုမ်းစွမ်ဒေသခံတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်၏ လက်နက်ကြီးကြောင့် ၆ တန်းကျောင်းသူ လွေးမြသန္တာလင်းသည် ရင်ဘတ်ထိမှန်ဒဏ်ရာဖြင့် ပွဲချင်းပြီး သေဆုံးသွားခဲ့ကာ ၎င်း၏ မိဘဖြစ်သူတို့တွင် နဖူးနှင့် ကျောကုန်းထိမှန်ဒဏ်ရာ၊ အသက် ၁၉ နှစ်အရွယ်ရှိ အစ်ကိုဖြစ်သူတွင် လက်မောင်းထိမှန်ဒဏ်ရာ အသီးသီးရရှိခဲ့ပြီး အုမ်းစွမ်ကျေးရွာတွင် ဆေးကုသပေးလျက်ရှိကြောင်း နမ့်ဆန်မြို့နယ်မှ ၎င်းအုမ်းစွမ်ဒေသခံက သျှမ်းသံတော်ဆင့်ကို ဆက်ပြောသည်။
ထို့အပြင် အုမ်းစွမ်ကျေးရွာတွင် လက်နက်ကြီးကျရောက် ပေါက်ကွဲခြင်းကြောင့် အနီးရှိ နေအိမ်တစ်လုံးလည်း ထိခိုက်ပျက်စီးကာ ၎င်းနေအိမ်ရှိ အသက် ၁၃ နှစ်အရွယ် မိန်းကလေးတစ်ဦးတွင်လည်း ဦးခေါင်းထိမှန်ဒဏ်ရာ ရရှိခဲ့ကြောင်း နမ့်ဆန်မြို့နယ် အုမ်းစွမ်ဒေသခံများထံမှ သိရသည်။
အလားတူ နမ့်ဆန်မြို့နယ် ပန်နင်းရွာတွင်လည်း ယမန်နေ့ (နိုဝင်ဘာ ၂၀ ရက်) နေ့လည် ၁၂ နာရီအချိန်ခန့်က နမ့်ဆန်မြို့အခြေစိုက် စစ်တပ်စခန်းကုန်းမှ ပစ်ခတ်လိုက်သည့် လက်နက်ကြီးကြောင့် အသက် ၈၅ နှစ်အရွယ် အဖွားအိုတစ်ဦး ဘယ်ဘက်ခြေထောက် ထိမှန်ဒဏ်ရာရရှိခဲ့ကြောင်း တအာင်းအမျိုးသမီးအဖွဲ့ (TWO)က ယနေ့ (နိုဝင်ဘာ ၂၁ ရက်)တွင် ထုတ်ပြန်ထားသည်။
ပြီးခဲ့သည့် နိုဝင်ဘာ ၁၉ ရက် ည ၁၁ နာရီကျော်အချိန်ခန့်တွင်လည်း စစ်ကောင်စီတပ်က နမ့်ဆန်မြို့နယ် မြို့သစ်ကျေးရွာသို့ လေကြောင်းမှ ပေါင် ၅၀၀ ဗုံးဖြင့် ကြဲချသဖြင့် ဦးဆန်နော၏ နေအိမ်ပေါ်သို့ ကျရောက်ပေါက်ကွဲခဲ့ပြီး ဦးဆန်နောနှင့် ကလေး ၂ ဦးမှာ ပွဲချင်းပြီး သေဆုံးသွားခဲ့ပြီး ၇ ဦး ထိခိုက်ဒဏ်ရာ ရရှိခဲ့ကြောင်း နမ့်ဆန်ဒေသခံများက ပြောသည်။
နမ့်ဆန်မြို့နယ်တွင် တိုက်ပွဲတစုံတရာ ဖြစ်ပွားခြင်းမရှိဘဲ စစ်ကောင်စီတပ်မှ လေကြောင်းနှင့် လက်နက်ကြီး ရမ်းသမ်းပစ်ခတ်မှုကြောင့် ကလေး ၃ ဦးအပါအဝင် အပြစ်မဲ့ပြည်သူ ၄ ဦးသေဆုံးပြီး ၁၀ ဦးထက်မနည်း ထိခိုက်ဒဏ်ရာရရှိကာ ပြည်သူနေအိမ် ၂၀ ကျော် ထိခိုက်ပျက်စီးခဲ့ကြောင်း သိရသည်။
