သျှမ်းပြည် နောင်ချိုမြို့နယ်ရှိ ဒိုးပင်ရဲစခန်းကို စစ်ကောင်စီမှ လေကြောင့်ဖြင့် ဗုံးကြဲတိုက်ခိုက်ခဲ့ရာ စစ်သုံ့ပန်း ၄ ဦး သေဆုံးပြီး ၁၀ ဦးကျော် ဒဏ်ရာရရှိခဲ့ကြောင်း စုံစမ်းသိရသည်။
TNLA နှင့် မန္တလေး-PDF ပူးပေါင်းတပ်ဖွဲ့တို့က သိမ်းယူထားသည့် နောင်ချိုမြို့နယ်ရှိ ဒိုးပင်ရဲစခန်းကို စစ်ကောင်စီတပ်မှ ယမန်နေ့ (နိုဝင်ဘာ ၁၉ ရက်) ည ၉ နာရီခန့်တွင် လေကြောင်းမှ ဗုံးကြဲတိုက်ခိုက်ခဲ့သည်။
ထိုဗုံးကြဲမှုကြောင့် TNLA နှင့် မန္တလေး-PDF ပူးပေါင်းတပ်ဖွဲ့က ဖမ်းဆီးထိန်းသိမ်းထားသော စစ်ကောင်စီလက်အောက်ခံ အကျဥ်းဦးစီးဌာန မှ စစ်သုံ့ပန်း ၄ ဦး သေဆုံးပြီး ၁၀ ဦးကျော် ထိခိုက်ဒဏ်ရာ ရရှိခဲ့ကြောင်း နောင်ချိုဒေသခံများက ပြောသည်။
“အရင်ည (နိုဝင်ဘာ ၁၉ ရက်)က ဒိုးပင်ရဲစခန်းကို ည ၉ နာရီလောက် လေယာဉ်နဲ့ ဗုံးလာကြဲသွားတာ။ အဲ့မှာ TNLA နဲ့ PDF တွေခေါ်လာတဲ့ အကျဉ်းဦးစီးက လူတွေလို့ပြောတယ်။ ကုန်းစံတို့ ဟိုခိုတို့ဘက်က ဖမ်းလာတဲ့ အကျဉ်းဦးစီးက သုံ့ပန်းတွေလို့ ပြောတာပဲ။ ၄ ယောက်သေပြီး အများကြီး ထိတယ်။ စစ်ကောင်စီတပ်နဲ့ ရဲတွေတော့ ဒီမှာမရှိဘူး”ဟု နောင်ချိုမြို့ ဒိုးပင်ဒေသခံတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (နိုဝင်ဘာ ၁၉ ရက်)က နောင်ချိုမြို့နယ်ရှိ လွင်ကြီး၊ ကြူအင်း၊ ဟိုခိုနှင့် ကုန်းစံ အကျဉ်းဦးစီးစခန်း (၄)ခုတို့ကို TNLA နှင့် မန္တလေး-PDF ပူးပေါင်းတပ်ဖွဲ့တို့က တိုက်ခိုက်သိမ်းပိုက်ခဲ့ပြီး ၎င်းစခန်း ၄ ခုမှ စစ်ကောင်စီလက်အောက်ခံ ဝန်ထမ်းများကို ဒိုးပင်ရဲစခန်းသို့ ဖမ်းဆီးခေါ်ဆောင်လာခြင်းဖြစ်ကြောင်း နောင်ချိုဒေသခံများထံမှ သိရသည်။
နောင်ချိုမြို့နယ် ဒိုးပင်ကျေးရွာအနီးတဝိုက်တွင် တိုက်ပွဲတစုံတရာ ဖြစ်ပွားခြင်းမရှိဘဲ ဒိုးပင်ရဲစခန်းကို စစ်ကောင်စီတပ်က လေကြောင်းဗုံးကြဲ တိုက်ခိုက်ခဲ့ခြင်းကြောင့် ပြည်သူနေအိမ် ၁ လုံး ထိခိုက်ပျက်စီးပြီး ဒေသခံပြည်သူ ထိခိုက်မှုမရှိကြောင်း နောင်ချိုဒေသခံများက ပြောသည်။
“ရဲစခန်းမှာ လာချတုန်းကတောင်မှ ဘုန်းကြီးကျောင်းဘက်ထိ ဗုံးဆံရောက်တယ်။ ဘုန်းကြီးကျောင်း အရှေ့က အိမ်တစ်လုံးပေါ်မှာလဲ ကျတယ်၊ သွပ်လဲပေါက်တယ်။ ကွပ်ပျစ်ခင်းထားတဲ့ ၆/၃ မတ် ပျဉ်တောင်မှ ပေါက်သွားတယ်။ အဲ့အစက ကြီးတယ်၊ ၁ ထွာလောက်ရှိတယ်၊ ထက်လဲ ထက်တယ်။ ရွာထဲက လူထိတာတော့ မရှိဘူး”ဟု နောင်ချိုမြို့နယ်မှ ၎င်းဒိုးပင်ဒေသခံက သျှမ်းသံတော်ဆင့်ကို ဆက်ပြောသည်။
နောင်ချိုမြို့နယ်တွင် “၁၀၂၇ စစ်ဆင်ရေး”စတင်ပြီး ၃ ပတ်အတွင်း ကလေး ၂ ဦးအပါအဝင် ၅ ဦးထက်မနည်း သေဆုံးပြီး ပြည်သူ ၂၀ ကျော် ထိခိုက်ဒဏ်ရာ ရရှိကာ နှစ်ဖက်တိုက်ပွဲအတွင်း စစ်ကောင်စီတပ်မှ ကျောက်ကြမ်း၊ အုမ္မသီးနှင့် နမ့်တိန်းဝမ်းကျေးရွာရှိ လူငယ်များကို လူသားဒိုင်းကာအဖြစ် ဖမ်းဆီးခေါ်ဆောင်သွားခြင်းများလည်း ရှိနေသည်ဟု သိရသည်။
