သျှမ်း-ကရင်နီ(ကယား)နယ်စပ်တစ်လျှောက် ၁၁_၁၁ စစ်ဆင်ရေးကြောင့် ၊လွိုင်ကော်မြို့မှ စစ်ဘေးရှောင်လာကြသည့် ပြည်သူများကို သျှမ်းပြည်နယ် တောင်ကြီးမြို့၊ အေးသာယာမြို့သစ်၊ ရွှေညောင်မြိုနှင့်ကျောက်တလုံးကြီးကျေးရွာတို့တွင် နိုဝင်ဘာလ ၁၉ရက်မှ စတင်ကာ တရားဝင်လက်ခံခွင့်ပြုလိုက်ကြောင်း စစ်ဘေးရှောင်အကူညီပေးရေး အဖွဲ့များထံမှ စုံစမ်းသိရသည်။
လက်ရှိတွင် သျှမ်းပြည်နယ် တောင်ကြီးခရိုင်အတွင်းရှိ တောင်ကြီးမြို့၊ညောင်ရွှေမြို့၊ပင်လောင်းမြို့၊ဟိုပုန်းမြို့၊အောင်ပန်းမြို့၊နောင်တရားမြို့နှင့် ဆီဆိုင်မြို့တို့ရှိ ရပ်ကွက် ကျေးရွာများအတွင်းသို့ ရောက်ရှိနေကြသည့် လွိုင်ကော်စစ်ဘေးရှောင်များအပြင် နေစရာ မရရှိသေးသူများအတွက် အေးသာယာမြို့သစ်၊ရွှေညောင်မြို့နှင့် ကျောက်တစ်လုံးကျေးရွာတို့တွင် လက်ခံနေရာချပေးနေပြီဖြစ်ကြောင်း သိရသည်။
“တစ်ရက်ကို လူ ၁၅၀လောက် ပုံမှန်ဝင်နေတယ်၊တစ်ချို့က စစ်ဘေးရှောင်လာတယ်ဆိုပေမယ့် သူတို့မိဘ ဆွေမျိုးတွေက ဒီဘက်မှာရှိတော့ အဆင်ပြေတယ် တချို့ကလည်း ဘုန်းကြီးကျောင်းတွေပေါ့နော် ဒါကို အရင်ရက်တွေက စစ်ရှောင်တွေကို လက်မခံဖို့ အထက်က ညွှန်ကြားထားလို့ဆိုပြီး လုပ်တော့ ကိုယ့်ဆွေမျိုးသားချင်းတောင် လက်မခံရမဲ့ ပုံမျိုး၊တော်သေးတယ် အခုလို တရားဝင်လက်ခံလိုက်တော့ ရဲရဲဝံ့ဝံ့လုပ်ရတာပေါ့” ဟု စစ်ရှောင်များကိုကူညီပေးနေသည့် ပရဟိတသမားတစ်ဦးမှ သျှမ်းသံတော်ဆင့်သို့ပြောသည်။
ပြီးခဲ့သည့် ရက်ပိုင်းတွင်လည်း အင်းလေးဒေသနှင့် ပင်လောင်းမြို့နယ်တို့၌ ကရင်နီစစ်ဘေးရှောင်များကို လက်မခံကြရန် လော်စပီကာဖြင့် လိုက်လံပြောဆိုနေမှုများ ပြုလုပ်ကြသဖြင့် စစ်ဘေးရှောင် ယာဉ်တန်းများ လမ်းတဝက်နှင့် အခက်အခဲ များစွာဖြစ်ပေါ်ခဲ့ရကြောင်း စုံစမ်းသိရှိရသည်။
” လွိုင်ကော်မှာ ဘယ်လိုမှ နေလို့မရတော့လို့ ကိုယ့်အိုးအိမ်တွေကို စွန့်ပြီး လာခဲ့ကြရတာပါဗျာ။တည်းခိုခန်းပိုင်ရှင်တချို့က လာနေပါ အခမဲ့ပါတဲ့ ဆိုလို့ လာခဲ့ကြတာ ကျေးဇူးတင်တယ် ကျနော်တို့က ဒီဘက်မှာ ဆွေမျိုးမရှိကြဘူး ဒုက္ခရောက်နေကြသူကို ကူညီကြတာ လူ့စိတ်ရင်းအမှန်ဘဲလေ လူစိတ်ရှိသူတွေက ကူညီ ကယ်တင်ကြတယ်” ဟု အင်းလေးဒေသရောက် စစ်ဘေးရှောင်တစ်ဦးမှ ပြောသည်။
ပြီးခဲ့သည့် နိုဝင်ဘာလ ၁၁ရက်နေ့ကစတင်ခဲ့သည့် “၁၁.၁၁ စစ်ဆင်ရေး”ကြောင့် ကယားပြည်နယ် လွိုင်ကော်မြို့တွင် စစ်ကောင်စီနှင့် ပြည်သူ့ကာကွယ်ရေးတပ်ဖွဲ့တို့အကြား တိုက်ပွဲများ နေ့စဉ် ဖြစ်ပွားလျှက်ရှိရာ စစ်ကောင်စီလေကြောင်း ပစ်ခတ်မှုကြောင့် မြို့တွင်း၌ ပိတ်မိနေသည့် ဒေသခံများထဲမှ လူ ၅၀နီးပါး သေဆုံးပြီး လူဦးရေ ငါးသောင်းနီးပါး သျှမ်းပြည်အတွင်းသို့ စစ်ဘေးရှောင်လာနေကြကြောင်း သိရသည်။
သျှမ်းပြည်တောင်ပိုင်း၊ ပအိုဝ်းအမျိုးသားလွတ်မြောက်ရေးအဖွဲ့ချုပ် PNLOက လည်း စစ်ဘေးရှောင်ပြည်သူများကို နေစရာအိမ်အပြင် စားစရာများဖြင့်ပါ ကူညီပေးနေကြောင်း သိရှိရသည်။
