သျှမ်းပြည် နမ့်ခမ်းမြို့တွင် တိုက်ပွဲများဆက်လက်ပြင်းထန်နေပြီး စစ်ကောင်စီဘက်မှ ဂျက်ဖိုက်တာလေယာဉ်ဖြင့် ပစ်ခတ်မှုကြောင့် အရပ်သားနေအိမ်များ ထိခိုက် ပျက်စီးမှု ရှိကြောင်း စုံစမ်းသိရသည်။
နမ့်ခမ်းမြို့တွင် ယနေ့ (နိုဝင်ဘာလ ၂၀ ရက်) နံနက် ၇ နာရီကျော်မှ စပြီးစစ်ကောင်စီနှင့် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) တို့ တိုက်ပွဲများပြင်းထန်ပြီး ညနေ (၄)နာရီကျော်တွင် စစ်ကောင်စီဘက်မှ ဂျက်လေယာဥ်ဖြင့် ပစ်ခတ်ကာ နမ့်ခမ်းမြို့ စာရေးတန်းရပ်ကွက်တွင် နေအိမ်တစ်လုံး ထိခိုက်ကာ မီးလောင်ခဲ့ပြီး ဘေးအိမ်များလည်း ထိခိုက်မှုရှိကြောင်း နမ့်ခမ်းဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
“ ဒီနေ့ စာရေးတန်းက အိမ်ကို လက်နက်ကြီးထိတယ်။ ။ လူတော့ မထိဘူး။ ဘေးအိမ်က မှန်တွေတော့ထိတာရှိတယ်။ ပစ်နေတာတော့ လေယာဥ်တစ်စီးပဲ” ဟု နမ့်ခမ်းမြို့ ဒေသခံအမျိုးသားက ဆိုသည်။
ထို့အပြင် နမ့်ခမ်းမြို့ ပြည်သူ့ဆေးရုံ အနီးအနားတွင် TNLA တပ်သားများလှုပ်ရှားမှုရှိပြီး၊ ဆေးရုံထဲ တပ်စွဲထားခြင်း ရှိ၊ မရှိကို အတည်ပြု မပြောဆိုနိုင်ကြောင်းလည်း နမ့်ခမ်း သတင်းရင်းမြစ်များက ပြောသည်။
“ နမ့်ခမ်းဆေးရုံပတ်ဝန်းကျင်မှာတော့ TNLA တပ်သားတွေသွားလာနေတာ။ ဆေးရုံက ဆရာဝန်တွေ၊ ဆရာမတွေတော့ လူနာတွေတော့မရှိဘူး၊ TNLA တော့ ဝင်၊ထွက်နေတာပဲ။ ကျနော်တို့လည်း လှမ်းပဲမြင်ရတာ သွားကြည့်လို့မရဘူးလေ” ဟု နမ့်ခမ်းမြို့ ဒေသခံ သတင်းရင်းမြစ် အမျိုးသားတစ်ဦးက ဆိုပြန်သည်။
လက်ရှိ လူမှုကွန်ရက် သတင်းများအရ TNLA တပ်သားများသည် နမ့်ခမ်းမြို့ ပြည်သူ့ဆေးရုံတွင် တပ်စွဲထားပြီး ဆေးကုသနေကြောင်း၊ TNLA တပ်သားများရှိနေသည့်အတွက် လူနာများနှင့် ဆရာဝန်၊ သူနာပြုများလည်း ဆေးရုံတွင် မနေရဲကြောင်း ရေးသားပြောဆိုထားသည်။
ထိုကိစ္စနှင့် ပတ်သက်ပြီး သျှမ်းသံတော်ဆင့်အနေဖြင့် အတည်ပြုနိုင်ရန် TNLA မှ ပြောရေးဆိုခွင့်ကို ဆက်သွယ်သော်လည်း မရရှိခဲ့ပေ။
စစ်ကောင်စီနှင့် TNLA တပ်ဖွဲ့သည် နမ့်ခမ်းမြို့နယ်အတွင်း အောက်တိုဘာ ၂၉ရက်မှ စတင်ပြီး စစ်ရေးထိတွေ့မှုဖြစ်ပွားခဲ့ရာ နိုဝင်ဘာ ၃ရက်တွင် နမ့်ခမ်းမြို့ပေါ်သို့ တိုက်ပွဲ ကျယ်ပြန့်လာခဲ့သည်။
ထို နှစ်ဖက် စစ်ရေးပြင်းထန်မှုများကြောင့် နမ့်ခမ်းမြို့နယ်မှ စစ်ဘေးရှောင်ဦးရေ ၆၀၀၀ ကျော်သည် တရုတ်နယ်စပ်နှင့် မူဆယ်မြို့နယ်တို့တွင် ထွက်ပြေးတိမ်းရှောင်နေရသည်။ ထိုစစ်ဘေးရှောင်များကို ယနေ့ထိ သျှမ်းလူထုများက ကူညီဆောင်ရွက်ပေးနေကြောင်း သိရသည်။
Leave a Comments