သျှမ်းပြည် ကျောက်မဲမြို့တွင် ဂုတ်တွင်းလမ်းပိုင်းမှတဆင့် ကျောက်မဲမြို့အခြေစိုက် စစ်ကောင်စီတပ်များသို့ အင်အားအများအပြား ဖြည့်တင်းနေကြောင်း စုံစမ်းသိရသည်။
ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသည့် စစ်ကား အစီး ၄၀ ကျော်နှင့် သံချပ်ကာ ၁ စီး ပါဝင်သော စစ်ကောင်စီယာဉ်တန်းသည် ဂုတ်တွင်းလမ်းပိုင်းမှတဆင့် ယမန်နေ့ (နိုဝင်ဘာ ၁၉ ရက်) ည ၈ နာရီခန့်တွင် ကျောက်မဲမြို့တွင်းသို့ဖြတ်၍ ခမရ-၅၀၁/၅၀၂ တပ်သို့ ဝင်ရောက်သွားကြောင်း ကျောက်မဲဒေသခံများက ပြောသည်။
“နောင်ချိုကနေ ဂုတ်တွင်းဖြတ်ပြီး သူတို့ စစ်ကားတွေ အများကြီး ကျောက်မဲထဲကို ဖြတ်ဝင်လာတယ်။ ညဦးပိုင်းလောက် ဝင်လာတာ များတယ်။ သူတို့ ညမိုးချုပ်မှ မီးပိတ်ပြီးတော့ အဖွဲ့လိုက် ဝင်လာတာ။ ကြားထဲမှာ ကုန်ကားတွေ ညပ်ပြီးတော့ အစီး ၄၀ ကျော်လောက်ရှိမယ် လာတာ သံချပ်ကာ ၁ စီးကော ပါတာ။ ခမရ-၅၀၁/၅၀၂ တပ်ထဲကို ၈ နာရီကျော်လောက် ဝင်သွားကြတယ်”ဟု ကျောက်မဲဒေသခံတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (နိုဝင်ဘာ ၁၉ ရက်) ည ၆ နာရီခန့်မှစ၍ ကျောက်မဲမြို့တွင်းသို့ ဝင်ရောက်လာသော စစ်ကောင်စီယာဉ်တန်းတွင် သံချပ်ကာယာဉ် ၁ စီး အပါအဝင် စစ်သည်အပြည့် တင်ဆောင်လာသော ကားများနှင့် မိုးကာအလုံပိတ်ကာ လက်နက်ခဲယမ်းများ တင်ဆောင်လာသည်ဟု ယူဆရသည့် ကားများ စုစုပေါင်း အစီး ၄၀ ကျော် ပါဝင်ကြောင်း ၎င်းကျောက်မဲဒေသခံက သျှမ်းသံတော်ဆင့်ကို ဆက်ပြောသည်။
နောင်ချို-ကျောက်မဲအကြားရှိ ဂုတ်တွင်းလမ်းပိုင်းကို နိုဝင်ဘာ လဆန်းပိုင်းမှ စ၍ TNLA နှင့် မန္တလေး-PDF ပူးပေါင်းတပ်ဖွဲ့တို့က ထိန်းချုပ်ထားခဲ့ပြီး စစ်ကောင်စီတပ်မှ လေကြောင်းစစ်ကူဖြင့် အပြင်းအထန် ပြန်လည်တိုက်ခိုက်ခဲ့ရာ ၃ ပတ်ခန့်အကြာတွင် ကျောက်မဲမြို့တွင်းသို့ ယခုကဲ့သို့ စစ်ကောင်စီယာဉ်တန်းများ ရောက်ရှိလာခြင်းဖြစ်သည်။
“ဂုတ်တွင်းကနေ မနေ့ကစစ်ကားတွေ အများကြီး ဖြတ်လာပြီဆိုတော့ ကားသေးတွေလဲ သွားလို့ရလောက်ပြီ။ လမ်းကတော့ မနေ့က ညနေပိုင်းလောက်ကတည်းက ပြင်ပြီးပြီပြောတယ်။ နောင်ပိန်လမ်းခွဲလောက်ကနေ အဲ့မှာစောင့်တဲ့ စစ်သားတွေက မဖွင့်ပေးသေးတာ။ တိုက်ပွဲအခြေအနေက လောလောဆယ်တော့ ငြိမ်နေပါသေးတယ်”ဟု ကျောက်မဲ-မန္တလေး ခရီးစဉ် ပြေးဆွဲနေသည့် ကားသမားတစ်ဦးက ဂုတ်တွင်းလမ်းပိုင်း အခြေအနေကို သျှမ်းသံတော်ဆင့်သို့ ပြောသည်။
နိုဝင်ဘာ လဆန်းပိုင်းမှ စ၍ ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသော စစ်ကောင်စီယာဉ်တန်းကို နောင်ချိုမြို့နယ် အုမ္မသီးလမ်းခွဲနှင့် ရွှေညောင်ပင်ကျေးရွာတို့တွင် TNLA နှင့် မန္တလေး-PDF ပူးပေါင်းတပ်ဖွဲ့တို့ ဖြတ်တောက်တိုက်ခိုက်ခဲ့ရာ စစ်ကောင်စီတပ်၏ သံချပ်ကာ ၁ စီးကို ဖျက်စီးနိုင်ခဲ့ပြီး ဆမ္မဆယ်ကျေးရွာအုပ်စုမှ စစ်ဘေးရှောင်ဦးရေ ၂၅၀၀ ကျော်သည် ဘန့်ဘွေး၊ သုံးဆယ်၊ အင်းဝိုင်းရှိ ကျေးရွာဘုန်းကြီးကျောင်းများနှင့် ပြင်ဦးလွင်မြို့ဘက်သို့ ထွက်ပြေးတိမ်းရှောင် နေကြကြောင်း သိရသည်။
အလားတူ စစ်ကောင်စီတပ်၏ ၎င်းယာဉ်တန်းသည် ကျောက်မဲ၊ သီပေါ၊ လားရှိုးမြို့များသို့ ချီတက်နိုင်ရန်အတွက် ဂုတ်တွင်းလမ်းပိုင်းကို လေကြောင်းပစ်ကူဖြင့် အစွမ်းကုန် ထိုးဖောက်ခဲ့ရာ TNLA ၊ မန္တလေး-PDF ပူးပေါင်းတပ်ဖွဲ့တို့နှင့် တိုက်ပွဲပြင်းထန်ခဲ့ပြီး ကျောက်မဲမြို့နယ် နောင်ပိန်တိုက်နယ်တွင် စစ်ဘေးရှောင် ၁၅၀၀ ကျော် ထွက်ပြေးတိမ်းရှောင်နေရသည်။
Leave a Comments