သျှမ်းပြည်တောင်ပိုင်း ပင်လုံမြို့ ပန်မုန့်အုပ်စုအတွင်း ကရင်နီပြည်သို့ ပို့ဆောင်မည့် လက်နက်ခဲယမ်းများ ဖမ်းဆီးရမိကြောင်း စစ်ကောင်စီက ယနေ့ နိုဝင်ဘာ (၁၇) ရက် မှာ ထုတ်ပြန်ထားသည်။

အဆိုပါ လက်နက်ခဲယမ်းများကို နိုဝင်ဘာ (၁၆) ရက်တွင် ပင်လုံမြို့ ပန်မုန့်အုပ်စု ဝမ်လွယ်တပ်ကျေးရွာရှိ ပေတူး (ခ) မာရီယာနို နေအိမ်ခြံဝင်းအတွင်းရှိ ဂိုထောင်အဆောက်အဦးထဲ ကရင်နီ (ကယား) ပြည်ရှိ တိုင်းရင်းသားလက်နက်ကိုင်များဖြစ်ကြသည့် KNPP နှင့် PDF တို့ကို ပို့ဆောင်ပေးမည့် လက်နက်များဖြစ်ကြောင်း စစ်ကောင်စီ၏ ထုတ်ပြန်ချက်တွင် ရေးသားထားသည်။

“အဲကြောင့် ဒီနေ့ စစ်သားတွေ လွိုင်လင်ဘက် လက်နက်တွေ အပြည့်သယ်သွားတာ တွေ့ရတယ်။ ၁၂ ဘီးကား နဲ့ စစ်သားအပြည့်ပဲ” ဟု ပင်လုံဒေသခံ တစ်ဦး ကပြောသည်။

လက်နက်ခဲယမ်းများနှင့်အတူ ဖမ်းဆီးရမိသည့် တရားခံ (၆) ဦးကို ဥပဒေအရ ထိရောက်စွာ အရေးယူသွားမည်ဟုလည်း ဖော်ပြထားသည်။

“လွိုင်လင်ဘက်မှာလည်း စစ်သားတွေ၊ ရဲတွေ သွားလာနေတာ ရှုပ်နေတာပဲ။ ကြည့်ရတာ စစ်ဆေးမှုတွေ ပြုလုပ်နေတာထင်တယ်။” ဟု လွိုင်လင်ဒေသခံ တစ်ဦး ကပြောသည်။

စစ်ကောင်စီမှ ဖမ်းဆီးရမိသည့် လက်နက်များမှာ RPG ဒုံးပစ်လောင်ချာ ၁၂ လက်၊ တရုတ် စက်လတ် ၉ လက်၊ Type – 81 မောင်းပြန်ရိုင်ဖယ် ၁၀၉ လက်၊ စုစုပေါင်း လက်နက်မျိုးစုံ ၁၃၀ လက်၊ RPG ဒုံးသီး ၁၀၆ လုံး၊ စုစုပေါင်း ဗုံးသီးမျိုးစုံ ၇၆၃၂ လုံး၊ ၇.၆၂ ကျည် ၁၃၆၇၀ တောင့်၊ ၁၀၇ မမ စနက်အုံ ၁၀၀ ခု၊ လက်နက်ငယ်ပြောင်း အပို ၅၀၀ ချောင်း၊ ကျည်အိမ်မျိုးစုံ ၁၈၂၉ ခု၊ TNT ယမ်း ၉၅၀ ကီလိုဂရမ်၊ အမိုနီယမ် နိုက်ထရိတ် ၂၀၀ ကီလိုဂရမ်၊ Equipment ၂၀၀၀ စုံ ၊ Canter အမျိုးအစား (လိုင်စင်မဲ့) ၆ ဘီးယာဥ် ၃ စီး၊ Ford အမျိုးအစား (လိုင်စင်မဲ့) မော်တော်ယာဥ် ၁ စီး နှင့် Vigo အမျိုးအစား (လိုင်စင်မဲ့) ၁ စီး တို့သိမ်းဆည်းရမိကြောင်း စကစ ကထုတ်ပြန်ထားသည်။

ကရင်နီ(ကယား) ပြည်မှာ KNDF တို့ ပူးပေါင်းတပ်ဖွဲ့တို့ ဖော်ဆောင်သည့် ၁၁.၁၁ စစ်ဆင်ရေးသည် လွိုင်ကော်မြို့အတွင်း စစ်ကောင်စီ နှင့် တိုက်ပွဲပြင်းထန်စွာ ဖြစ်ပွားနေပြီး ကရင်နီဘက်မှ စစ်ရှောင်များ သျှမ်းတောင်သို့ ခိုလှုံခွင့် မပြုကြောင်းလည်း စစ်ကောင်စီက ထုတ်ပြန်ထားသည်။