သျှမ်း – ကရင်နီ (ကယား) တကြော ဖြစ်ပွားနေသည့် “၁၁.၁၁ စစ်ဆင်ရေး” တွင် စစ်ကောင်စီ လေကြောင်း ဗုံးကြဲမှုကြောင့် အရပ်သား ၅၀ နီးပါးသေဆုံးခဲ့ကြောင်း စုံစမ်းသိရသည်။
သျှမ်း – ကရင်နီ နယ်စပ်တကြောတွင် နိုဝင်ဘာလ ၁၁ရက်မှ စတင်ခဲ့သည့် “၁၁.၁၁ စစ်ဆင်ရေး” တိုက်ပွဲကြောင့် စစ်ကောင်စီ၏ လက်နက်ကြီး၊ လေယာဉ် နှင့် ဗုံးကြဲတိုက်ခိုက်မှုများကြောင့် ကလေးအပါအဝင်လူဦးရေ ၅၀ နီးပါး ရှိနေကြောင်း ကရင်နီလူ့အခွင့်အရေးအဖွဲ့ဒါရိုက်တာ ဦးဗညား က သျှမ်းသံတော်ဆင့်ကိုပြောသည်။
“အခု သေဆုံးသူက ၅၀ နီးပါးကပ်နေပါပြီ၊ ကျနော်တို့ ၁၁ ရက်နေ့ကနေ ၁၇ ထိပေါ့နော် အဓိက သေဆုံးမှု ကတော့ လက်နက်ကြီး တွေကျရောက်ပေါက်ကွဲ ပြီးတော့ သေဆုံးတာက အများဆုံးဖြစ်ပြီးတော့ လေယာဉ်ကနေ ဗုံးကြဲ တိုက်ခိုက်သေဆုံးတာ”ဟု ဦးဗညားက ပြောသည်။
“၁၁.၁၁ စစ်ဆင်ရေး”တွင် စစ်ကောင်စီ လေကြောင်း ဗုံးကြဲမှုကြောင့် သေဆုံးမှုတွင် အမျိုးသားအများဆုံးဖြစ်ပြီး ကလေးသေဆုံးမှုများ ရှိနေကြောင်း သိရသည်။
“စစ်ကောင်စီတွေလုပ်တဲ့ဟာတွေက လူထုကို ပေးထွက်လိုက်ရင် အဲ့လောက်ထိ သေကျေပျက်စီးမှုရှိမှာ မဟုတ်ဘူး။ကျနော်တို့ ကောက်ယူထားတဲ့ သတင်းအချက်အလက်က အမျိုးသမီး ၆ ယောက် အများစု က ယောကျာ်းလေး ဒုတိယ သေဆုံးမှုအများဆုံးက ကလေး ၁၀ ယောက်ကျော်သွားပြီပေါ့နော်” ဟု ၎င်းက ဆိုသည်။
သျှမ်း-ကရင်နီ နယ်စပ်တကြောတွင် တိုက်ပွဲများ ပြင်းထန်နေပြီး စစ်ကောင်စီဘက်မှ မိနစ်ပိုင်းအတွင်း လက်နက်ကြီး ၄လုံး၊ ၅ လုံး ဆက်တိုက်ပစ်ခတ်ခြင်း၊ လေကြောင်း ဗုံးကြဲမှုများ ပြုလုပ်သည်။ ထို့ပြင် မြို့အတွင်း ပိတ်မိနေသည့် ပြည်သူများကိုလည်း စစ်ကောင်စီဘက်မှ လူသားဒိုင်း အဖြစ်အသုံးပြုထားကြောင်း ကရင်နီလူ့အခွင့်အရေးအဖွဲ့ဒါရိုက်တာ ဦးဗညား က ထပ်လောင်းပြောသည်။
“အရင်လို ပေါင် ၁၀၀၊ ၂၀၀ တွေမဟုတ်ဘူး ခုဆို ပေါင် ၅၀၀၊ ၁၀၀၀ ဗုံးတွေနဲ့ချနေတာ” ဟု ဦးဗညားက လက်ရှိမြေပြင် အခြေအနေကို ပြောသည်။
သျှမ်း-ကရင်နီနယ်စပ် တလျှောက်တွင် ယခုရက်ပိုင်း စစ်ရေးပြင်းထန်နေပြီး ထိုဒေသမှ ထွက်ပြေးတိမ်းရှောင် လာသူများကို တောင်ကြီး၊ အောင်ပန်း၊ ညောင်ရွှေ မြို့ များတွင် ဖြတ်သန်းခွင့်မပြုသည့်အပြင် ကျောင်းဆောင်များ ဆွေမျိုးနေအိမ်များ ခိုလှုံခွင့်မပြုရန် စစ်ကောင်စီက (နိုဝင်ဘာ ၁၅) ရက်တွင် ညွှန်ကြားထားကြောင်း ဒေသခံများ က သျှမ်းသံတော်ဆင့်ကို ပြောသည်။
