သျှမ်း-ကရင်နီနယ်စပ်မှ ထွက်ပြေးလာသည့် စစ်ဘေးရှောင်များကို တောင်ကြီးမြို့ စစ်ကောင်စီက ခိုလှုံခွင့်မပြုရန် ညွှန်ကြားထားသည်ဟု စုံစမ်းသိရသည်။

သျှမ်း-ကရင်နီနယ်စပ် တလျှောက်တွင် ယခုရက်ပိုင်း စစ်ရေးပြင်းထန်နေပြီး ထိုဒေသမှ ထွက်ပြေးတိမ်းရှောင်လာသူများကို တောင်ကြီး၊အောင်ပန်း၊ညောင်ရွှေ မြို့ များတွင်ဖြတ်သန်းခွင့်မပြုသည့်အပြင် ကျောင်းဆောင်များ ဆွေမျိုးနေအိမ်များ ခိုလှုံခွင့်မပြုရန် စစ်ကောင်စီက ယမန်နေ့ (နိုဝင်ဘာ ၁၅)ရက်တွင် ညွှန်ကြားထားကြောင်း ဒေသခံများက သျှမ်းသံတော်ဆင့်ကိုပြောသည်။

“ ကယား၊ ဖယ်ခုံ၊မိုးဗြဲ ကနေလာတဲ့ စစ်ရှောင်တွေ ဧည့်စာရင်းတိုင်ရင် လက်မခံဖို့၊ သာသာနာအဆောက်အဦးတွေမှာ လက်မခံထားဖို့ စစ်ကောင်စီကပြေားထားတယ်။ ကျနော်တို့ကတော့ အသက်ဘေးကနေလွှတ်လာပြီဆိုတော့ ဘာပဲဖြစ်ဖြစ် ဖြစ်ချင်တာ ဖြစ်တော့” ဟု လွိုင်ကော်မြို့မှ စစ်ဘေးရှောင်လာသည့် အမျိုးသားတစ်ဦးက ပြောသည်။

လက်ရှိမှာ သျှမ်း-ကရင်နီနယ်စပ်တလျှောက် တိုက်ပွဲကြောင့် ထွက်ပြေးလာသည့်သူ ၊လွိုင်ကော်၊ဖယ်ခုံနှင့် မိုးဗြဲ မှတ်ပုံတင်ကိုင်ဆောင်သူများသည် အောင်ပန်းအဝင်ဂိတ်တွင် ဖြတ်သန်းခွင့်မပြုသဖြင့် လမ်းတွင် ကားရာချီ ပိတ်မိနေကြောင်း လည်း ၎င်းက ပြောသည်။

ထို့ကြောင့် လွိုင်ကော်မြို့တွင်းနေထိုင်သူများသည် ထွက်ပြေးတိမ်ရှောင်ပါက သွားရောက်နေထိုင်ရန် အခက်အခဲနှင့် ထွက်ပြေးရန် ကားများမရှိသဖြင့် မြို့တွင်းတိုက်ပွဲကြားတွင် ဆက်လက်နေထိုင်ရကြောင်း လွိုင်ကော်မြို့အမျိုးသးတစ်ဦးက သျှမ်းသံတော်ဆင့်ကိုပြောသည်။

“ခုလောလောဆယ်တော့ ထွက်ဖို့လမ်းက မရှိဘူး။လမ်းပိတ်မိနေတယ် နောက်ပြီးကြတော့ မနက်ကတော့ ထွက်နေ ကြတယ် တောင်ကြီးဘက်ကို သွားကြတယ်။တောင်ကြီးကလည်း လက်မခံဘူးပြောတယ်။ ပေးမဝင်ဘူးပြောတယ်။ကျနော်တို့လည်း ဘယ်ကိုသွားပြီး ဘယ်ကို ရှောင်ရမလဲမသိဘူး ၊ညောင်ရွှေမှာလည်း မှတ်ပုံတင် ၂/တွေနဲ့ဆိုပေး မဝင်ဘူး ဘယ်အိမ်မှလက်မခံဘူးပြောတယ်“ဟု လွိုင်ကော်မြို့ထဲ ပိတ်မိနေသည့် အမျိုးသားတစ်ဦးက ပြောသည်။

လွိုင်ကော်မြို့ပေါ်တွင် ရပ်ကွက်တိုင်းနီးပါး ပိတ်မိနေသူ အများအပြားကျန်ရှိနေပြီး အကူအညီများလည်း လိုအပ်နေကြောင်း ဒေသခံများကပြောသည်။လွိုင်ကော်မြို့ပေါ်တွင် စက်သုံးဆီများ၊ ဆိုင်းခန်း များလည်း ပိတ်ထားပြီး၊ ဆန်များလည်း ရှာဝယ်ရခက်နေကြောင်းသိရသည်။

“စားဝတ်နေရေး အတွက်ကတော့ အရင်ကရှာထားတဲ့ဟာ ရှိတဲ့ ကျန်တဲ့ ဆန်တွေနဲ့ ရှိတဲ့ဟင်းသီးဟင်းရွက် တွေနဲ့ပဲစားရတာပေါ့” ဟု ပိတ်မိနေသည့် အမျိုးသားက ဆိုသည်။

နိုဝင်လာလ ၁၁ ရက်မှ စတင်ခဲ့သည့် ၁၁.၁၁ စစ်ဆင်ရေးကြောင့် သျှမ်း-ကရင်နီနယ်စပ် တစ်လျှောက် အပါ အဝင် တိုက်ပွဲများဖြစ်နေပြီး မြို့ပေါ် လူနေရပ်ကွက်များကို စစ်ကောင်စီမှ လေယာဉ်ဖြင့် ဗုံးကျဲတိုက်ခိုက်မှုများ နေ့စဉ်ဆိုသလို ကြုံတွေ့နေရကြောင်းသိရသည်။

ကရင်နီပြည်နယ်ထဲ စစ်ကောင်စီက ပစ်ခတ်သည့် လက်နက်ကြီးနှင့် လေယာဥ်မှ ဗုံးကြဲချမှုများကြောင့် ပြီးခဲ့တဲ့ ၅ ရက်အတွင်း လူဦးရေ ၄၀ နီးပါးသေဆုံးခဲ့ကြောင်း ကရင်နီလူ့အခွင့်အရေးအဖွဲ့က သတင်းထုတ်ပြန်ထားသည်။