Thursday, May 30, 2024

နောင်ချို လက်နက်ကြီးကြောင့် ကလေး ၂ ဦး ပွဲချင်းပြီးသေဆုံး၊ ၄ဦးဒဏ်ရာရ

Must read

သျှမ်းပြည် နောင်ချိုမြို့နယ်တွင် စစ်ကောင်စီတပ်မှ ရမ်းသမ်းပစ်ခတ်သည့် လက်နက်ကြီးကျကြောင့် ကလေး ၂ ဦး ပွဲချင်းပြီး သေဆုံးပြီး၊ အမျိုးသမီးနှင့် ကလေးငယ် ၂ ဦး ဒဏ်ရာရကြောင်း စုံစမ်းသိရသည်။

နောင်ချို

ယမန်နေ့ (နိုဝင်ဘာလ ၁၅ ရက်) ညနေ ၅ နာရီခွဲတွင် နောင်ချိုမြို့နယ် စစ်ကောင်စီတပ် သံဘိုတပ်စခန်းမှ ရမ်းသမ်းပစ်ခတ်လာသည့် လက်နက်ကြီးသည် သုံးဆယ်အုပ်စု ဇီးဖြူရေကျေးရွာမှ မိသားစု ၄ ယောက် နေထိုင်သည့် နေအိမ်ပေါ်သို့ ကျရောက်ပေါက်ကွဲခဲ့ရာ ကလေး ၂ ဦး ပွဲချင်းပြီး သေဆုံးကာ မိခင်ဖြစ်သူနှင့် အခြားကလေးငယ် ၁ ဦး ထိခိုက်ဒဏ်ရာ ရရှိခဲ့ကြောင်း မန္တလေး-PDF တပ်ဖွဲ့က သတင်းထုတ်ပြန်သည်။

“ စစ်ကောင်စီ တပ်စခန်းဘက်က ပစ်လွှတ်လိုက်တဲ့ လက်နက်ကြီးကျည် ဇီးဖြူရေကျေးရွာထဲကို ကျရောက်ပေါက်ကွဲခဲ့တာ ဖြစ်ပါတယ်။ ၁ နှစ် အရွယ်နဲ့ ၁၂ နှစ်အရွယ် ကလေး ၂ ဦးပွဲချင်းပြီး သေဆုံးတာမျိုး ရှိခဲ့တယ်။ မိခင်ဖြစ်သူနဲ့ ၄ နှစ်အရွယ် ကလေးငယ်၁ ဦးတို့က ထိခိုက်ဒဏ်ရာရလို့ ကျနော်တို့ ဆေးကုထားပေးပါတယ်”ဟု မန္တလေး-PDF ပြောရေးဆိုခွင့်ရှိသူ ကိုအော်စမွန်က သျှမ်းသံတော်ဆင့်ကို ပြောသည်။

၎င်းကျေးရွာအနီးတွင် ယမန်နေ့ (နိုဝင်ဘာ ၁၅ ရက်)က တိုက်ပွဲတစုံတရာ ဖြစ်ပွားခြင်း မရှိဘဲ စစ်ကောင်စီတပ်မှ အကြောင်းမဲ့သက်သက် ပစ်ခတ်ခြင်းဖြစ်ကြောင်း ကိုအော်စမွန်က ဆက်ပြောသည်။

အလားတူ ယမန်နေ့ (နိုဝင်ဘာ ၁၅ ရက်) ည ၉ နာရီကျော်အချိန်ကလည်း နောင်ချိုမြို့ ဈေးရပ်ကွက်ရှိ CB ဘဏ်အနီးတွင် ပြောင်းကုန်သည်တစ်ဦးကို စစ်ကောင်စီတပ်မှ သေနတ်ဖြင့် အကြောင်းမဲ့ ပစ်သတ်ခဲ့ပြီး ၎င်းအမျိုးသားအလောင်းကို ကားပေါ်သို့တင်ကာ ယူဆောင်သွားခဲ့ကြောင်း နောင်ချိုဒေသခံများက ပြောသည်။

ပြီးခဲ့သည့် အောက်တိုဘာ ၂၉ ရက်တွင် နောင်ချိုမြို့ ကျောက်ကြမ်းကျေးရွာရှိ ဟိန္ဒူဘုရားကျောင်းကိုလည်း စစ်ကောင်စီတပ်မှ လေကြောင်းဗုံးကျဲတိုက်ခိုက်မှုတွင် အမျိုးသား ၁ ဦး သေဆုံးကာ ၂ ဦးထိခိုက်ဒဏ်ရာရခဲ့ကြောင်း သိရသည်။

ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသော စစ်ကား ၄၀ စီးကျော်နှင့် သံချပ်ကာယာဉ် ၄ စီးတို့သည် ကျောက်မဲ၊ သီပေါ၊ လားရှိုးမြို့များသို့ ချီတက်နိုင်ရန်အတွက် စစ်ကောင်စီတပ်မှ ဂုတ်တွင်းလမ်းပိုင်းကို လက်နက်ကြီးနှင့် လေကြောင်းပစ်ကူဖြင့် အစွမ်းကုန် ထိုးဖောက်လျက်ရှိရာ TNLA နှင့် မန္တလေး-PDF ပူးပေါင်းတပ်ဖွဲ့တို့နှင့် တိုက်ပွဲပြင်းထန်နေသည်။

ညီနောင်မဟာမိတ် ၃ ဖွဲ့နှင့် စစ်ကောင်စီတို့၏ “စစ်ဆင်ရေး-၁၀၂၇”ကြောင့် နောင်ချိုမြို့နယ်အတွင်း စစ်ဘေးရှောင်ဦးရေ ၂၅၀၀ ကျော်အထိ ရှိလာပြီး သဖန်းကိုင်း၊ သုံးဆယ်၊ ငို့ကလေး၊ အင်းဝိုင်း၊ ဘန့်ဘွေးနှင့် ပြင်ဦးလွင်မြို့ရှိ ဘုန်းကြီးကျောင်းများတွင် ထွက်ပြေးတိမ်းရှောင်နေရသည်ဟု နောင်ချိုဒေသခံများထံမှ သိရသည်။

Leave a Comments

- Advertisement -spot_img

Latest article