တရုတ်နိုင်ငံဘက်မှ အလိုရှိနေသည့် ကိုးကန့်စီးပွားရေး လုပ်ငန်းရှင် လေးဦးကို ကိုးကန့်ကိုယ်ပိုင်အုပ်ချုပ်ခွင့်ရဒေသတရားရုံးမှလည်း နိုဝင်ဘာလ ၁၅ရက်နေ့က ထပ်မံ၍ ဖမ်းဝရမ်းထုတ်လိုက်ကြောင်း ထုတ်ပြန်ချက်အရ စုံစမ်းသိရှိရသည်။

တရုတ်_ မြန်မာ နယ်စပ်ဒေသတစ်ခုဖြစ်သော သျှမ်းပြည်နယ် ကိုးကန့်ကိုယ်ပိုင်အုပ်ချုပ်ခွင့်ရဒေသတွင် ဖြစ်ပွားနေသည့် အွန်လိုင်းလိမ်လည်မှုများ၊ လူပြန်ပေးဆွဲမှုများ၊‌ေခြာက်လှန့်ငွေတောင်းရန် ဂိုဏ်းဖွဲ့ထားမှုများ အပါအဝင် တရားမဝင်ဖမ်းဆီးချုပ်နှောင်ထားမှုများကို ကျူးလွန်နေသော ကိုးကန့်စီးပွားရေးလုပ်ငန်းရှင်လေးဦးကို ဥပဒေအရအရေးယူနိုင်ရန်ဟုဆိုကာ ကိုးကန့်ကိုယ်ပိုင်အုပ်ချုပ်ခွင့်ရဒေသ တရားရုံးကပါ ဖမ်းဝရမ်းထုတ်လိုက်ခြင်းဖြစ်ကြောင်း သိရသည်။

“အဲ့ဒိ သူတို့ အလိုရှိနေတဲ့ လေးဦးက မိသားစုဝင်တွေ၊မင်ရှောက်ချမ်က အဖေ၊ကျန်တာ သူ့သားသူ့သမီးသူ့မြေး၊ အရင်က ကိုးကန့်ခေါင်းဆောင်လုပ်ခဲ့ဖူးသေးတယ် သူတို့ဘယ်မှာရှိနေလဲဆိုတာ ဖမ်းဝရမ်းထုတ်ကြတဲ့သူတွေက ပိုသိပါလိမ့်မယ်”ဟု လားရှိုးမြို့နေ နိုင်ငံရေးလေ့လာသုံးသပ်သူတစ်ဦးမှ ပြောသည်။

ပြီးခဲ့သည့် နိုဝင်ဘာလ ၁၂ရက်နေ့က တရုတ်ပြည်သူ့ရေးရာ လုံခြုံရေးဝန်ကြီးဌာနက အဆိုပါလေးဦးကို အွန်လိုင်းမှတစ်ဆင့် ငွေကြေးလိမ်လည်ရာတွင် တရုတ်နိုင်ငံသားများကို အဓိကပစ်မှတ်ထားပြီး ရည်ရွယ်ချက်ရှိရှိ ရာဇဝတ်မှုများကို ကျူးလွန်ထားသော အဖွဲ့ဟု သံသယဖြစ် ဖမ်းဝရမ်းထုတ်ကာ သတင်းပေးသူများကို ဆုကြေးငွေ ယွမ် တစ်သိန်းမှ ယွမ် ငါးသိန်းအထိ ချီးမြှင့်ဟုလည်း ထုတ်ပြန်ထားသည်။

ပြီးခဲ့သည့် နိုဝင်ဘာလ၁၄ရက်ကလည်း တရုတ်ပြည်သူ့ရေးရာလုံခြုံရေးဝန်ကြီးဌာနမှ အကြီးအကဲများအပါအဝင် တရုတ်အစိုးရခေါင်းဆောင်ပိုင်းတချို့ မြန်မာစစ်ကောင်စီအဖွဲ့နှင့် လာရောက်တွေ့ဆုံပြီး သျှမ်းပြည်မြောက်ပိုင်းတွင် ဖြစ်ပေါ်နေသော တိုင်းရင်သားလက်နက်ကိုင်အဖွဲ့များနှင့် ပဋိပက္ခများကို ရပ်စဲပြီး တည်ငြိမ်အေးချမ်းစေရန် အမြန်ဆုံးတွေ့ဆုံဆွေးနွေးကြစေလိုသည်ဟု တိုက်တွန်းပြောဆိုသွားကြောင်း သိရသည်။