သျှမ်းပြည် လားရှိုးမြို့အခြေစိုက် အရှေ့မြောက်တိုင်း စစ်ဌာနချုပ်မှ စစ်အုပ်ချုပ်ရေး (မာရှယ်လော)ကို တိုင်းမှူး ဗိုလ်ချုပ်နိုင်နိုင်ဦး လက်မှတ်ဖြင့် ယနေ့ (နိုဝင်ဘာ ၁၅ ရက်)တွင် ထပ်မံကြေညာလာသည်။
စစ်ကောင်စီက စစ်အုပ်ချုပ်ရေး ဒေသအဖြစ် ကြေညာထားသည့် လားရှိုး၊ သိန္နီ၊ ကွတ်ခိုင်၊ မူဆယ်၊ နမ့်ခမ်းနှင့် ကွမ်းလုံမြို့နယ်တို့တွင် ည ၆ နာရီမှ မနက် ၆ နာရီအတွင်း ညမထွက်ရအမိန့်နှင့် ၎င်းအချိန်အတွင်း လူ ၅ ဦးထက် မပိုရန် တားမြစ်ကြောင်း ယခုထုတ်ပြန်သည့် အမိန့်စာတွင် ရေးသားထားသည်။
“အခုလို မနက်အစောကြီး မထွက်ရဘူးဆိုတော့ ကုန်စိမ်းသည်တွေ ဘယ်လိုအလုပ်ဖြစ်မလဲ။ ၄ နာရီ မထွက်ရတုန်းကလဲ ဈေးထွက်ရတာ အဆင်မပြေပါဘူးဆို၊ အခု ၆ နာရီဆို ပိုဆိုးပြီပေါ့။ ကျမတို့ဆိုရင် မနက်အစောကြီး ၂ နာရီလောက်ကတည်းက ထွက်ကြရတယ်။ အဲ့မှာ ဆိုင်ကယ်နဲ့ တဆင့်ပြန်ရောင်းတဲ့ ဈေးသည်လေးတွေ ကျမဆီ လာယူတယ်။ သူတို့လဲ ထမင်းအိုးမှောက်တာပဲ”ဟု လားရှိုးမြို့တွင် မနက်ဈေးရောင်းသည့် ကုန်စိမ်းသည်တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် နိုဝင်ဘာလ ၁၂ ရက်နေ့တွင် စစ်ကောင်စီမှ လားရှိုးအခြေစိုက် အရှေ့မြောက်တိုင်း စစ်ဌာနချုပ် ရမခ တိုင်းမှူးနှင့် လောက်ကိုင်အခြေစိုက် ဒကစ ဒေသကွပ်ကဲရေးမှူးတို့အား အုပ်ချုပ်ရေးနှင့် တရားစီရင်ရေးအာဏာကို အပ်နှင်းပြီးနောက် ယခုအမိန့်စာ ထွက်ပေါ်လာခြင်း ဖြစ်သည်။
သျှမ်းပြည်မြောက်ပိုင်းရှိ လားရှိုး၊ သိန္နီ၊ ကွတ်ခိုင်၊ မူဆယ်၊ နမ့်ခမ်း၊ ကွမ်းလုံ၊ လောက်ကိုင်နှင့် ကုန်းကြမ်း စသည့် ၈ မြို့နယ်တို့အား စစ်ကောင်စီက မာရှယ်လော ထုတ်ပြန်ထားပြီး ၎င်းမြို့နယ်များတွင် ညီနောင်မဟာမိတ်နှင့် ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တို့က စစ်ကောင်စီတပ်ကို “၁၀၂၇ စစ်ဆင်ရေး” ဆင်နွှဲနေသည်။
“၁၀၂၇ စစ်ဆင်ရေး” စတင်ဆင်နွှဲပြီး ၁၈ ရက်တာ ကာလအတွင်း စစ်ကောင်စီ၏ တပ်စခန်း အကြီးအသေး စုစုပေါင်း ၁၆၀ ကျော်နှင့် ချင်းရွှေဟော်၊ ဖောင်းဆိုင်၊ ပန်ဆိုင်း(ကြူကုတ်)၊ သိန္နီ၊ နမ့်ခမ်း၊ ကွမ်းလုံမြို့တို့ကို ထိန်းချုပ်ထားနိုင်ကြောင်း ညီနောင်မဟာမိတ် ၃ ဖွဲ့မှ ထုတ်ပြန်ကြေညာထားသည်။
