ကရင်နီပြည် (ကယား) လွိုင်ကော်မြို့တွင် ပိတ်မိနေသည့် လွိုင်ကော်တက္ကသိုလ် နှင့် စက်မှုကျောင်းက Non CDM ဝန်ထမ်း ၁၃၄ ဦးနှင့် မိသားစုဝင် ၆၄ဦး ကို ကရင်နီပြည်တော်လှန်ရေးတပ်ပေါင်းစုံမှ ဘေလွတ်ရာသို့ ကယ်ထုတ်နိုင်ခဲ့ကြောင်း ကရင်နီပြည်ကြားကာလ အုပ်ချုပ်ရေးကောင်စီ (IEC ) က ထုတ်ပြန်ထားသည်။

၁၁.၁၁ စစ်ဆင်ရေးကို စတင်ခဲ့သည့် ရက်မှစပြီး လျစ်လျူရှုစွန့်ပစ်ခြင်းခံ ရသည့် လွိုင်ကော်တက္ကသိုလ်မှ Non-CDM ဝန်ထမ်းများနှင့် ၎င်းတို့ မိသားစု ဝင်များအား လူသားချင်းစာနာထောက်ထားရေး၊ လူ့အခွန့်ရေးများနှင့် အညီ ပြည်ထဲရေးဌာန၏ စီမံကြီးကြပ်မှု အောက်တွင် ဘေးကင်းလုံခြုံစွာဖြင့် စောင့်ရှောက်ထားကြောင်း ကရင်နီပြည်ကြားကာလ အုပ်ချုပ်ရေးကောင်စီ (IEC ) က ယမန်နေ့ (နိုဝင်ဘာ ၁၅)ရက်တွင် ထုတ်ပြန်ထားသည်။

Non-CDM နှင့် စပ်လျဉ်း၍ အမျိုးသားညီညွတ်ရေး အတိုင်ပင်ခံကောင်စီ NUCC မှရေးသားဖော်ပြထားသည့် CDM နိုင်ငံ့ဝန်ထမ်းဆိုင်ရာ မူဝါဒစာတမ်း Non CDM ဆိုင်ရာ ပြဌာန်းချက်များကို ကိုးကား၍ လူ့အခွန့်အရေးကို အခြေခံရ သော်လည်းကောင်း စီမံဆောင်ရွက်သွားမည် ဖြစ်ကြောင်း ထုတ်ပြန်ခဲ့သည်။

နိုဝင်လာလ ၁၁ ရက်မှ စတင်ခဲ့သည့် ၁၁.၁၁ စစ်ဆင်ရေးကြောင့် သျှမ်း-ကရင်နီနယ်စပ် တစ်လျှောက် အပါအဝင် တိုက်ပွဲများဖြစ်နေပြီး မြို့ပေါ် လူနေရပ်ကွက်များကို စစ်ကောင်စီမှ လေယာဉ်ဖြင့် ဗုံးကျဲတိုက်ခိုက်ခဲ့သည်။

ထိုတိုက်ပွဲကြောင့် ပြည်သူလူထုများ အရေးပေါ်ထွက်ပြေး တိမ်းရှောင်လာရပြီး ထိုစစ်ရှောင်များကို စစ်ကောင်စီဂိတ် ဖြစ်သည့် အောင်ပန်းကားဂိတ်မှ ဖြတ်ကျော်ခွင့်မပြုကြောင်း ဒေသခံများကပြောသည်။

ကျနော်က ခုဖယ်ခုံပိတ်မိတာ ၅ညအိပ်၆ရက်ရှိနေပြီး။ကားသမားတွေနဲ့ စုပြီးနေ နေရတာ။အကိုတို့ဘယ်မှကို သွားလို့မရဘူး။ထွက်သွားတဲ့ကားသမား တွေလည်း ခုထိ အဆက်အသွယ်ကို ပြန်မရသေးဘူး။”ဟု လမ်းတွင် ပိတ်မိနေသည့် လွိုင်ကော်-မန္တလေး ကားသမားတစ်ဦး က သျှမ်းသံတော်ဆင့်ကို ပြောသည်။

၁၁.၁၁ စစ်ဆင်ရေး တိုက်ပွဲများကြောင့် အောင်ပန်း၊ ဖယ်ခုံ၊လင်ဖုံလေးရွာတွင် ကားများ ရာနှင့်ချီ ပိတ်မိနေကြောင်း သိရသည်။